Deuteronomy 22
1 «Չլինի թե ճանապարհին տեսնես քո եղբոր մոլորված արջառը կամ ոչխարը և անտես անես դրանք. անպատճառ պետք է վերադարձնես դրանք ու բերես քո եղբոր մոտ։
2 Եթե քո եղբայրը քեզ մոտիկ վայրում չի ապրում, կամ դու չես ճանաչում նրան, ապա դրանք կբերես քո տունը. դրանք թող մնան քեզ մոտ, մինչև որ քո եղբայրը փնտրի դրանք, ու դու վերադարձնես նրան։
3 Նույն կերպ կվարվես նրա էշի հետ, նույն կերպ կվարվես նրա հանդերձների հետ, նույն կերպ կվարվես քո եղբոր կորցրած բոլոր իրերի հետ։ Եթե նա ինչ-որ բան կորցնի, ու դու գտնես, չհանդգնես անուշադրության մատնել այն։
4 Երբ կտեսնես, որ քո եղբոր էշը կամ եզը ընկած է ճանապարհին, ապա դրանց կողքով անտարբեր չանցնես, այլ կօգնես նրան՝ այն ոտքի հանելու։
5 Կինը տղամարդու հագուստ չպետք է հագնի, իսկ տղամարդն էլ կանացի զգեստ չպետք է հագնի, որովհետև նա, ով անում է այդ բանը, պիղծ է Տիրոջ՝ քո Աստծու առջև։
6 Եթե քո ճանապարհին հանդիպես թռչունի բույնի, ծառի վրա լինի, թե գետնի, և մայրը թուխս նստած տաքացնելիս լինի ձագերին կամ ձվերը, ապա մորը ձագերի հետ չվերցնես.
7 ազատ կարձակես մորը և միայն ձագերին կվերցնես քեզ, որպեսզի բարիքի արժանանաս և այդ երկրի վրա երկարակյաց լինես։
8 Նոր տուն կառուցելիս բազրիք կշինես տանիքի շուրջը, որպեսզի եթե մեկն այնտեղից ընկնի, դու քո տան մեջ սպանություն գործած չլինես։
9 Խաղողի այգուդ մեջ այլ սերմեր չցանես, այլապես թե՛ այգու բերքը, թե՛ սերմի բերքը կպատկանեն Տիրոջը։
10 Վար անելիս էշն ու եզը միասին չլծես։
11 Տարբեր նյութերից՝ բրդից ու վուշից միասին գործված հագուստ չհագնես։
12 Ինչ էլ որ հագնես, քո հագած հագուստի չորս կողմերի վրա մանվածո ծոպեր կդնես»։
13 «Եթե մեկը կին առնի՝ ամուսնանա նրա հետ, բայց ատի նրան,
14 նրան բամբասելով՝ մեղքեր բարդի նրա վրա, նրա անունը վարկաբեկելով՝ ասի՝ “Այս կնոջ հետ ամուսնացա, բայց երբ մերձեցա, նրան կույս չգտա”,
15 կնոջ հայրն ու մայրը, իրենց դստերն առնելով, դստեր կուսության նշանը թող ցուցադրեն ատյանում՝ ծերերի առջև։
16 Կնոջ հայրը թող ասի ծերերին. “Իմ այս դստերը կնության տվեցի այս մարդուն, և նրան ատելով՝
17 սա բամբասում է ու զրպարտում, թե՝ “Քո դստերը կույս չգտա”։ Ահա իմ դստեր կուսության նշանները”։ Այն ժամանակ այդ քաղաքի ծերերի առջև թող բացեն լաթը։
18 Այդ քաղաքի ծերերը թող կանչեն ու հանդիմանեն այդ մարդուն։
19 Նրանից թող գանձեն հարյուր սիկղ, հանձնեն կնոջ հորը այն բանի դիմաց, որ նա վարկաբեկել է իսրայելացի կույսի անունը։ Նա թող մնա նրա կինը, և տղամարդը երբեք չհամարձակվի արձակել նրան։
20 Իսկ եթե ճիշտ լինի նրա ասածը, և աղջկա կուսության ապացույց չգտնեն,
21 ապա աղջկան թող բերեն իր հոր դուռը, և քաղաքի բնակիչները քարկոծելով թող սպանեն նրան, որովհետև Իսրայելի որդիների մեջ անպատիվ գործ է արել. պոռնկացել է իր հոր տանը։ Դրանով ձեր միջից չարը վերացրած կլինեք։
22 Եթե գտնվի մի տղամարդ, որ շնանում է ամուսնացած կնոջ հետ, կսպանեք երկուսին էլ՝ կնոջ հետ շնացող տղամարդուն ու այդ կնոջը. դրանով Իսրայելի միջից չարը վերացրած կլինեք։
23 Եթե քաղաքում մի տղամարդ հանդիպի նշանված կույս աղջկա և պառկի նրա հետ,
24 ապա երկուսին էլ կբերեք իրենց քաղաքի մուտքի մոտ և քարկոծելով կսպանեք նրանց. աղջկան կսպանեք, որովհետև քաղաքում լինելով՝ օգնության չի կանչել, իսկ տղամարդուն՝ այն բանի համար, որ բռնաբարել է իր մերձավորի նշանածին։ Դրանով դուք չարը վերացրած կլինեք ձեր միջից։
25 Իսկ եթե տղամարդը դաշտում հանդիպի նշանված մի աղջկա և բռնությամբ պառկի նրա հետ, ապա կսպանեք աղջկան բռնաբարած տղամարդուն,
26 իսկ աղջկան ոչինչ չեք անի, քանի որ աղջիկը մահվան արժանի բան չի արել. սա նման է այն դեպքին, երբ մեկի վրա հարձակվում են ու սպանում նրան։
27 Նա դաշտի մեջ է հանդիպել նրան, նշանված աղջիկը դիմադրել է, և ոչ ոք չի եղել, որ օգներ նրան։
28 Եթե մեկը չնշանված կույս աղջկա հանդիպի ու բռնությամբ պառկի նրա հետ,
29 ապա աղջկան բռնաբարող տղամարդը աղջկա հորը պետք է տա հիսուն երկդրամյա արծաթ, իսկ աղջիկը պետք է դառնա նրա կինը։ Տղամարդը երբեք չպետք է հանդգնի արձակել նրան։