Mark 8
1 Во тие дни, кога се беше собрал многу народ и немаше што да јадат, Исус ги повика учениците Свои и им рече:
2 „Ми е жал за народот, зашто веќе три дни стојат кај Мене и нема што да јадат.
3 Ако ги пуштам да си одат гладни по куќите нивни, ќе премалеат по патот, зашто некои се дојдени оддалеку.“
4 Учениците Му одговорија: „Од каде може човек сите овие да ги нахрани со леб, овде во пустинава?“
5 И ги праша: „Колку лебови имате?“ А тие одговорија: „Седум.“
6 Тогаш му заповеда на народот да поседне по земјата; па, откако ги зеде седумте лебови, заблагодари, ги раскрши и им ги даде на учениците Свои да ги разделат; и тие ги разделија на народот.
7 Имаа и малку риби; ги благослови и заповеда да ги раздадат и нив.
8 И јадеа, и се наситија; и собраа седум кошници останати парчиња.
9 А оние, што јадеа, беа околу четири илјади души. И ги пушти да си одат.
10 И веднаш влезе во кораб со учениците Свои и дојде во пределите Далманутски.
11 И излегоа фарисеите и почнаа да се препираат со Него, па искушувајќи Го, Му бараа чудесен знак од небото.
12 А Тој воздивна длабоко и рече: „Зошто овој род бара чудесен знак? Вистина ви велам: нема да му се даде чудесен знак на овој род.“
13 И кога ги остави, пак влезе во коработ и премина на другата страна.
14 А тие, пак, беа заборавиле да земат леб и во коработ имаа само еден леб.
15 А Тој им заповеда и рече: „Внимавајте, чувајте се од квасот фарисејски и од квасот Иродов!“
16 И си размислуваа меѓу себе, велејќи: „Тоа е затоа што немаме леб.“
17 А Исус, кога ги разбра, им рече: „Зошто зборувате за тоа што немате леб? Зар уште не знаете и не разбирате? Уште ли е скаменето вашето срце?
18 Очи имате, не гледате ли? Уши имате, не слушате ли? И не помните ли?
19 Кога ги раскршив петте леба, за пет илјади души, колку полни кошеви со парчиња собравте?“ Му рекоа: „Дванаесет.“
20 „А седумте — за четири илјади, колку кошници со останати парчиња собравте?“ Тие одговорија: „Седум.“
21 И им рече: „Па како тогаш не разбирате?“
22 Потоа дојде во Витсаида; и доведоа кај Него слеп и Го молеа да се допре до него.
23 И кога го зеде слепиот за рака, го изведе надвор од селото и, откако плукна на очите негови, ги положи рацете над него, па го праша дали гледа нешто.
24 Тој, кога погледна, рече: „Ги гледам луѓето како дрвја, но тие одат.“
25 Потоа пак ги положи рацете над очите негови и му рече да погледа. И му се поврати видот и ги гледаше сите јасно.
26 И го испрати во домот негов и му рече: „Не навраќај в село!“
27 И излезе Исус со учениците Свои по селата на Кесарија Филипова. По патот ги праша учениците Свои и им рече: „За кого Ме мислат луѓето?“
28 Тие одговорија: „За Јован Крстител, некои за Илија, а други, пак, за некој од пророците.“
29 Тој, пак, им рече: „А вие, за кого Ме мислите?“ Петар Му одговори и рече: „Ти си Христос!“
30 И им заповеда никому да не говорат за Него.
31 Па почна да ги учи дека Синот Човечки треба многу да пострада, да биде отфрлен од старешините, првосвештениците и книжниците, и да биде убиен и на третиот ден да воскресне.
32 И говореше за тоа отворено. Но Петар, Го повлече настрана и почна да Го одвраќа.
33 А Тој, кога се заврте и ги погледна учениците Свои, му забрани на Петар да говори и рече: „Бегај од Мене, сатано! Зашто не мислиш на она што е Божјо, туку на она што е човечко!“
34 И кога го повика народот и учениците Свои, им рече: „Кој сака да врви по Мене, нека се одрече од себе, и нека го земе крстот свој и нека оди по Мене.
35 Зашто, кој сака да го спаси својот живот, ќе го загуби; а кој го загуби животот свој заради Мене и Евангелието, тој ќе го спаси.
36 Зашто каква полза има човек, ако го придобие целиот свет, а на душата своја ѝ напакости?
37 Или каков откуп ќе даде човек за својата душа?
38 Зашто, кој се срами од Мене и од зборовите Мои во овој прељубодеен и грешен род, и Синот Човечки ќе се срами од него, кога ќе дојде во славата на Својот Отец со светите ангели.“