Bible

1 Յիսուս սկսաւ առակներով խօսիլ ժողովուրդինեւ ըսաւ. – Մէկը այգի մը տնկեց, չորս կողմէն ցանկապատեց, հնձանի համար փոսը փորեց, աշտարակ մըն ալ շինեց եւ զայն վարձու տուաւ մշակներու, իսկ ինք ուրիշ երկիր գնաց։ 2 Այգեկութքի ժամանակ ծառայ մը ղրկեց մշակներուն մօտ, որպէսզի այգիի բերքէն իր բաժինը առնէ մշակներէն։ 3 Մշակները ծառան բռնեցին, ծեծեցին եւ ձեռնունայն ետ ղրկեցին։ 4 Ապա ուրիշ ծառայ մը ղրկեց. բայց մշակները անոր գլուխը վիրաւորեցին եւ անպատուելով ետ ղրկեցին։ 5 Ուրիշ ծառայ մըն ալ ղրկեց, եւ այս անգամ մշակները սպաննեցին զայն։ Այգիին տէրը ուրիշ ծառաներ ալ ղրկեց, սակայն մշակները անոնցմէ ոմանք ծեծեցին եւ ոմանք ալ սպաննեցին։ 6 Այգիին տիրոջ համար միակ անձը որ կը մնար՝ իր սիրելի որդին էր։ Ամենէն վերջը զայն ղրկեց մշակներունմօտ, մտածելով. «Թերեւս իմ որդիէս պատկառին»։ 7 Բայց մշակները երբ տեսան որդին, որ կու գայ, իրարու ըսին. «Ասիկա է ժառանգորդը, եկէք սպաննենք զայն, որպէսզի ժառանգութիւնը մեզի մնայ»։ 8 Ապա բռնեցին զայն, սպաննեցին եւ դիակը այգիէն դուրս նետեցին։ 9 Հիմա, այգիին տէրը ի՞նչ պիտի ընէ մշակներուն։ Անշուշտ պիտի գայ, սպաննէ մշակները եւ այգին յանձնէ ուրիշներու։ 10 Արդարեւ, Սուրբ գիրքերուն մէջ չէ՞ք կարդացած.– «Այն քարը որ շինողները մերժեցին գործածել, յետոյ անկիւնաքար եղաւ։ 11 Ասիկա Տէրը կատարեց, ու մեր աչքերուն սքանչելի է»։ 12 Հրեայ ղեկավարները հասկնալով որ իրենց համար ըսաւ առակը, ուզեցին ձերբակալել Յիսուսը, բայց ժողովուրդէն վախնալով ձգեցին գացին։ 13 Ապա անոնք Յիսուսի ղրկեցին քանի մը Փարիսեցիներ եւ Հերովդէսի կողմնակիցներ, որպէսզի իրենց հարցումներով զայն ծուղակը ձգեն։ 14 Անոնք նենգամըտաբար հարցուցին Յիսուսի. – Վարդապե՛տ, գիտենք որ ճշմարտախօս մէկն ես եւ բնաւ հոգ չես ըներ թէ ուրիշներ ի՛նչ կ՚ըսեն, որովհետեւ աչառութիւն չես ըներ, այլ ճշմարտութեամբ Աստուծոյ կամքը կ՚ուսուցանես։ Արդ, ըսէ՛ մեզի, մեր Օրէնքին համաձայն պէ՞տք է կայսրին տուրք տանք, թէ ոչ։ Տա՞նք թէ չտանք։ 15 Յիսուս հասկցաւ անոնց կեղծաւորութիւնը եւ ըսաւ. – Կեղծաւորնե՛ր, ինչո՞ւ կը փորձէք զիս։ Բերէ՛ք ինծի արծաթ դրամ մը, որ տեսնեմ։ 16 Անոնք ալ բերին։ Ապա հարցուց. – Ասիկա որո՞ւն նկարն ու արձանագրութիւնն է։ Անոնք պատասխանեցին. – Կայսրին։ 17 Յիսուս ըսաւ անոնց. – Գացէք եւ ինչ որ կայսրին կը պատկանի՝ կայսրին տուէք եւ ինչ որ Աստուծոյ՝ Աստուծոյ տուէք։ Եւ բոլորն ալ հիացան իր վրայ։ 18 Սադուկեցիներէն ոմանք եկան Յիսուսի մօտ։ Սադուկեցիները կ՚ըսեն՝ թէ մեռելներու յարութիւն չկայ։ Անոնք Յիսուսի ըսին. – 19 Վարդապե՛տ, Մովսէս հետեւեալ օրէնքը գրեց մեզի. «Եթէ ամուսնացած մէկը մեռնի առանց զաւակ ձգելու, թող մարդուն եղբայրը ամուսնանայ այրիին հետ, որպէսզի իր եղբօրը զաւակ տայ»։ 20 Ժամանակին մեր մօտ եօթը եղբայրներ կային։ Առաջինը ամուսնացաւ եւ մեռաւ առանց զաւակ ձգելու։ 21 Երկրորդ եղբայրը ամուսնացաւ անոր կնոջ հետ եւ մեռաւ՝ առանց զաւակ ձգելու։ Երրորդն ալ, 22 եւ մինչեւ եօթներորդ եղբայրը նոյնպէս ամուսնացան այդ կնոջ հետ եւ մեռան առանց զաւակ ձգելու։ Բոլորէն վերջ կինն ալ մեռաւ։ 23 Արդ, մեռելներու յարութեան օրը, երբ անոնք յարութիւն առնեն, կինը անոնցմէ որո՞ւն պիտի պատկանի, քանի եօթն ալ ամուսնացան անոր հետ։ 24 Յիսուս պատասխանեց. – Գիտէ՞ք ինչու դուք մոլորած էք։ Մոլորած էք՝ որովհետեւ չէք հասկնար ո՛չ Սուրբ գիրքերը եւ ո՛չ ալ Աստուծոյ զօրութիւնը։ 25 Երբ մեռելները յարութիւն առնեն, մարդիկ եւ կիներ պիտի չամուսնանա՛ն, այլ երկինքի հրեշտակներուն նման պիտի ըլլան։ 26 Իսկ մեռելներու յարութիւն առնելուն մասին Մովսէսի գիրքին մէջ չէ՞ք կարդացած այրող մորենիին դրուագը։ Հոն Աստուած Մովսէսի ըսաւ. «Ե՛ս եմ Աբրահամի Աստուածը, Իսահակի Աստուածը եւ Յակոբի Աստուածը»։ 27 Կը նշանակէ թէ Աստուած մեռելներուն Աստուածը չէ՛, այլ ողջերուն։ Ուստի, դուք չափազանց մոլորած էք։ 28 Օրէնքի ուսուցիչ մը լսելով անոնց վիճաբանութիւնը, մօտեցաւ եւ տեսնելով թէ ի՛նչպէս Յիսուս լաւ պատասխանեց անոնց, հարցուց Յիսուսի. – Ո՞րն է կարեւորագոյն պատուիրանը։ 29 Յիսուս պատասխանեց. – Կարեւորագոյն պատուիրանը հետեւեալն է. «Լսէ՛, Իսրայէլ, մեր Տէր Աստուածը միակ Տէրն է»։ 30 Եւ «Սիրէ՛ քու Տէր Աստուածդ ամբողջ սրտովդ, ամբողջ հոգիովդ, ամբողջ մտքովդ եւ ամբողջ զօրութեամբդ»։ 31 Երկրորդը, որ ասոր նման է, ասիկա է. «Սիրէ՛ ընկերդ քու անձիդ պէս»։ Այս երկուքէն աւելի մեծ պատուիրան չկայ։ 32 Օրէնքի ուսուցիչը ըսաւ. – Ճի՛շդ է, Վարդապե՛տ, ուղիղ ըսիր՝ թէ Աստուած միակ Տէրն է եւ անկէ զատ ուրիշ Աստուած չկայ, 33 եւ պէտք է սիրել զայն ամբողջ սրտով, ամբողջ զօրութեամբ եւ ամբողջ մտքով, ինչպէս նաեւ սիրել ընկերը՝ անձին պէս, որովհետեւ ասիկա շատ աւելի կ՚արժէ քան բոլոր ողջակէզներն ու զոհերը ։ 34 Յիսուս տեսնելով անոր տուած խելացի պատասխանը, ըսաւ. – Աստուծոյ արքայութենէն հեռու չե՛ս։ Եւ այլեւս ոչ ոք կը համարձակէր հարցում ընել Յիսուսի։ 35 Յիսուս տաճարին մէջ ուսուցանելու ընթացքին հարցուց ժողովուրդին. – Օրէնքի ուսուցիչները ի՞նչպէս կ՚ըսեն՝ թէ Քրիստոս Դաւիթի Որդին է, 36 երբ Դաւիթ ինք Սուրբ Հոգիէն ներշնչուած՝ կ՚ըսէ.– « Տէրը ըսաւ իմ Տիրոջս.– Աջ կողմս նստէ, մինչեւ թշնամիներդ ոտքերուդ տակ դնեմ որպէս պատուանդան»։ 37 Եթէ Դաւիթ զայն տէր կը կոչէ, ինչպէ՞ս ուրեմն Քրիստոսը անոր որդին է։ Ժողովուրդը հաճոյքով մտիկ կ՚ընէր Յիսուսի, 38 որ իր ուսուցումները շարունակելով՝ կ՚ըսէր. - Զգո՛յշ եղէք Օրէնքի ուսուցիչներէն, որոնք կը սիրեն փառաւոր զգեստներով շրջիլ, հրապարակներու վրայ մարդոցմէ յարգալիր բարեւներ ընդունիլ, 39 ժողովարաններու մէջ առաջին աթոռները գրաւել եւ ընթրիքներու ընթացքին՝ պատուոյ տեղերը։ 40 Մէկ կողմէ այրիներուն տուները անոնց ձեռքէն կը յափշտակեն, իսկ միւս կողմէ կեղծաւորութեամբ իրենց աղօթքը կ՚երկարեն։ Ասոր համար աւելի՛ խիստ դատապարտութիւն պիտի ընդունին։ 41 Յիսուս կեցած էր տաճարի գանձանակին մօտ եւ կը դիտէր ժողովուրդը, որ դրամ կը նետէր գանձանակին մէջ։ Շատ մը հարուստներ մեծ գումարներ նետեցին։ 42 Աղքատ այրի մըն ալ եկաւ եւ նետեց երկու լումայ, որ քանի մը դահեկան կ՚ընէ։ 43 Յիսուս մօտը կանչեց իր աշակերտները եւ ըսաւ անոնց. - Վստա՛հ գիտցէք, որ այս թշուառ այրին բոլորէն շատ դրամ նետած եղաւ գանձանակին մէջ, 44 որովհետեւ միւսները իրենց աւելորդ գումարներէն նետեցին, մինչ անիկա, հակառակ չքաւոր ըլլալուն, ինչ որ ունէր՝ նետեց, իր ամբո՛ղջ ապրուստը։