1 Chronicles 24— WARMB

¹Ահարոնին որդիներուն դասակարգութիւնները ասոնք են. Ահարոնին որդիները՝ Նադաբը, Աբիուդը, Եղիազարն ու Իթամարն էին։

²Նադաբ ու Աբիուդ իրենց հօրմէն առաջ մեռան։ Անոնք որդի չունէին։ Եղիազարը ու Իթամարը քահանայ եղան։

³Դաւիթ ու Եղիազարի որդիներէն Սադովկը ու Իթամարի որդիներէն Աքիմելէքը զանոնք բաժնեցին անոնց համրանքովը անոնց պաշտօնին համար։

⁴Եղիազարին որդիներուն մէջ գտնուած իշխանները Իթամարին որդիներուն մէջ գտնուածներէն շատ էին։ Զանոնք այսպէս բաժնեցին։ Եղիազարին որդիներուն համար տասնըվեց իշխան՝ իրենց ազգատոհմերուն համեմատ ու Իթամարին որդիներուն համար ութը իշխան ՝ իրենց ազգատոհմերուն համեմատ։

⁵Ասոնք ու անոնք ալ վիճակով բաժնուեցան, քանզի սրբարանին իշխաններն ու Աստուծոյ տանը իշխանները Եղիազարին որդիներէն ու Իթամարին որդիներէն էին։

⁶Ղեւտացիներէն՝ Նաթանայէլին որդին Սեմայիա դպիրը, թագաւորին ու իշխաններուն եւ Սադովկ քահանային ու Աբիաթարին որդիին Աքիմելէքին եւ քահանաներուն ու Ղեւտացիներուն նահապետներուն առջեւ մէկ ազգատոհմ Եղիազարէն առնելով ու մէկ ազգատոհմ Իթամարէն առնելով՝ զանոնք գրեց։

⁷Առաջին վիճակը Յովարիբին ելաւ, երկրորդը՝ Յեդայիային,

⁸Երրորդը՝ Հարիմին, չորրորդը՝ Սէուրինին,

⁹Հինգերորդը՝ Մեղքիային, վեցերորդը՝ Միամինին,

¹⁰Եօթներորդը՝ Ակկուսին, ութերորդը՝ Աբիային,

¹¹Իններորդը՝ Յեսուին, տասներորդը՝ Սեքենիային,

¹²Տասնըմէկերորդը՝ Եղիասիբին, տասնըերկրորդը՝ Յակիմին,

¹³Տասնըերրորդը՝ Ոփփային, տասնըչորրորդը՝ Յեսբիաբին,

¹⁴Տասնըհինգերորդը՝ Բեղգային, տասնըվեցերորդը՝ Եմմերին,

¹⁵Տասնըեօթներորդը՝ Եզիրին, տասնըութերորդը՝ Ափեսեսին,

¹⁶Տասնըիններորդը՝ Փեթայիային, քսաներորդը՝ Եզեկիէլին,

¹⁷Քսանըմէկերորդը՝ Յաքինին, քսանըերկրորդը՝ Գամուլին,

¹⁸Քսանըերեքերորդը՝ Դաղայիային, քսանըչորրորդը՝ Մաաղիային։

¹⁹Այս է անոնց կարգադրութիւնը իրենց պաշտամունքին համար ու Տէրոջը տունը մտնելու համար՝ իրենց հօրը Ահարոնին միջոցով իրենց տրուած օրէնքին համեմատ՝ ինչպէս Իսրայէլին Տէր Աստուածը անոր պատուիրեր էր։

²⁰Ղեւիին որդիներուն մնացորդները ասոնք էին. Ամրամին որդիներէն՝ Սուբայէլը, Սուբայէլին որդիներէն՝ Յադայիան,

²¹Հռաբիային, այսինքն Հռաբիային որդիներէն, առաջինը՝ Յեսիան,

²²Իսահառին որդիներէն Սաղօմօթը, Սաղօմօթին որդիներէն Յէթը

²³Ու Քեբրոնին որդիներէն առաջինը ՝ Յերիան, երկրորդը՝ Ամարիան, երրորդը՝ Յազիէլը, չորրորդը՝ Յեկակամը,

²⁴Ոզիէլին որդիներէն՝ Միքան, Միքային որդիներէն՝ Սամիրը,

²⁵Միքային եղբայրը՝ Յեսիան, Յեսիային որդիներէն՝ Զաքարիան,

²⁶Մերարիին որդիները՝ Մոողին ու Մուսին էին. Յազիային որդին Բենովը,

²⁷Մերարիին որդիները՝ Յազիայէ Բենովը, Սօհամը, Զաքուրն ու Եբրին էին։

²⁸Մոողիէն Եղիազարը ծնաւ ու անիկա որդի չունէր։

²⁹Կիսէն, այսինքն Կիսին որդիներէն՝ Յերամէլն էր։

³⁰Մուսիին որդիները՝ Մոողին, Եդերն ու Յերիմովթն էին։ Ղեւտացիներուն որդիները իրենց տոհմերուն համեմատ ասոնք էին։

³¹Ասոնց համար ալ, իրենց եղբայրներուն Ահարոնին որդիներուն պէս, Դաւիթ թագաւորին ու Սադովկի ու Աքիմելէքի եւ քահանաներուն ու Ղեւտացիներուն տոհմապետներուն առջեւ վիճակ ձգեցին, թէ՛ տոհմապետներուն եւ թէ՛ անոնց պզտիկ եղբայրներուն համար։