Psalms 30
1 Դպրապետին։ Սաղմոս Դավթի
2 Քեզ վրա հույս դրեցի, Տե՜ր, թող չամաչեմ հավիտյան. Քո արդարությամբ փրկի՛ր և ապրեցրո՛ւ ինձ։
3 Ի՛նձ խոնարհիր քո ականջը, փութա՛ ինձ փրկելու. Իմ պահապա՛նը եղիր, Աստվա՜ծ, և իմ փրկության ապաստանը,
4 Քանզի դու ես իմ ուժն ու ապավենը։ Քո անվան համար ինձ առաջնորդեցիր և սնեցիր։
5 Եվ ինձ կհանես այն որոգայթից, որն իմ դեմ լարեցին։ Դու ես իմ պաշտպանը, Տե՜ր,
6 Եվ քո ձեռքն եմ հանձնում իմ հոգին։ Փրկեցիր ինձ, Տե՛ր, Աստվա՛ծ, քո ճշմարտությամբ։
7 Ատեցիր նրանց, ովքեր սնոտիաբար են երկյուղում։ Ես Տիրոջ վրա հույս դրեցի.
8 պիտի ցնծամ և ուրախանամ քո տված փրկությամբ։ Նայեցիր իմ խոնարհությանը և փրկեցիր ինձ վշտերից,
9 Ինձ չմատնեցիր նեղիչներիս ձեռքը Եվ ամրացրիր ոտքերս խաղաղության մեջ։
10 Ողորմի՛ր ինձ, Տե՜ր, քանզի ճնշված եմ ես. Սրտմտությունից աչքն իմ խռովվեց, Նաև փորս ու հոգիս։
11 Կյանքս նվազեց ցավերի պատճառով, Իսկ տարիներս՝ հեկեկոցներից։ Իմ զորությունը տկարությունից աղքատացավ, Եվ ոսկորներս փտեցին։
12 Իմ բոլոր թշնամիներից ավելի Ես եղա նախատինք դրացիներիս համար, Իսկ ծանոթներիս՝ մեծ ահ ու երկյուղ։ Բոլոր ինձ տեսնողները հեռու էին փախչում ինձանից,
13 Մոռացվեցի ես, ինչպես մեռյալն է իսպառ մոռացվում սրտից, Դարձա իբրև կորսված անոթ։
14 Քանզի իմ շուրջը գտնվող շատերից բամբասանք լսեցի. Իրար մոտ հավաքված՝ ուզում էին հոգիս առնել։
15 Բայց ես, ո՜վ Տեր, քեզ հուսացի՝ ասելով. «Դու ես իմ Աստվածը,
16 Եվ քո ձեռքում են իմ տարիները»։ Փրկի՛ր ինձ իմ թշնամիների ձեռքից և իմ հալածիչներից։
17 Ցո՛ւյց տուր քո երեսը քո ծառային. Ապրեցրո՛ւ ինձ, Տե՜ր, ըստ քո ողորմության։
18 Տե՜ր, թող չամաչեմ, որ քեզ դիմեցի. Թող ամաչեն ամբարիշտները և իջնեն դժոխք։
19 Թող համրանան նենգ շրթունքները, Որոնք ամբարտավանությամբ և արհամարհանքով Չարախոսում էին արդարին։
20 Ո՜վ Տեր, որքա՜ն շատ է քաղցր ողորմածությունդ, Որ պահեցիր երկյուղածներիդ համար, Եվ բոլորը տեսան, թե ինչպես քո ողորմությունը շնորհեցիր քեզ հուսացողներին։ Քո երեսի ծածկույթով պաշտպանեցիր նրանց
21 Մարդկանց խռովությունից, Քո խորանում թաքցրիր նրանց լեզուների հակառակությունից։
22 Օրհնյա՜լ է Տերը, քանզի նրա ողորմությունը Հրաշքներ գործեց ամուր քաղաքում։
23 Ապշահար եղած ասացի, որ այլևս կտրվեցի քո աչքից, Դրա համար իմ աղոթքի ձայնը լսեցիր, երբ քեզ դիմեցի։
24 Սիրեցե՛ք Տիրոջը, նրա բոլո՛ր սրբեր, Որովհետև Տերը ստուգություն է փնտրում Եվ հատուցում նրանց, ովքեր առավել Ամբարտավանություն են գործում։
25 Քաջալերվե՛ք, և ձեր սրտերը թող զորանան, Բոլո՛րդ, որ հույս եք դրել Տիրոջ վրա։