Acts 6— 2006

¹Кога учениците се намножија, елинизираните Јудејци се побунија против Евреите зашто при секојдневното делење храна не биле пригледувани нивните вдовици.

²Тогаш Дванаесетте, го свикаа целото мноштво ученици, и рекоа: „Не е добро ние да го оставиме словото Божјо и да послужуваме на трпезите.

³Затоа, браќа, одберете меѓу вас седуммина чесни луѓе, исполнети со Дух и мудрост, па ќе ги поставиме на таа служба;

⁴а ние целосно ќе ѝ се посветиме на молитвата и на службата на словото.“

⁵Предлогот му се допадна на сиот на­род; па ги одбраа: Стефан, човек исполнет со вера и Дух Свети, Филип, Про­хор, Никанор, Тимон, Пармена, Ни­ко­лај, еден новопридојден од Антиохија;

⁶нив ги поставија пред апостолите, а тие, откако се помолија, ги положија рацете над нив.

⁷И така, словото Божјо се ширеше, и бројот на учениците во Ерусалим се зголемуваше; и големо мноштво свеш­теници ѝ се покори на верата.

⁸А Стефан, исполнет со вера и сила, правеше големи чудеса и знаци меѓу лу­ѓето.

⁹Тогаш се кренаа некои припадници на синагогата, наречена синагога на Либертините, на Киринејците и Алек­сандријците, како и на оние што беа од Киликија и Азија, и почнаа да се пре­пи­раат со Стефан;

¹⁰но не можеа да се спротивстават на мудроста и Духот со кои тој зборуваше.

¹¹Затоа тајно подучија некои луѓе да речат: „Го чувме дека хули на Мојсеј и на Бога.“

¹²Така го надразнија народот, ста­ре­шините и книжниците. Потоа приста­пија кон него, го зграпчија и го одведоа во Синедрионот.

¹³Таму поставија лажни сведоци, кои рекоа: „Овој човек постојано хули на ова свето место и на Законот.

¹⁴Го слушнавме како зборува дека Исус од Назарет, Тој ќе го разруши ова место и ќе ги измени обичаите што ни ги предаде Мојсеј.“

¹⁵Тогаш сите што беа во Синед­ри­он­от го вперија погледот во него и видоа дека лицето негово му беше како лице на ангел.