Acts 3— 2006

¹Еден ден Петар и Јован заедно о­тидоа во храмот во деветтиот час, часот за молитва.

²Таму имаше еден човек, сакат уште од раѓање. Него го носеа секој ден и го поставуваа пред портата на храмот наречена Красна, за да проси милостина од оние што влегуваа во храмот.

³Тој, кога ги здогледа Петар и Јован кои сакаа да влезат во храмот, запроси милостина и од нив.

⁴А Петар, заедно со Јован, го впери кон него погледот и му рече: „Погледни во нас!“

⁵И тој ги гледаше внимателно, очекувајќи да добие нешто од нив.

⁶Но Петар рече: „Сребро и злато јас немам, а што имам, тоа ти давам: во името на Исус Христос од Назарет стани и оди!“

⁷И само што го фати за десната рака, го исправи, а нему веднаш му се зац­врс­наа стапалата и глуждовите;

⁸па скокна, се исправи и почна да оди. Тогаш влезе во храмот заедно со нив скокајќи и фалејќи Го Бога.

⁹И сиот народ го гледаше како оди и како Го слави Бога.

¹⁰Луѓето го познаа дека тој беше оној истиот што седеше пред портата на храмот наречена Красна, поради ми­лос­тина; и беа полни со восхит и вчудоневиденост за она што се случи.

¹¹И бидејќи оздравениот сакат човек цврсто се држеше за Петар и Јован, кон нив дотрча вчудовиден сиот народ во тремот, наречен Соломонов.

¹²А Петар, штом го виде тоа, му рече на народот: „Луѓе Израелци, што се чу­дите на ова, и што сте се загледале во нас, како со своја сила или побожност да направивме овој да прооди?

¹³Бог Авраамов, Исаков и Јаковов, Бог на татковците наши Го прослави својот Син Исус, Кого вие Го пре­да­дов­те и од Кого се одрековте пред лицето на Пилат, кога тој реши да Го пушти.

¹⁴Но вие се одрековте од Светиот и Праведниот и побаравте да ви се ослободи човек убиец,

¹⁵а Го убивте Зачетникот на животот, Кого Бог Го воскресна од мртвите; за тоа сме ние сведоци.

¹⁶И поради верата во Неговото име, овој, кого вие го гледате и познавате, го потврди името Негово; а верата во Него го исцели и овој човек пред сите вас.

¹⁷А сега, браќа, знам дека вие тоа го направивте од незнаење како и вашите началници.

¹⁸А Бог, она што однапред го навести преку устата на сите пророци Свои, од­носно дека Христос ќе пострада, тоа и го исполни.

¹⁹Покајте се, пак, и обратете се, за да се очистите од гревовите ваши,

²⁰за да дојдат од Господ времиња за освежување и Тој да ви Го прати вам претскажаниот Исус Христос,

²¹Кого небото треба да Го прими до она време, кога ќе се воспостави сѐ што беше рекол Бог преку устата на сите Свои пророци од создавањето на светот.

²²Мојсеј им беше рекол на тат­ков­ци­те: ‚Господ Бог ваш од браќата ваши ќе ви издигне Пророк како мене; Него послушајте го за сѐ што ќе ви рече!‘

²³И секој што не ќе Го послуша тој Пророк, ќе биде истребен од народот.

²⁴А сите пророци што пророкуваа, од Самоил, па и оние по нив, го навестуваа исто така и ова време.

²⁵Вие сте синови на пророците и на заветот што Бог го беше направил со вашите предци, велејќи му на Авраам: ‚И во потомството твое ќе бидат благо­словени сите народи на земјата.‘

²⁶Бог, откако Го воздигна Својот Слуга, најнапред вам ви Го прати за да ве благослови, та секој од вас да се од­врати од својата злоба.“