Leviticus 4— 2006

¹И уште му рече Господ на Мојсеј, велејќи:

²„Кажи им на синовите израелски: ако некој згреши пред Господ не сакајќи, против која и да било заповед Господова и изврши нешто, што не треба да прави, —

³ако помазаниот свештеник згрешил и го обвинил народот, тоа за гревот свој, што го направил, нека Му принесе на Господ за гревот од крупниот добиток — теле без недостаток,

⁴па откако ќе го доведе телето пред влезот од скинијата на собранието пред Господ, нека ја положи раката своја врз главата на телето и да го заколе телето пред Господ.

⁵А помазаниот свештеник нека земе од крвта од телето, и нека ја внесе во скинијата на собранието.

⁶И свештеникот нека го накваси прстот свој во крвта, и со крвта седум­пати нека попрска пред Господ спрема завесата на светилиштето.

⁷А потоа свештеникот со таа крв не­ка ги помаже роговите на жртве­никот, на кој се кади со благопријатен мирис пред Господ, Кој е во скинијата на собранието, а остатокот од крвта на телето нека го излее во подножјето на жртвеникот за жртви сепаленици, кој е кај влезот од скинијата на собранието.

⁸И нека го извади сиот лој од телето за грев, лојот што ја покрива утробата и сиот лој што е на утробата;

⁹и обата бубрега, и лојот што е на нив и на слабините, и кошулката на црниот дроб со бубрезите нека ги извади,

¹⁰онака како што се вади тоа од теле за жртва за мир; и нека ги изгори свеш­теникот на жртвеникот за жртви сепаленици.

¹¹А кожата од телето со сето месо, со главата и со крајниците, утробата и не­чис­тотијата,

¹²целото теле нека го изнесат надвор од логорот на чисто место, каде што се истура пепелта, и нека го изгорат со оган на дрва; на местото, каде што се истура пепелта, нека се изгори.

¹³А ако целата заедница на синовите израелски згреши, не сакајќи, а тоа се сокрие од собирот, па направат нешто што Господ забранил да се прави, и би­дат виновни;

¹⁴кога ќе се узнае гревот нивни, во што згрешиле, тогаш заедницата нека принесе здраво теле како жртва за гре­вот, и нека го доведат пред скинијата на собранието.

¹⁵А старешините на заедницата нека положат раце врз главата на телето пред Господ, и да го заколат телето пред Господ.

¹⁶А помазаниот свештеник нека вне­се крв од телето во скинијата на собра­нието.

¹⁷Потоа нека го натопи свештеникот прстот свој во крвта, и седумпати нека попрска пред завесата на светилиштето,

¹⁸а од таа крв нека стави и на рого­вите од жртвеникот за кадење што е пред Господ во скинијата на собранието, додека сета друга крв нека ја излее во подножјето на жртвеникот за приноси, што е кај влезот од скинијата на собранието.

¹⁹Сиот, пак, лој, откако ќе го извади од него, нека го изгори на жртвеникот.

²⁰И со тоа теле да направи онака како што прави со телето за грев — така нека направи со него; и така свештеникот ќе ги очисти, и гревот ќе им се прости.

²¹А телето цело нека го изнесат од логорот, и нека го изгорат како и првото теле; тоа е жртва за гревот на целиот народ.

²²Ако згреши главатар и направи, не сакајќи, нешто што Господ Бог забра­нил да се прави, виновен ќе биде.

²³А кога ќе узнае во себеси за гревот свој што го направил, тогаш нека принесе за жртва козел, без недостаток.

²⁴И нека ја стави раката своја врз главата на козелот и нека го заколе на она место, каде што се колат жртвите сепаленици пред Господ; тоа е жртва за грев.

²⁵И нека земе свештеникот крв од жртвата за грев и со прстот свој нека ги намачка роговите на жртвеникот за сепаленици; а сета друга крв негова не­ка ја излее во подножјето на жртве­никот за сепаленици.

²⁶А сиот лој нека го изгори на жр­т­веникот како и лојот од жртвата за мир; и така ќе го очисти свештеникот од гревот негов, и ќе му се прости.

²⁷И ако некој од народот згреши и не сакајќи направи нешто што Господ забранил да се прави, виновен е.

²⁸Кога ќе узнае, пак, за гревот свој што го направил, тогаш нека принесе дар свој — коза од козите свои, без недо­статок, поради гревот што го направил;

²⁹и нека ја стави раката своја врз главата од жртвата за грев, и нека се заколе козата како жртва за грев на местото, каде што се колат жртвите сепаленици.

³⁰Потоа нека земе свештеникот крв од неа на прстот свој и нека ги помаже роговите на жртвеникот за сепаленици: а сета друга крв нека ја излее во под­ножјето на жртвеникот.

³¹И сиот лој од неа нека го извади како што се вади лојот од жртвата за мир, и нека го изгори свештеникот на жртвеникот за пријатен мирис пред Господ; и така ќе го очисти свеште­ни­кот, па ќе му биде простено.

³²Ако принесува жртва за грев јагне, нека донесе женско и без недостаток.

³³И нека ја стави раката своја врз главата од жртвата за грев, па нека ја заколе поради гревот на она место, каде што се колат жртвите сепаленици.

³⁴И свештеникот нека земе крв од жртвата за грев и со прстот свој со неа нека ги намачка роговите на жртве­никот, на кој се гори жртвата; а сета друга крв нека ја излее во подножјето на жртвеникот за сепаленици.

³⁵И сиот лој нека го извади, како што се вади лојот од јагне за жртва за мир; и нека го изгори свештеникот врз жртвеникот како жртва Господова; и така свештеникот ќе го очисти од гревот негов, што го направил, и ќе му се прости.“