2 Chronicles 1— 2006

¹Соломон, синот Давидов, се зацврсти во царството свое, и Господ, не­говиот Бог, беше со него и го издигна високо.

²И му заповеда Соломон на сиот Из­раел да се соберат: илјадниците, стотниците, судиите и сите началници во сиот Израел — старешините на домовите татковски.

³Па отидоа Соломон и целото собра­ние со него на ридот во Гаваон, бидејќи таму беше Божјата скинија на собранието, која Мојсеј, слугата Господов, ја беше подигнал во пустината.

⁴Давид го беше пренел Божјиот ков­чег од Кирјат-Јарим на она место, што му го беше приготвил, откако направи за него скинија во Ерусалим.

⁵А бакарниот жртвеник, што го беше направил Веселеил, синот на Уриј, Оров син, си остана таму пред скинијата Господова; него го побараа Соломон и собранието.

⁶И таму пред лицето на Господ, врз бакарниот жртвеник, што беше пред скинијата на собранието, Соломон принесе илјада жртви-паленици.

⁷Во таа ноќ му се јави Господ на Со­ломон и му рече: „Барај, што сакаш да ти дадам.“

⁸Соломон Му одговори на Бога: „Ти му направи на татко ми Давид голема милост и ме постави за цар место него.

⁹Нека се исполни сега, Господи, сло­вото Твое кон татко ми Давид, бидејќи ме направи цар над народ многуброен, како земниот прав,

¹⁰дај ми сега мудрост и разум, за да управувам со тој народ; зашто, кој може да управува со Твојот голем народ?“

¹¹И му рече Бог на Соломон: „Затоа што го имаш тоа во срцето свое и не побара богатство, имот и слава, ниту душите на твоите непријатели, туку побара мудрост и разум, за да управуваш со Мојот народ, над кој те поставив за цар —

¹²мудрост и разум ти се дава, а богатство, имот и слава ќе ти дадам такви, какви што кај царевите пред тебе немало, ниту ќе има по тебе.“

¹³Тогаш Соломон се врати од ридот во Гаваон, од скинијата на собранието, во Ерусалим, и царуваше над Израел.

¹⁴И собра Соломон коњаница; имаше илјада и четиристотини коли и дванаесет илјади коњаници, кои ги насели по градовите каде што му беа колите и кај себе во Ерусалим.

¹⁵И го направи царот во Ерусалим среброто и златото еднакво вредно со камењата, а кедрите според нивното множество ги направи еднакво вредни со смоквите во полињата.

¹⁶Коњи му увезуваа на Соломон од Египет; царски трговци ги купуваа со пари;

¹⁷една кола се купуваше и довезуваше од Египет за шестотини шекели сребро, а еден коњ — за сто и педесет. Така тие им ги продаваа на сите цареви хитиски и цареви арамејски.

¹⁸Соломон потоа науми да изгради дом на името Господово и царски дом за себеси.