Revelation 1
1 Ասիկա այն յայտնութիւնն է, որ Յիսուս Քրիստոս կատարեց։ Աստուած այս յայտնութիւնը տուաւ Քրիստոսի, որպէսզի ան իր ծառաներուն ցոյց տայ՝ թէ ի՛նչ պիտի պատահի շուտով։ Քրիստոս ասիկա իր հրեշտակին միջոցաւ յայտնեց իր ծառային՝ Յովհաննէսի,
2 որ վկայեց իր տեսած բոլոր բաներուն մասին։ Այս վկայութիւնը ձեզի կը բերէ Աստուծոյ խօսքը եւ Յիսուս Քրիստոսի տուած վկայութիւնը։
3 Երանի՜ անոր որ կը կարդայ ինչ որ այս գիրքին մէջ գրուած է, եւ երանի՜ անոնց որոնք կը լսեն ու կը պահեն այս մարգարէութեան պատգամները, որովհետեւ ժամանակը մօտեցած է։
4 Յովհաննէսէն՝ Ասիա նահանգին մէջ գտնուող եօթը եկեղեցիներուն.– Շնորհք եւ խաղաղութիւն ձեզի անկէ՝ որ է, որ էր եւ որ պիտի գայ, եւ եօթը հոգիներէն, որոնք Աստուծոյ գահին դիմաց են,
5 եւ Յիսուս Քրիստոսէն՝ հաւատարիմ վկայէն, որ մեռելներէն յարութիւն առնողներուն առաջինն է եւ երկրի թագաւորութիւններուն Իշխանը։ Անիկա մեզ սիրեց եւ իր արիւնով մեր մեղքերուն շղթաները փշրեց,
6 ու մեզ ըրաւ քահանաներու թագաւորութիւն մը, ծառայելու Աստուծոյ՝ իր Հօր։ Փառք ու զօրութի՜ւն իրեն յաւիտեանս յաւիտենից. ամէն ։
7 Ահա անիկա կու գայ ամպերու վրայ։ Ամէն մարդ պիտի տեսնէ զայն, նաեւ անոնք՝ որոնք խոցեցին զինք։ Երկրի բոլոր ժողովուրդները պիտի ողբան անոր վրայ։ Այո՛, թող այդպէս ըլլայ.
8 «Ես եմ Այբը եւ ես եմ Ֆէն», այսինքն՝ Սկիզբն ու Վախճանը, կ՚ըսէ Տէր Աստուած, ան՝ որ է, որ էր եւ որ պիտի գայ, ինք՝ Ամենակալը։
9 Ես, Յովհաննէս, ձեր եղբայրն եմ եւ Յիսուս Քրիստոսի միացած ըլլալով՝ մասնակից եմ ձեր նեղութեան, արքայութեան, յոյսին եւ համբերութեան։ Աստուծոյ խօսքին եւ Յիսուս Քրիստոսի վկայելուս համար՝ Պատմոս կոչուած կղզին աքսորուած էի։
10 Եւ ահա Կիրակի օր մը, Սուրբ Հոգիով լեցուեցայ եւ ետեւէս փողի հնչիւնի նման զօրաւոր ձայն մը լսեցի,
11 որ ինծի կ՚ըսէր. –Գիրքի մը մէջ գրի՛ առ ինչ որ կը տեսնես, եւ գիրքը ղրկէ եօթը եկեղեցիներուն, որոնք կը գտնուին Եփեսոսի, Զմիռնիայի, Պերգամոնի, Թիատիրի, Սարդիկէի, Ֆիլատելֆիայի եւ Լաւոդիկիայի մէջ։
12 Ետեւ դարձայ՝ տեսնելու համար թէ ո՛վ էր հետս խօսողը, եւ տեսայ եօթը ոսկի ճրագարաններ։
13 Այդ եօթը ճրագարաններուն միջեւ Մարդու Որդիին նմանող մէկը տեսայ, որ երկար պատմուճան հագած էր եւ կուրծքին՝ ոսկի գօտի կապած։
14 Անոր գլխուն մազերը բուրդի պէս ճերմակ էին, սպիտակ՝ ձիւնի պէս, աչքերը՝ կրակի բոցի պէս,
15 անոր ոտքերը բոցավառ հնոցէն ելած հրաշէկ անագապղինձի կը նմանէին, եւ ձայնը՝ առատահոս ջուրերու շառաչին։
16 Անիկա իր աջ ձեռքին մէջ բռնած էր եօթը աստղեր, եւ անոր բերանէն կ՚ելլէր սրուած երկսայրի սուր մը։ Անոր դէմքը կէսօրուան արեւուն նման կը փայլէր։
17 Երբ զայն տեսայ, մեռելի նման ինկայ անոր ոտքերուն առջեւ։ Անիկա իր աջ ձեռքը դրաւ վրաս եւ ըսաւ. –Մի՛ վախնար։ Ես եմ Սկիզբը եւ ես եմ Վախճանը։
18 Ես եմ կենդանի եղողը եւ ես եմ որ մեռայ եւ ահաւասիկ կենդանի եմ յաւիտեանս յաւիտենից։ Մահուան ու դժոխքի բանալիները իմ ձեռքս են։
19 Ուրեմն գրէ՛ ինչ որ կը տեսնես, ինչ որ հիմա կը պատահի եւ ինչ որ այսուհետեւ պատահելիք է։
20 Եօթը աստղերուն, որ կը տեսնես աջ ձեռքիս մէջ, եւ եօթը ոսկի ճրագարաններուն իմաստը հետեւեալն է.– Եօթը աստղերը եօթը եկեղեցիներուն հրեշտակներն են, իսկ եօթը ճրագարանները՝ եօթը եկեղեցիները։