Bible

1 Սրանք են կայանները Իսրայելի որդիների, որոնք Մովսեսի և Ահարոնի գլխավորությամբ իրենց զորքով դուրս ելան Եգիպտոսից։ 2 Մովսեսը Տիրոջ հրամանով գրի առավ Իսրայելի որդիների երթն ու նրանց կայանները։ Սրանք են նրանց երթի կայանները։ 3 Իսրայելի որդիները Ռամեսեից ճանապարհ ընկան առաջին ամսի տասնհինգերորդ օրը։ Զատկի հաջորդ օրը նրանք, բոլոր եգիպտացիների աչքի առջև, Աստծու հզոր պաշտպանությամբ ելան Եգիպտոսից, 4 երբ եգիպտացիները թաղում էին իրենց մեռելներին, որոնց կոտորել էր Տերը՝ եգիպտացիների երկրի բոլոր անդրանիկներին։ Տերը նրանցից վրեժ էր լուծել իրենց աստվածների համար։ 5 Իսրայելի որդիները, Ռամեսեից մեկնելով, բանակեցին Սոկքովթում։ 6 Սոկքովթից մեկնելով՝ բանակեցին Բութանում, որն անապատի մի մասն է։ 7 Բութանից մեկնելով՝ բանակեցին Եիրովթի մոտ, որը գտնվում է Բեեղսեպփովնի դիմաց, և բանակեցին Մագդովղի դիմաց։ 8 Եիրովթից մեկնեցին և ծովի միջով անցան դեպի անապատ, անապատի միջով երեք օրվա ճանապարհ կտրեցին և բանակեցին Դառն աղբյուրների մոտ։ 9 Մեկնեցին Դառն աղբյուրների մոտից և եկան Եղիմ։ Եղիմում ջրի տասներկու աղբյուր կար և արմավի յոթանասուն ծառ։ Նրանք բանակեցին այնտեղ՝ ջրի մոտ։ 10 Մեկնեցին Եղիմից և բանակեցին Կարմիր ծովի ափին։ 11 Մեկնեցին Կարմիր ծովից և բանակեցին Սին անապատում։ 12 Մեկնեցին Սին անապատից և բանակեցին Ռափայում։ 13 Մեկնեցին Ռափայից և բանակեցին Եղուսում։ 14 Մեկնեցին Եղուսից և բանակեցին Ռափիդինում։ Այստեղ ժողովուրդը խմելու ջուր չուներ, 15 ուստի մեկնեցին Ռափիդինից և բանակեցին Սինայի անապատում։ 16 Մեկնեցին Սինայի անապատից և բանակեցին Ցանկության գերեզմաններում։ 17 Մեկնեցին Ցանկության գերեզմաններից և բանակեցին Ասերովթում։ 18 Մեկնեցին Ասերովթից և բանակեցին Ռաթամայում։ 19 Մեկնեցին Ռաթամայից և բանակեցին Ռեմովն Փարեսում։ 20 Մեկնեցին Ռեմովն Փարեսից և բանակեցին Ղեմոնայում։ 21 Մեկնեցին Ղեմոնայից և բանակեցին Դեսսայում։ 22 Մեկնեցին Դեսսայից և բանակեցին Մակեղղաթում։ 23 Մեկնեցին Մակեղղաթից և բանակեցին Սոփարում։ 24 Մեկնեցին Սոփարից և բանակեցին Քարադաթում։ 25 Մեկնեցին Քարադաթից և բանակեցին Մակեղովթում։ 26 Մեկնեցին Մակեղովթից և բանակեցին Կատաաթում։ 27 Մեկնեցին Կատաաթից և բանակեցին Տարաթում։ 28 Մեկնեցին Տարաթից և բանակեցին Մատեկկայում։ 29 Մեկնեցին Մատեկկայից և բանակեցին Սելմովնայում։ 30 Մեկնեցին Սելմովնայից և բանակեցին Մասուրութում։ 31 Մեկնեցին Մասուրութից և բանակեցին Բանեայում։ 32 Մեկնեցին Բանեայից և բանակեցին Գադգադ լեռան վրա։ 33 Մեկնեցին Գադգադ լեռից և բանակեցին Ետեբաթայում։ 34 Մեկնեցին Ետեբաթայից և բանակեցին Եբրոնայում։ 35 Մեկնեցին Եբրոնայից և բանակեցին Գեսիովն Գաբերում։ 36 Մեկնեցին Գեսիովն Գաբերից և բանակեցին Սին անապատում։ Մեկնեցին Սին անապատից և բանակեցին Փառանի անապատում, այսինքն՝ Կադեսում։ 37 Մեկնեցին Կադեսից և բանակեցին Հովր լեռան վրա՝ Եդովմի երկրի մոտ։ 38 Ահարոն քահանան Տիրոջ հրամանով բարձրացավ լեռը և մեռավ այնտեղ եգիպտացիների երկրից Իսրայելի որդիների դուրս գալու քառասուներորդ տարվա հինգերորդ ամսի առաջին օրը։ 39 Ահարոնը հարյուր քսաներեք տարեկան էր, երբ մեռավ Հովր լեռան վրա։ 40 Քանանացիների երկրում բնակվող Արադի արքա Քանանեսը տեղեկացավ, որ Իսրայելի որդիները մուտք են գործում իր երկիրը, պատերազմեց Իսրայելի դեմ և նրանցից գերի վերցրեց։ 41 Իսրայելի որդիները, Հովր լեռից մեկնելով, բանակեցին Սելմովնայում։ 42 Մեկնեցին Սելմովնայից և բանակեցին Փենովում։ 43 Մեկնեցին Փենովից և բանակեցին Ովբովթում։ 44 Մեկնեցին Ովբովթից և բանակեցին Գայիում՝ Հորդանան գետի այն կողմը, Մովաբի սահմաններում։ 45 Մեկնեցին Գայիից և բանակեցին Դեբովն Գադում։ 46 Մեկնեցին Դեբովն Գադից և բանակեցին Գեղմովն Դեբղաթեմում։ 47 Մեկնեցին Գեղմովն Դեբղաթեմից և բանակեցին Աբարիմ լեռների վրա՝ Նաբավի դիմաց։ 48 Մեկնեցին Աբարիմի լեռներից և բանակեցին մովաբացիների երկրի արևմտյան կողմում՝ Հորդանան գետի մոտ, Երիքովի դիմաց։ 49 Նրանք բանակեցին Հորդանան գետի մոտ՝ Եսիմովթի և Մեղսատովի միջև, մովաբացիների երկրի արևմտյան կողմում։ 50 Տերը Մովաբի արևմտյան մասում՝ Հորդանան գետի մոտ, Երիքովի դիմաց, խոսեց Մովսեսի հետ և ասաց. 51 «Դիմի՛ր Իսրայելի որդիներին և ասա՛ նրանց. “Ահա դուք Հորդանանով անցնում եք դեպի քանանացիների երկիրը։ 52 Երկրի բոլոր բնակիչներին կոչնչացնեք ձեր առջևից, կկործանեք նրանց պատկերազարդ կոթողները, կոչնչացնեք նրանց ձուլածո բոլոր կուռքերը, նրանց բոլոր հուշասյուները կվերացնեք մեջտեղից։ 53 Կոչնչացնեք երկրի բնակիչներին և կբնակվեք այնտեղ, որովհետև նրանց երկիրը ձեզ եմ տվել իբրև ժառանգություն։ 54 Ըստ ձեր ցեղերի՝ բազմանդամներին մեծ բաժին կհատկացնեք, իսկ սակավանդամներին՝ փոքր բաժին։ Յուրաքանչյուր ցեղ թող ստանա այն, ինչ վիճակ կելնի նրա անվանը։ Բաժանումը պետք է կատարվի ըստ ձեր նահապետական ցեղերի։ 55 Եթե երկրի բնակիչներին չոչնչացնեք, ձեր կենդանի թողածները փուշ կլինեն ձեր աչքերին և նետեր՝ ձեր կողերին։ Նրանք ձեր թշնամիները կլինեն այն երկրում, որտեղ դուք եք բնակվում։ 56 Եվ ինչ մտադրվել էի անել նրանց նկատմամբ, կանեմ ձեր նկատմամբ”»։