2 Samuel 23— WARMB

¹Դաւիթին վերջին խօսքերը ասոնք են։ Յեսսէի որդին Դաւիթ՝ Այն մարդը, որ բարձրացաւ՝ Յակոբի Աստուծոյն օծեալը՝ Ու Իսրայէլի վայելուչ երգերը շարադրողը, կ’ըսէ.

²«Տէրոջը Հոգին ինծմով խօսեցաւ Ու անոր խօսքը իմ լեզուիս վրայ էր։

³Իսրայէլին Աստուածը ըսաւ Ու Իսրայէլին Վէմը ինծի խօսեցաւ Ըսելով. ‘Մարդոց վրայ իշխողը թող արդար ըլլայ Ու Աստուծոյ վախովը իշխէ’,

⁴Այն ատեն անիկա առաւօտեան լոյսին կը նմանի, Որ արեւուն ծագած ատենը կ’երեւնայ, Այնպիսի առաւօտի մը՝ որ առանց ամպի է Ու արեւու ճառագայթին՝ Որ անձրեւէն ետքը գետնէն կանանչ խոտ կը բուսցնէ ։

⁵Թէեւ իմ տունս Աստուծոյ քով այսպէս չէ, Սակայն ինծի հետ յաւիտենական ուխտ մը ըրաւ, Որ ամէն բանի մէջ պատրաստ ու հաստատ է. Քանզի իմ բոլոր փրկութիւնս ու իմ բոլոր բաղձանքս այս է. Ու պիտի չծաղկեցնէ՞՝ ՝ զայն ։

⁶Բայց բոլոր անօրէնները Դուրս նետուած փուշերու պէս պիտի ըլլան, Քանզի անոնք ձեռքով չեն բռնուիր։

⁷Անոնց դպչող մարդը Երկաթը ու նիզակին բունը իրեն զէնք պիտի ընէ՝ ՝ Ու իրենց եղած տեղը Բոլորովին կրակի մէջ պիտի այրին»։

⁸Դաւիթին զօրաւոր մարդոցը անունները ասոնք են. Յօսէբ-Բասեբեթ Թահքեմոնացին, որ զօրավարներուն գլխաւորն էր. անիկա է Ասօնացի Ադինօն, որ անգամ մը ութ հարիւր մարդ մէկէն մեռցուց՝ ՝։

⁹Անկէ ետքը Աքուքացի Դովդայի որդին Եղիազարը, որ Դաւիթին հետ եղող երեք զօրաւորներէն մէկն էր, երբ անոնք պատերազմելու համար հոն հաւաքուած Փղշտացիները նախատեցին ու Իսրայէլի մարդիկը փախան։

¹⁰Ասիկա ելաւ ու Փղշտացիները զարկաւ, մինչեւ որ ձեռքը յոգնեցաւ ու ձեռքը իր սուրին վրայ փակաւ։ Տէրը այն օրը մեծ փրկութիւն ըրաւ ու ժողովուրդը անոր ետեւէն դարձաւ՝ միայն կողոպուտը առնելու համար։

¹¹Անկէ ետքը Արարացի Ագէին որդին Սամման էր։ Փղշտացիները գունդ մը կազմեցին՝ ՝ ու հոն ոսպով լեցուն ագարակ մը կար։ Ժողովուրդը Փղշտացիներուն առջեւէն փախաւ։

¹²Բայց անիկա ագարակին մէջտեղը կեցաւ, զանիկա պաշտպանեց ու Փղշտացիները զարկաւ եւ Տէրը մեծ փրկութիւն ըրաւ։

¹³Երեսուն զօրավարներուն երեքը իջան եւ հունձքի ատեն Ոդողոմին քարայրը՝ Դաւիթին եկան։ Փղշտացիներուն մէկ գունդը Ռափայիններուն հովիտին մէջ բանակեր էր։

¹⁴Այն ատեն Դաւիթ բերդին մէջ էր։ Փղշտացիները Բեթլէհէմի մէջ բերդապահ զօրք ունէին։

¹⁵Դաւիթ փափաքելով՝ ըսաւ. «Բեթլէհէմին դուռը եղող ջրհորէն ո՞վ ինծի ջուր պիտի խմցնէ»։

¹⁶Այն ատեն այս երեք զօրաւորները Փղշտացիներու բանակը ճեղքեցին անցան ու Բեթլէհէմի դուռը եղող ջրհորէն ջուր քաշեցին ու Դաւիթին բերին. բայց անիկա չուզեց անկէ խմել, հապա զանիկա թափելով՝ Տէրոջը նուիրեց

¹⁷Ու ըսաւ. «Ո՛վ Տէր, քա՜ւ լիցի որ ես այս բանը ընեմ. իրենց կեանքը վտանգի մէջ դնելով գացող մարդոց արի՞ւնը խմեմ » ու անկէ խմել չուզեց։ Ասոնք են այն երեք զօրաւոր մարդոց ըրածները։

¹⁸Շարուհեան Յովաբին եղբայրը Աբեսսա այն երեք մարդոց գլխաւորն էր։ Անիկա իր նիզակը երեք հարիւր մարդոց դէմ վերցնելով՝ սպաննեց զանոնք ։ Անիկա երեքին մէջ անուանի էր։

¹⁹Այն ամենէն աւելի համարում ունենալուն համար, անոնց գլուխ եղաւ. բայց առաջին երեքին աստիճանին չհասաւ։

²⁰Մեծ գործեր գործող Կաբեսէելացի զօրաւոր մարդու մը որդիին Յովիադայի որդին Բանիա Մովաբացի Արիէլին երկու որդիները մեռցուց։ Ձիւնի ժամանակ իջաւ ու գուբին մէջ առիւծը մեռցուց։

²¹Ասիկա տեսքով երեւելի Եգիպտացի մարդ մըն ալ մեռցուց։ Եգիպտացիին ձեռքը նիզակ մը կար, բայց Բանիա ցուպով մը անոր վրայ գնաց ու Եգիպտացիին ձեռքէն նիզակը յափշտակեց եւ անոր նիզակովը զայն մեռցուց։

²²Յովիադայի որդին Բանիա այս բաները ըրաւ ու երեք զօրաւորներուն մէջ անուանի եղաւ.

²³Երեսունէն աւելի պատիւ ունէր, բայց առաջին երեքին աստիճանին չհասաւ։ Դաւիթ զանիկա իր ատեանին վերակացու դրաւ։

²⁴Յովաբին եղբայրը Ասայէլ երեսունէն էր. նաեւ Բեթլէհեմացի Դովդայի որդին Ելէանան,

²⁵Հարօդացի Սամմա, Հարօդացի Եղիկա,

²⁶Փելլատացի Քեղղէս. Թեկուացի Եկգեսի որդին Իրաս,

²⁷Անաթովթացի Աբիեզեր, Ովսացի Մեբունայ

²⁸Աքուքացի Սելմօն, Նետոփաթացի Մաարայ,

²⁹Նետոփաթացի Բաանայի որդին Ալաբ, Բենիամինի որդիներուն Գաբաայէն՝ Ռիփայի որդին Եթթի,

³⁰Փարաթոնացի Բանիա, Գաասի ձորերէն Ադդայի,

³¹Արաբաթացի Աբիելբոն, Բարումացի Ազամօթ,

³²Սաղաբինացի Եղիաբա, Յասենի որդիներէն՝ Յովնաթան,

³³Արարացի Սամմա, Արարացի Սարարի որդին Աքիամ,

³⁴Մաքաթիի որդիին Ահասբայի որդին Եղիփաղէտ, Գեղոնացի Աքիտոփէլի որդին Եղիամ,

³⁵Կարմելացի Ասարէ, Արբացի Փաարայ,

³⁶Սուբացի Նաթանի որդին Իգաղ, Գադացի Բանի,

³⁷Ամմոնացի Սելեկ, Շարուհեան Յովաբի կապարճակիրը Բերովթացի Նաարա,

³⁸Յեթերացի Իրաս, Յեթերացի Գարեբ,

³⁹Քետացի Ուրիա. ամէնքը երեսունըեօթն էին։