Bible

1 Մինչ Յիսուս տաճարէն դուրս կ՚ելլէր, աշակերտներէն մէկը ըսաւ. – Վարդապե՛տ, տե՛ս, ի՜նչ գեղեցիկ քարեր են եւ ի՜նչ հոյակապ շինութիւն։ 2 Յիսուս պատասխանեց. – Կը տեսնե՞ս այս բոլոր շինութիւնները, կ՚ըսեմ ձեզի, որ ամէնքն ալ պիտի քանդուին, քար քարի վրայ պիտի չմնայ։ 3 Եւ մինչ Յիսուս նստած էր Ձիթենեաց լերան վրայ, տաճարին դիմաց, Պետրոս, Յակոբոս, Յովհաննէս եւ Անդրէաս առանձինն հարցուցին Յիսուսի. – 4 Ըսէ՛ մեզի, ե՞րբ պիտի պատահի ատիկա. ի՞նչ նշանով պիտի գիտնանք թէ ե՛րբ այդ բոլորը պիտի պատահին։ 5 Յիսուս պատասխանեց. – Զգո՛յշ եղէք, չըլլա՛յ որ ոեւէ մէկը ձեզ խաբէ, 6 որովհետեւ շատեր պիտի գան իմ անունովս եւ ըսեն՝ «Ես եմ Քրիստոսը » եւ պիտի մոլորեցնեն շատերը։ 7 Մի՛ խռովիք, երբ լսէք պատերազմներու ձայները կամ պատերազմներու լուրերը, որովհետեւ պէտք է որ ատոնք պատահին։ Բայց ատիկա չի՛ նշանակեր թէ աշխարհի վախճանն է։ 8 Ազգեր իրարու դէմ պիտի կռուին եւ թագաւորութիւններ՝ թագաւորութիւններու դէմ։ Զանազան տեղեր երկրաշարժներ տեղի պիտի ունենան, սով, համաճարակ եւ խռովութիւններ։ Բայց այս բոլորը դեռ երկունքին սկիզբն են։ 9 Պատրա՛ստ եղէք դուք, որովհետեւ ձեզ իսկ դատարան պիտի տանին եւ ժողովարաններու մէջ ծեծեն ձեզ։ Իմ պատճառովս՝ կառավարիչներու եւ թագաւորներու դիմաց պիտի կանգնիք, իմ մասիս վկայութիւն տալու համար անոնց։ 10 Բայց նախ պէտք է որ Աւետարանը բոլոր ազգերուն քարոզուի։ 11 Բայց երբ ձերբակալեն ձեզ եւ դատարան յանձնեն, սկիզբէն մի՛ մտահոգուիք եւ մի՛ մտածէք թէ ի՛նչ պիտի ըսէք, այլ ինչ որ այդ ժամուն ձեզի տրուի՝ ատիկա՛ ըսէք, որովհետեւ խօսողը դուք պիտի չըլլաք, այլ՝ Սուրբ Հոգին։ 12 Եղբայրը իր եղբայրը պիտի սպաննէ, հայրը՝ իր զաւակը։ Զաւակներ իրենց ծնողներուն դէմ պիտի ելլեն եւ սպաննեն զանոնք։ 13 Ամէն մարդ ձեզ պիտի ատէ իմ պատճառովս։ Բայց ով որ մինչեւ վերջը դիմանայ՝ անիկա պիտի փրկուի։ – 14 Երբ տեսնէք «Աւերուածին սրբապղծութիւնը», կանգնած հոն՝ ուր պէտք չէր կանգնէր (կարդացողը թող հասկնա՛յ), այն ատեն անոնք որոնք Հրէաստանի մէջ են՝ թող լեռները փախչին, 15 ան որ տանիքն է՝ վար իջնելէ ետք թող տուն չմտնէ բան մը առնելու համար, 16 ան որ արտն է՝ թող ետ չդառնայ իր վերարկուն առնելու համար։ 17 Այդ օրերուն՝ վա՛յ է եկեր յղիներուն եւ ստնտու կիներուն։ 18 Աղօթեցէք որ ձեր փախուստը ձմեռ օրով չպատահի։ 19 Այն օրերը այնպիսի՛ նեղութեան օրեր պիտի ըլլան, որոնց նմանը աշխարհի ստեղծագործութեան սկիզբէն մինչեւ այսօր չէ պատահած եւ ոչ ալ պիտի պատահի։ 20 Եւ եթէ Աստուած իր ընտրեալներուն համար այդ օրերուն թիւը նուազեցուցած չըլլար՝ ո՛չ մէկը պիտի փրկուէր։ Բայց իր ընտրեալներուն համար Աստուած այդ օրերը նուազեցուց։ 21 Այն ատեն, երբ մէկը ձեզի ըսէ՝ «Ահաւասիկ հոս է Քրիստոսը », կամ ըսէ՝ «Ահա հոն է», մի՛ հաւատաք, 22 որովհետեւ սուտ քրիստոսներ եւ սուտ մարգարէներ պիտի յայտնուին եւ նշաններ ու հրաշքներ կատարելով՝ պիտի մոլորեցնեն, եթէ կարենան, նոյնիսկ Աստուծոյ ընտրեալները։ 23 Բայց դուք զգո՛յշ եղէք։ Ահաւասիկ ամէն ինչ սկիզբէն ըսի ձեզի։ – 24 Այդ օրերուն, այդ նեղութենէն ետք՝ արեւը պիտի խաւարի եւ լուսինը այլեւս պիտի չփայլի. 25 երկինքէն աստղերը պիտի իյնան եւ երկնայինմարմինները պիտի սասանին։ 26 Այն ատեն պիտի տեսնեն Մարդու Որդին, որ կու գայ ամպերու վրայ՝ մեծ զօրութեամբ եւ փառքով։ 27 Այն ատեն իր հրեշտակները պիտի ղրկէ, որպէսզի աշխարհի չորս կողմերէն իր ընտրեալները հաւաքեն, աշխարհի մէկ ծայրէն մինչեւ միւս ծայրը։ 28 Թող թզենին ձեզի օրինակ ըլլայ։ Երբ անոր ճիւղերը հետզհետէ կը կակուղնան եւ տերեւ կ՚արձակեն, գիտէք թէ ամառը մօտ է։ 29 Նոյնպէս ալ, երբ տեսնէք որ ըսածներս կը կատարուին, գիտցէք թէ Մարդու Որդիին գալուստը մօտ է եւ արդէն հասնելու վրայ։ 30 Վստահ եղէք, որ այս սերունդը չանցած՝ ասոնք բոլորը պիտի պատահին։ 31 Նոյնիսկ եթէ երկինքն ու երկիրը անհետանան, խօսքերս պիտի չանհետանան։ – 32 Սակայն ո՛չ ոք գիտէ թէ ե՛րբ պիտի գայ այդ օրը կամ ժամը. ո՛չ երկինքի հրեշտակները, ո՛չ իսկ Որդին, բայց՝ միայն Հայրը։ 33 Զգո՛յշ եղէք, արթուն մնացէք եւ աղօթեցէ՛ք, որովհետեւ չէք գիտեր թէ ժամանակը ե՛րբ է։ 34 Անիկա կը նմանի այն մարդուն, որ իր տունը կը ձգէ եւ ուրիշ երկիր կ՚երթայ։ Չգացած՝ իր ծառաներէն իւրաքանչիւրին պարտականութիւն կու տայ եւ դռնապանին ալ կը պատուիրէ որ արթուն մնայ։ 35 Ուրեմն, դուք ալ արթուն մնացէք, որովհետեւ չէք գիտեր թէ տանտէրը գիշերուան ո՛ր պահուն կու գայ, երեկոյեա՞ն, կէս–գիշերի՞ն, հաւախօսի՞ն թէ առաւօտուն։ 36 Որպէսզի չըլլա՛յ որ յանկարծ գայ եւ ձեզ քնացած գտնէ։ 37 Արդ, ինչ որ ձեզի կ՚ըսեմ, բոլորին կ՚ըսեմ.– Արթո՛ւն կեցէք։