Bible

1 Մինչ Եզրասը, երեսնիվայր ընկած գետնին՝ Տիրոջ առջև, աղոթում էր այս խոստովանություններով և մեծամեծ ողբերով, նրա մոտ հավաքվեց բազում ժողովուրդ, ամեն ոք, որ Երուսաղեմում էր՝ այր և կին, երիտասարդ ու կույս, և ժողովուրդը ողբաց ու բարձրացրեց իր լացի ձայնը։ 2 Եղամի որդի Եղեայի որդի Հեքոնիան պատասխան տվեց և ասաց Եզրասին. «Մենք մեղանչեցինք Տիրոջ՝ մեր Աստծու առաջ և այս երկրի այլազգիներից կին առանք, և այսօր այս անօրենություններն Իսրայելի մեջ են։ 3 Արդ, եկեք Տիրոջ՝ մեր Աստծու առջև ուխտենք հեռացնել մեզանից բոլոր այլազգի կանանց և նրանց զավակներին, ինչպես որ դու ես կամենում։ Վե՛ր կաց և փրկի՛ր սրանց Տիրոջ՝ Աստծու պատվիրաններով, և թող լինի, ինչպես օրենքն է հրամայում։ 4 Վե՛ր կաց, և ինչ լսենք քո բերանից, համաձայն կլինենք։ Զորացի՛ր և արա՛ այնպես, ինչպես որ հրամայված է Տիրոջ՝ Աստծու կողմից»։ 5 Եզրասը, վեր կենալով, երդվեցրեց քահանաների և ղևտացիների ցեղերի առաջնորդներին և ողջ Իսրայելին, որ կվարվեն այս երդումի համաձայն։ 6 Ապա Եզրասը, ելնելով Աստծու տնից, գնաց գանձատուն՝ Եղիսուբի որդի Հոհանի մոտ. հաց չկերավ և ջուր չխմեց, այլ ողբում էր բազմության անօրենությունների և մեծամեծ մեղքերի վրա։ 7 Ողջ Հուդայի երկրում ու Երուսաղեմում հայտարարում էին. 8 «Ամեն ոք, որ երեք օրվա ընթացքում Երուսաղեմ չգա, ըստ իշխանների ու ծերերի հրամանի, նրա ողջ ունեցվածքը կառգրավվի, իսկ ինքը կհեռացվի Իսրայելի ժողովրդի համայնքից»։ 9 Երեք օրվա ընթացքում Հուդայի և Բենիամինի բոլոր այրերը հավաքվեցին Երուսաղեմ իններորդ ամսվա քսանին և նստեցին Տիրոջ տան հրապարակում՝ դողալով նրա խոսքերից և ձմռան ցուրտից։ 10 Եզրասը ոտքի կանգնելով նրանց ասաց. «Դուք մեղանչեցիք և այլազգիների դուստրերին կնության առաք՝ մեղքեր և անօրենություններ ավելացնելով Իսրայելի վրա։ 11 Արդ, օրհնությո՛ւն մատուցեք Տիրոջը՝ մեր հայրերի Աստծուն, և հաճելի՛ն կատարեք նրա առջև. բաժանվե՛ք երկրի բոլոր հեթանոսներից և այլազգի այն կանանցից, որ առել եք»։ 12 Ողջ համայնքը պատասխան տվեց և ասաց. «Շատ մեծ է այն պահանջը, որ դու դնում ես մեզ վրա։ 13 Մենք շատ ենք, իսկ եղանակը ձմեռային է, ուստի չենք կարող դրսում կանգնել, իսկ այդ մեկ կամ երկու օրվա գործ չէ, որովհետև այս հարցում ծանր ենք մեղանչել։ 14 Թող բոլոր վայրերում և քաղաքներում իշխաններ նշանակվեն և նրանք, որ օտար կին ունեն, թող գան այն ժամանակ, երբ յուրաքանչյուր քաղաքում ծերերն ու տոհմապետերը կնշանակեն, որպեսզի դատելով քավեն մեզանից այդ մեղքը և մեզանից հեռացնեն այս բանի պատճառով մեզ վրա եկած Աստծու բարկությունը»։ 15 16 Գերությունից վերադարձողներն այսպես վարվեցին. Եզրասն ընտրեց անվանի մարդիկ՝ տոհմերի իշխաններ ըստ նահապետական տների, որոնք տասներորդ ամսի ամսամուտին հավաքվեցին հարցը քննելու 17 և մինչև առաջին ամսի սկիզբը զատեցին բոլոր այն այրերին, որ այլազգի կին ունեին։ 18 Եվ գտան քահանաների որդիներից, որ այլազգի կին ունեին. Հովսեդեկի որդի Հեսուի որդիներից և նրա եղբայրներից՝ Մանասեն, Եղիազարը, Հարիբը և Գադաղիան։ 19 Նրանք սկսեցին արձակել իրենցից այլազգի կանանց, և յուրաքանչյուրը մի խոյ մատուցեց անգիտակից մեղքի թողության համար։ 20 Եմմերի որդիներից Անանին և Զաբդիան։ 21 Երամի որդիներից այլազգի կին ունեին Մասիսը, Եղիան, Սամարիան, Հեիլն ու Ոզիան։ 22 Փասուրի որդիներից՝ Եղիանասը, Մասիելը, Իսմայելը, Նաթանայելը, Հովզաբաթը և Եղասան։ 23 Եվ ղևտացիների որդիներից՝ Հևզաբաթը, Սամութը, Կովղիան, այսինքն՝ Կովղիտոսը, Ափեթիասը, Հուդասը և Եղիազարը։ 24 Եվ սաղմոսերգուներից՝ Եղիսափը։ Եվ դռնապաններից՝ Կողեմը, Էտեղեսը և Ուրին։ 25 Եվ Իսրայելից. Փորոսի որդիներից՝ Հռամայիան, Հավիան, Մեղքիան, Էակիմը, Եղիազարը, Ասաբիան, Նիբանիան։ 26 Եղամի որդիներից՝ Մատտաթանիան, Զաքարիան, Հավեղը, Աբդիան, Երիմովթը և Եղիան։ 27 Զաթուայի որդիներից՝ Եղիոնեն, Եղիսաբը, Մատթանան, Հարմովթը, Զաբադը, Զազիան։ 28 Բաբեի որդիներից՝ Հոհանը, Անանին, Զաբուն և Աթաղին։ 29 Բանի որդիներից՝ Մոսողամը, Մաղաքը, Ադիասը, Իասուբը, Սաաղը և Հռեմովթը։ 30 Փաաթ Մովաբի որդիներից՝ Ադնեն, Քաղելը, Բանայիան, Մասեան, Մատթան, Բեսեելը և Մանասեն։ 31 Երամի որդիներից՝ Եղիեզին, Եսիան, Մեղքիան, Սամեասը, Սիմեոնը, 32 Բենիամինը, Մաղուքը և Սամարիան։ 33 Ասեմի որդիներից՝ Մատթանիան, Մատաթիան, Զարաթը, Եղիփաղեթը, Հերեմին, Մանասեն և Սամեին։ 34 Բանի որդիներից՝ Մովադիան, Ամրամը, Ուելը, 35 Բանեան, Բադաիան, Քեղիան, 36 Ուանիան, Մարիովթը, Եղիասիբը, 37 Մաթանիան և Մաթանան։ Նույնը արեցին նաև 38 Բանի որդիներն ու Սեմեիի որդիները՝ 39 Սեղեմիասը, Նաթանը, Ադազիասը, 40 Մաքնադաբուն, Սեսեն, Սարուն, 41 Եզրիելը, Սաղամիասը, Սամարիասը, 42 Սեղումը, Ատարիասը և Հովսեփը։ 43 Աբուրեի որդիներից՝ Իեուելը, Մատաթիասը, Զաբաթը, Զեբիննասը, Հադային, Հադեն, Հովեդը և Բանայիան։ 44 Սրանք էին այն բոլորը, որ այլազգի կին ունեին, և նրանցից ուստրեր ու դուստրեր ունեցան։