1Արդ, եթէ երբեք Քրիստոսի միացած ըլլալը մխիթարութիւն է, եթէ իր սէրը կը սփոփէ, եթէ Սուրբ Հոգին մարդիկը իրարու հաղորդակից կ՚ընէ՝ զանոնք իրարու հանդէպ գթած ու ողորմած դարձնելով,
2ուրախութիւնս կատարեալ ըրէք՝ միաբանելով, նոյն սէրը ունենալով իրարու հանդէպ, եւ համերաշխ ու համախորհուրդ ըլլալով։
3Մի՛ ընէք ոեւէ բան որ հակառակասիրութենէ կամ փառասիրութենէ մղուած ըլլայ. այլ՝ խոնարհ ոգիով՝ ձեր ընկերները աւելի լաւ համարեցէք քան դուք ձեզ։
4Միայն դուք ձեզ մի՛ մտածէք, այլ նաեւ՝ ձեր ընկերոջ մասին։
5Ձեզմէ իւրաքանչիւրը թող իր եւ ուրիշներուն մասին խորհի այն՝ ինչ որ կը տեսնէ Քրիստոս Յիսուսի մէջ,
6որ թէպէտ բնութեամբ Աստուած էր, եւ Աստուծոյ հաւասար ըլլալը հռչակելը իրեն համար Աստուծոյ պատիւը յափշտակել չէր նշանակեր,
7բայց կամաւորաբար ինքզինքը այդ պատիւէն մերկացուց՝ ծառայական մեր բնութիւնը իր վրայ առնելով, եւ մարդոց պէս եղաւ ու մարդկային կերպարանքով ճանչցուեցաւ։
8Ինքզինքը խոնարհեցուց եւ Աստուծոյ հնազանդեցաւ՝ յանձն առնելով մահը, եւ այն ալ՝ խաչի մահը։
9Ատոր համար ալ Աստուած զայն շատ աւելի բարձրացուց եւ իրեն տուաւ այն անունը, որ վեր է բոլոր անուններէն.
10որպէսզի Յիսուսի անունին ծունկի գան բոլորը, երկնաւորներն ու երկրաւորները եւ սանդարամետականները,
11եւ ամէն լեզու դաւանի թէ Յիսուս Քրիստոս « Տէր » է, Հայրն Աստուածը փառաւորելու համար։
12Հետեւաբար, սիրելինե՛րս, դուք՝ որ ձեր մէջ ներկայ եղած ատենս միշտ հնազանդ եղաք ինծի, հիմա որ ձեզմէ հեռու եմ՝ աւելի չափով հնազանդ եղէք եւ երկիւղած բարեպաշտութեամբ ձեր փրկութեան համար աշխատեցէք։
13Որովհետեւ Աստուած ի՛նք է որ կը ներգործէ ինչ որ կը կամենաք ու կը կատարէք, որպէսզի իր կամքին համաձայն շարժիք։
14Ինչ որ կ՚ընէք՝ առանց տրտունջքի կամ առարկութեան ըրէք,
15որպէսզի անմեղադրելի եւ անարատ ըլլաք, Աստուծոյ իսկական որդիներ, որոնք անբիծ վարքով կ՚ապրին ապականած եւ այլասերած մարդկութեան մը մէջ։ Անոնց մէջ եղէք աստղերու պէս՝ որոնք կը փայլին երկնակամարին վրայ,
16կեանքի պատգամը ամուր պահելով, ինչ որ իմ պարծանքս պիտի ըլլայ Քրիստոսի դատաստանին օրը, թէ զուր տեղը չվազեցի եւ զուր տեղը չաշխատեցայ։
17Հիմա նոյնիսկ եթէ կեանքս տամ ձեր հաւատքին համար, որ դուք իբրեւ զոհ Աստուծոյ կ՚ընծայէք, գոհ եմ եւ բոլորիդ ուրախութեան մասնակից։
18Դուք ալ նոյնպէս գոհունակ եղէք եւ մասնակից եղէք իմ ուրախութեանս։
19Կ՚ուզէի ձեր լուրերը ունենալ, որպէսզի իմ ալ սիրտս հանգիստ ըլլայ։ Ահա թէ ինչու, եթէ Տէր Յիսուս կամենայ, կը յուսամ շուտով Տիմոթէոսը ղրկել ձեր մօտ,
20որովհետեւ միակ սրտակիցս է, որ հարազատի պէս կը մտահոգուի ձեզմով։
21Միւս բոլորը իրենք իրենց գործերով մտահոգ են եւ ո՛չ թէ Յիսուս Քրիստոսի գործով։
22Դո՛ւք ալ գիտէք իր հաւատարմութիւնը, որովհետեւ ինչպէս զաւակ մը պիտի օգնէր իր հօր՝ այնպէս հետս աշխատեցաւ Աւետարանին համար։
23Ուստի, հազիւ կացութիւնս յստականայ՝ կը յուսամ ղրկել զինք։
24Բայց Տիրոջմով կը յուսամ որ շուտով ես ալ անձամբ կու գամ ձեր մօտ։
25Անհրաժեշտ նկատեցի ձեզի ղրկել մեր եղբայրը՝ Եպաֆրոդիտոսը, որ դուք ղրկած էիք՝ կարիքներս հոգալու համար, եւ որ Քրիստոսի Աւետարանին համար աշխատեցաւ ու պայքարեցաւ իմ կողքիս։
26Ինքն ալ շատ կարօտցած է ձեզ բոլորդ, եւ կը մտահոգուէր, քանի որ լսեր էիք իր հիւանդութեան մասին։
27Եւ իրապէս ալ, մահամերձ ըլլալու աստիճան հիւանդացած էր, բայց Աստուած ողորմեցաւ իրեն. եւ ո՛չ միայն իրեն, այլ ինծի ալ ողորմեցաւ Աստուած, որպէսզի տրտմութեանս վրայ նոր տրտմութիւն չունենամ։
28Ահա թէ ինչու՝ փութով ղրկեցի զինք, որպէսզի զինք վերստին տեսնելով ուրախանաք եւ իմ ալ տրտմութիւնս փարատի։
29Ուստի Տիրոջմով ընդունեցէք զայն ամենայն ուրախութեամբ, եւ պատուեցէ՛ք այնպիսիները,
30որովհետեւ Տիրոջ գործին համար կեանքը վտանգի ենթարկեց եւ մինչեւ մահուան դուռը հասաւ, որպէսզի ձեր տեղը ի՛նք հոգայ կարիքներս։