Isaiah 48— 2006

¹Слушај го ова, доме Јаковов, вие, кои се нарекувате со името на Израел и кои сте произлегле од Јуда, кои се колнете во името Господово, Го спомнувате Бог Израелов, иако не по вистина и не по правда.

²Зашто тие се нарекуваат по светиот град и се потпираат на Бог Израелов; Јахве Саваот е името Негово.

³Поранешното Јас однапред го претскажав, и она што од устата Моја изле­гуваше и Јас го навестував и брзо го вршев, — и сѐ се извршуваше.

⁴Јас знаев дека ти си тврдокорен дека во твојот врат има железни жили, и челото ти е бакарно;

⁵затоа и однапред ти навестував, пред да се случи тоа, и ти навестував, за да не речеш: „Мојот идол го направи тоа, мо­јот идол и мојот излеан лик заповеда тоа да стане.“

⁶Ти си го чул и видел сето тоа! И зар нема да го признаеш тоа? А сега те из­вестувам за нешто ново и сокриено, што ти не си го знаел.

⁷Тоа се изврши сега, а не одамна и не пред еден ден, и ти не си слушал за не­го, за да кажеш: „Ете, јас го знаев тоа.“

⁸Ти не си слушал, ниту си знаел за тоа, и увото твое порано не беше отво­рено; зашто Јас знаев дека ти ќе поста­пиш вероломно; од самата мајчина ут­роба си наречен отстапник.

⁹Заради името Свое го одлагав Сво­јот гнев и заради славата Своја се воз­држував да не те истребам.

¹⁰Ете, те пречистив, но не како среб­ро, те испитав во печката на страдањата.

¹¹Заради Себе, заради Самиот Себе го вршам тоа, — зашто, каква навреда би била за името Мое! Славата Своја нема да ја дадам на друг.

¹²Чуј Ме, Јакове и Израеле, повикан од Мене: Јас сум истиот, Јас сум првиот и Јас сум последниот.

¹³Мојата рака ја основа земјата, Мојата десница го распростре небото; ќе ги повикам, — и тие ќе се постројат.

¹⁴Соберете се сите и слушајте: кој од нив го претскажал ова? Господ го воз­љуби, и тој ќе ја исполни волјата Негова над Вавилон и ќе ја покаже силата Негова над Халдејците.

¹⁵Јас, Јас реков, и го повикав; Јас го доведов, патот негов ќе биде успешен.

¹⁶Пристапете кон Мене, слушајте го ова: Јас и во почетокот не говорев тај­но; и кога се извршуваше тоа, Јас бев таму; и сега Ме испрати Господ Бог и Неговиот дух.

¹⁷Вака вели Господ, твојот Искупи­тел, Светецот Израелов: Јас сум Гос­под, Бог твој, Кој те учи на добро, Кој те води по оној пат, по кој треба да одиш.

¹⁸О, да беше ги слушал Моите за­поведи! Тогаш твојот мир ќе беше како река, и твојата правда — како морски бранови.

¹⁹И твоето потомство би било како песок, а породот од утробата твоја, — како зрнцата негови: името твое не би се истребило, нити избришало пред Мене.

²⁰Излегувајте од Вавилон, бегајте од Халдејците, со радосен глас разгла­сувајте и проповедајте го тоа, ширете ја таа вест до крајот на земјата; кажувај­те: „Господ го откупи Својот слуга Јаков.“

²¹Не ожеднуваа тие во пустините, преку кои Тој ги води: Тој им извади во­да од камен; пресече карпа — и бликнаа води.

²²Нема мир за лошите, вели Господ.