2 Chronicles 28— 2006

¹Ахаз беше на дваесет години кога стана цар, и царуваше во Еру­салим шеснаесет години; и тој не го правеше угодното во очите Госпо­дови, како што правеше неговиот предок Давид;

²тој одеше по патот на израелските цареви, и дури направи излеани кипови на Вааловци;

³и тој кадеше во долината на Хино­мовите синови, и ги протеруваше низ огин синовите свои, според гнасотиите на оние народи, кои Гос­под ги прогони пред лицето на израелските синови;

⁴принесуваше жртви и кадеше по оброчиштата и по ридовите и под секое разгрането дрво.

⁵Затоа Господ, неговиот Бог, го пре­даде во рацете на арамејскиот цар, и Арамејците го разбија и му зедоа многу заробеници, кои ги одведоа во Дамаск. Беше предаден и во рацете на израелскиот цар, и тој му нанесе голем пораз.

⁶Факиј, син Рамалиев уби во еден ден сто и дваесет илјади Јудејци, храбри војници, затоа што Го беа оставиле Господ, Бог на нивните предци.

⁷А Зихриј, силен јунак од Ефремци­те, го уби Маасејаху, царевиот син, и Азрикам, началник на дворот, и Ел­кана, втор по царот.

⁸И зедоа синовите израелски од бра­ќата свои, Јудејците, двесте илјади же­ни, синови и ќерки; ограбија и многу плен од нив, и го однесоа ограбеното во Самарија.

⁹Таму имаше пророк Господов, по име Одед. Тој излезе пред војската, која одеше во Самарија, и им рече: „Ете, Господ, Бог на предците ваши, во гне­вот Свој против Јудејците, ги предаде во ваша рака, и вие ги избивте со таква јарост, која стигна до небесата.

¹⁰И сега мислите да ги направите си­новите на Јуда и Ерусалим ваши робови и робинки. А зар немате и вие вина пред Господ, вашиот Бог?

¹¹Затоа послушајте ме, и вратете ги заробениците, што сте ги заробиле од браќата свои, зашто пламенот на гневот Господов е на вас.“

¹²И некои од началниците на сино­вите Ефремови: Азарија, син Јоананов, Варахија, син Мешилемотов, Езекија, син Салумов, и Амаса, син Хадлаев, застанаа спроти оние што доаѓаа од војна.

¹³И им рекоа: „Не доведувајте ги заробениците тука, зашто би згре­шиле пред Господ. Зар мислите да придодадете уште кон гревовите наши и кон престапите наши? Нашата вина е голема, и пламенот на гневот Господов е врз Израел.“

¹⁴И вооружените ги оставија заробениците и пленот кај воените началници и пред целото собрание.

¹⁵И станаа споменатите по име мажи, ги зедоа заробениците, и сите што беа голи ги облекоа од ограбеното — ги об­лекоа и ги обуја, и ги нахра­нија, и ги напоија, и ги помазаа со масло, и ги качија на магариња сите слаби, и ги испратија во Ерихон, град на палмите, кај браќата нивни, и се вратија во Самарија.

¹⁶Во тоа време царот Ахаз ги замоли асирските цареви да му помогнат,

¹⁷зашто Едомците уште напаѓаа и мнозина убија и заробија во Јудеја.

¹⁸А Филистејците се раширија по градовите во низината и во јужна Јудеја и го презедоа Ветсамис и Аја­лон, Гедерот и Сохо со потчинетите му гра­дови. Тимна со потчинетите ѝ градови и Гимзо со потчинетите му градови, и се населија таму.

¹⁹Така ја понижи Господ Јудеја поради Ахаз, царот јудејски, зашто тој ја разврати Јудеја и тешко грешеше пред Господ.

²⁰И дојде кај него асирскиот цар Тил­гат-Пилнесер, но му беше од штета, наместо да му помогне,

²¹зашто Ахаз ги зеде ризниците од домот Господов, од царскиот дом и од началниците, и сѐ му даде на асир­скиот цар, но и тоа не му помогна.

²²И во таа притеснета положба тој продолжуваше да прави беззаконија пред Господ, таков беше царот Ахаз;

²³им принесуваше жртви на дамас­ките богови, мислејќи дека тие го поразија, па велеше: „Боговите на ара­мејските цареви им помагаат; ќе им принесам жртва, тие и мене ќе ми помогнат.“ Но тие му беа за пропаст и нему и на целиот Израел.

²⁴Ги собра Ахаз садовите на домот Божји и ги разби, ја затвори вратата на домот Господов и си изгради жртвеници по сите агли на Ерусалим,

²⁵по сите градови Јудини направи оброчишта, за да кади на туѓи богови, и Го дразнеше Господ, Бог на своите предци.

²⁶Другите дела и сите негови постапки, од првите па до последните, се опишани во Книгата на царевите јудеј­ски и израелски.

²⁷И почина Ахаз кај своите предци, и го погребаа во градот, во Ерусалим, но не го внесоа во гробниците на израелските цареви. Наместо него стана цар синот негов Езекија.