Isaiah 11— 2006

¹И ќе потера фиданка од Јесеевата пењушка, и стебло ќе израсне од нејзиниот корен;

²ќе почива врз Него Дух Господов, дух на мудрост и разум, дух на совет и крепост, дух на знаење и богобојазли­вост;

³ќе се исполни со страв Господов, ќе суди, не според тоа како што очите Не­гови гледаат; и ќе ги решава делата, не според тоа како што ушите Негови слушаат.

⁴Тој ќе им суди на сиромасите по правда, и делата на страдалниците во земјата ќе ги решава според вистината; со зборот од устата Своја ќе ја порази земјата, со дишењето на устата Своја ќе го убие нечесниот.

⁵Појас на половината Негова ќе биде правдата, а појас на бедрата Негови — вистината.

⁶Тогаш волк ќе живее со јагне, лео­пардот ќе лежи заедно со јаре; теле, лавче и вол ќе бидат заедно, и мало дете ќе ги води.

⁷Крава ќе пасе со мечка, нивните млади ќе лежат заедно; лавот ќе јаде слама како волот.

⁸Новороденче ќе игра над змиина дупка, дете ќе протега рака кон змиино гнездо.

⁹Нема да прават зло и штета по целата Моја света гора, зашто земјата ќе биде полна со познавање на Господ, како што водите го полнат морето.

¹⁰Во оној ден кон Јесеевиот корен, кој ќе стане како знаме на народите, ќе се обратат незнабошците, живеа­лиштето негово ќе му биде слава.

¹¹Тогаш Господ пак ќе ја крене раката Своја, за да Си го врати остатокот од народот Свој, — она што остана во Аси­рија, и во Египет, и во Патрос, и во Куш, и во Елам, и во Сенаар, и во Хамат, и островите морски.

¹²И ќе крене знаме кон незна­бошците и ќе ги собере прогонетите Израелци; расеаните Јудејци ќе ги повика од чети­рите земни краишта.

¹³Ќе се прекрати зависта Ефремо­ва; кои непријателствуваат против Јуда, ќе бидат истребени, Ефрем нема да му за­видува на Јуда, а Јуда нема да го при­теснува Ефрем.

¹⁴И ќе полетаат врз плеќите на Фи­листејците кон запад, ќе ги ограбат сите народи на Исток; ќе стават рака врз Едом и Моав, и синовите Амоно­ви ќе им бидат поданици.

¹⁵Ќе го исуши Господ заливот на Египетското Море, ќе ја протегне раката Своја врз Реката преку силниот Свој ветар и ќе ја разбие на седум ракави, така што со обувки да можат да ги мину­ваат.

¹⁶Тогаш за остатокот од Неговиот народ, кој ќе остане во Асирија, ќе има широк пат, како што беше тоа за Из­раелците кога излегуваа од египетската земја.