Bible

1 Եւ Յիսուս աւելցուց. - Վստահ եղէք, որ հոս գտնուողներէն ոմանք պիտի չմեռնին, մինչեւ տեսնեն Աստուծոյ թագաւորութիւնը, որ զօրութեամբ պիտի գայ։ 2 Վեց օր ետք՝ Յիսուս իր հետ առաւ Պետրոսը, Յակոբոսը եւ Յովհաննէսը եւ զանոնք բարձր լեռ մը հանեց, ուր առանձին էին։ Հոն այլակերպեցաւ անոնց առջեւ. 3 հագուստները փայլուն, ձիւնի պէս ճերմակ եղան, այնքան՝ որ աշխարհի վրայ ո՛չ մէկ թափիչ կրնար այդպէս ճերմակ դարձնել։ 4 Եւ անոնց երեւցաւ Եղիան, Մովսէսի հետ միասին, որոնք Յիսուսի հետ կը խօսէին։ 5 Պետրոս ըսաւ Յիսուսի. – Վարդապե՛տ, լաւէոր հոս մնանք. երեք վրաններ շինենք՝ մէկը քեզի, մէկը Մովսէսի եւ միւսը Եղիայի համար։ 6 Անոնք ա՛յնքան վախցած էին, որ Պետրոս չէր գիտեր թէ ինչ կ՚ըսէր։ 7 Ամպ մը ծածկեց զիրենք, եւ ամպին մէջէն լսուեցաւ ձայն մը, որ կ՚ըսէր. –Ասիկա է իմ սիրելի Որդիս. անոր մտիկ ըրէք։ 8 Անոնք յանկարծ չորս կողմ նայեցան, բայց Յիսուսէ զատ ոչ ոք տեսան իրենց հետ։ 9 Եւ մինչ լեռնէն վար կ՚իջնէին, Յիսուս անոնց պատուիրեց որ իրենց տեսածին մասին ոեւէ մէկուն բան չըսեն, մինչեւ որ Մարդու Որդին մեռելներէն յարութիւն առնէ։ 10 Անոնք Յիսուսի այս պատուէրը մտքի մէջ պահեցին, բայց իրարու հարց կու տային թէ ի՛նչ կը նշանակէ «մեռելներէն յարութիւն առնել»։ 11 Եւ հարցուցին Յիսուսի. – Ինչո՞ւ Օրէնքի ուսուցիչները կ՚ըսեն՝ թէ նախ Եղիան պէտք է գայ։ 12 Անիկա պատասխանեց. – Ճիշդ է, որ նախ Եղիան գալով ամէն ինչ կարգի պիտի դնէ։ Սակայն եւ այնպէս՝ ինչո՞ւ Սուրբ գիրքերը կ՚ըսեն թէ Մարդու Որդին շատ պիտի չարչարուի եւ անարգուի։ 13 Բայց կ՚ըսեմ ձեզի, թէ Եղիան արդէն իսկ եկած է, եւ մարդիկ անոր հետ իրենց ուզածին պէս վարուեցան, ինչպէս որ Սուրբ գիրքերուն մէջ անոր մասին գրուած է։ 14 Երբ միւս աշակերտներուն քով եկան, տեսան որ բազմութիւն մը անոնց շուրջ հաւաքուած էր եւ Օրէնքի ուսուցիչներ կը վիճաբանէին անոնց հետ։ 15 Ամբողջ ժողովուրդը հազիւ զինք տեսած՝ զարմացաւ եւ իր քով վազեց ողջունելու համար զինք։ 16 Յիսուս հարցուց իր աշակերտներուն։ – Ի՞նչ բանի շուրջ կը վիճաբանէիք անոնց հետ։ 17 Ժողովուրդէն մէկը ըսաւ Յիսուսի. – Վարդապե՛տ, քեզի բերի զաւակս, որ չար ոգիին պատճառով համր դարձած է։ 18 Ուր որ պատահի, չար ոգին զինք կը զգետնէ. տղուս բերանը կը փրփրի, եւ ակռաները կը կրճտէ ու ապա կը պրկուի։ Աշակերտներուդ ըսի որ հանեն չար ոգին, բայց չկրցան։ 19 Յիսուս պատասխանեց անոնց. – Ո՛վ անհաւատ սերունդ, մինչեւ ե՞րբ ձեզի հետ պիտի ըլլամ. մինչեւ ե՞րբ պիտի հանդուրժեմ ձեզի։ Հո՛ս բերէք զայն։ 20 Եւ անոնք բերին։ Չար ոգին հազիւ Յիսուսը տեսած՝ ցնցեց տղան, որ գետին ինկաւ եւ սկսաւ տապլտկիլ՝ բերանը փրփուրներով լեցուն։ 21 Յիսուս անոր հօրը հարցուց. – Ո՞րքան ատենէ ի վեր ասիկա կը պատահի իրեն։ – Մանկութենէն ի վեր,– պատասխանեց հայրը։ – 22 Չար ոգին զինք սպաննելու համար շատ անգամ կրակի եւ ջուրի մէջ կը նետէ զինք։ Արդ, եթէ կրնաս բան մը ընել, Տէ՜ր, խղճա՛ եւ օգնէ՛ մեզի։ 23 Յիսուս ըսաւ. – Ըսիր՝ «Եթէ կրնաս»։ Ամէն ինչ կարելի է անոր համար՝ որ կը հաւատայ։ 24 Անմիջապէս տղուն հայրը գոչեց. – Կը հաւատա՛մ, օգնէ՛ որ հաւատքս զօրանայ։ 25 Յիսուս երբ տեսաւ որ ժողովուրդը չորս կողմէն կը դիզուի, սաստեց չար ոգին՝ ըսելով. – Համր եւ խո՛ւլ ոգի, կը հրամայեմ որ դո՛ւրս ելլես տղուն մէջէն եւ անգամ մըն ալ չմտնե՛ս։ 26 Չար ոգին աղաղակով մը զգետնեց տղան եւ դուրս ելաւ անկէ։ Տղան մեռելի պէս եղաւ, այնպէս որ շատեր ըսին թէ մեռաւ։ 27 Յիսուս բռնեց անոր ձեռքէն, վերցուց, եւ տղան ոտքի կանգնեցաւ։ 28 Երբ Յիսուս տուն մտաւ, աշակերտները առանձին հարցուցին անոր. – Մե՞նք ինչու չկրցանք հանել չար ոգին։ 29 Յիսուս պատասխանեց. – Այդ տեսակ չար ոգին միայն աղօթքով եւ ծոմապահութեամբ կարելի է դուրս հանել։ 30 Անոնք այդտեղը ձգեցին եւ անցան Գալիլեայի մէջէն։ Յիսուս չէր ուզեր որ մէկը գիտնայ, 31 որովհետեւ իր աշակերտներուն կը սորվեցնէր, ըսելով. – Մարդու Որդին պիտի մատնուի մարդոց ձեռքը, որոնք պիտի սպաննեն զայն։ Բայց սպանութենէն երեք օր ետք անիկա յարութիւն պիտի առնէ։ 32 Անոնք չէին հասկնար այս խօսքին իմաստը եւ կը վախնային հարցնելու։ 33 Կափառնաում եկան։ Երբ տուն մտան, Յիսուս հարցուց իր աշակերտներուն. – Ի՞նչ բանի մասին կը վիճաբանէիք ճամբու ընթացքին։ 34 Անոնք լուռ մնացին, որովհետեւ ճամբու ընթացքին իրարու հետ կը վիճաբանէին թէ ո՛վ է մեծը։ 35 Երբ նստաւ, կանչեց տասներկու աշակերտները եւ ըսաւ անոնց. – Եթէ մէկը կ՚ուզէ առաջին ըլլալ՝ թող բոլորին վերջինը եւ բոլորին սպասաւորը ըլլայ։ 36 Ապա փոքրիկ մը առաւ, անոնց մէջտեղ կանգնեցուց եւ զայն գրկելով ըսաւ. – 37 Ով որ այսպիսի փոքրիկ մը իմ անունովս ընդունի՝ զիս ընդունած կ՚ըլլայ, եւ ով որ զիս կ՚ընդունի՝ ո՛չ թէ զիս, այլ զիս ղրկողը ընդունած կ՚ըլլայ։ 38 Յովհաննէս ըսաւ անոր. – Վարդապե՛տ, մէկը տեսանք որ քու անունովդ չար ոգիներ կը հանէր եւ մենք արգիլեցինք իրեն, որովհետեւ մեզի հետ չի շրջիր։ 39 Յիսուս ըսաւ. – Արգելք մի՛ ըլլաք իրեն, որովհետեւ ոեւէ մէկը չի՛ կրնար իմ անունովս հրաշք գործել եւ անմիջապէս ինծի դէմ խօսիլ։ 40 Որովհետեւ ան որ մեզի հակառակ չէ, կը նշանակէ թէ մեր կողմն է։ 41 Վստահ եղէք, թէ ան որ ձեզի գաւաթ մը ջուր կու տայ՝ որովհետեւ Քրիստոսի կը պատկանիք, իր վարձատրութիւնը պիտի չկորսնցնէ։ – 42 Եւ ով որ ինծի հաւատացող այս փոքրիկներէն մէկը գայթակղեցնէ, աւելի լաւ կ՚ըլլայ, որ գայթակղեցնողին վիզին մեծ երկանաքար անցուի եւ ծովը ձգուի։ 43 Եթէ ձեռքդ քեզ կը գայթակղեցնէ՝ կտրէ՛ զայն, որովհետեւ աւելի լաւ է խեղանդամ մտնել յաւիտենական կեանքը, քան թէ երկու ձեռք ունենալ եւ իյնալ դժոխքի անշէջ կրակին մէջ։ 44 ... 45 Եթէ ոտքդ քեզ կը գայթակղեցնէ՝ կտրէ՛ զայն. աւելի լաւ է կաղ ոտքով մտնել յաւիտենական կեանքը, քան թէ երկու ոտք ունենալ եւ իյնալ դժոխք։ 46 ... 47 Եթէ աչքդ քեզ կը գայթակղեցնէ՝ հանէ՛ զայն, աւելի լաւ է միականի մտնել Աստուծոյ արքայութիւնը, քան թէ երկու աչք ունենալ եւ իյնալ դժոխք, 48 ուր «զանոնք կրծող որդը չի մեռնիր եւ կրակը չի մարիր»։ 49 Որովհետեւ ամէն մարդ կրակով պիտի մաքրուի, ինչպէս ամէն զոհ՝ աղով։ 50 Լաւ բան է աղը, բայց եթէ իր համը կորսնցնէ՝ ինչո՞վ պիտի աղեն զայն։ Արդ, աղ ունեցէք դուք ձեր մէջ եւ իրարու հետ խաղաղութեամբ ապրեցէք։