Bible

1 Յիսուս Գեննեսարէթի լիճին եզերքը կեցած էր, երբժողովուրդը սկսաւ իր շուրջ խառնուիլ՝ լսելու համար Աստուծոյ խօսքը։ 2 Անիկա երկու նաւակներ տեսաւ լիճին եզերքը. իսկ ձկնորսները նաւակէն դուրս ելած՝ իրենց ուռկանները կը լուային։ 3 Յիսուս մտաւ նաւակներէն մէկուն մէջ, որ Սիմոնին կը պատկանէր, եւ խնդրեց որ ցամաքէն քիչ մը հեռացնէր նաւակը։ Եւ նաւակին մէջ նստած՝ սկսաւ ժողովուրդին ուսուցանել։ 4 Երբ իր խօսքը վերջացուց, Սիմոնին ըսաւ. – Քիչ մը աւելի խորը տար նաւակը եւ ձուկ որսալու համար ձեր ուռկաններընետեցէք։ 5 Սիմոն պատասխանեց. – Վարդապե՛տ, ամբողջ գիշերը յոգնեցանք եւ ոչինչ որսացինք, բայց քու խօսքիդ համար ուռկանները նետենք։ 6 Ուռկանները նետեցին եւ մեծ քանակութեամբ ձուկ բռնեցին մէջը, այնքան՝ որ իրենց ուռկանները կը պատռտէին։ 7 Նշան ըրին իրենց գործի ընկերներուն, որոնք միւս նաւակին մէջ էին, որպէսզի իրենց օգնութեան գան։ Անոնք եկան եւ երկու նաւակները ա՛յնքան լեցուեցան, որ այլեւս պիտի ընկղմէին։ 8 Երբ Սիմոն Պետրոս տեսաւ ասիկա, ինկաւ Յիսուսի ծունկերուն առջեւ եւ ըսաւ. –Հեռացի՛ր ինձմէ, Տէ՜ր, որովհետեւ ես մեղաւոր մարդ մըն եմ։ 9 Քանի ինք եւ իրեն հետ եղողները շատ վախցած էին, տեսնելով իրենց բռնած մեծ քանակութեամբ ձուկերը։ 10 Նոյն վիճակին մատնուած էին Զեբեդէոսի որդիները՝ Յակոբոսն ու Յովհաննէսը, որոնք Սիմոնի գործընկեր էին։ Յիսուս ըսաւ Սիմոնի. – Մի՛ վախնար, ասկէ ետք մարդիկ պիտի որսաս՝ կեանքի համար։ 11 Անոնք նաւակները ցամաք հանեցին եւ ամէն ինչ ձգելով՝ հետեւեցան Յիսուսի։ 12 Յիսուս օր մը երբ քաղաք մը հասաւ, ահա բորոտութեամբ ծածկուած մարդ մը տեսաւ զինք եւ երեսին վրայ գետին փռուելով՝ աղաչեց եւ ըսաւ. – Տէ՛ր, եթէ ուզես՝ կրնաս զիս մաքրել։ 13 Յիսուս ձեռքը երկարեց, դպաւ անոր ու ըսաւ. – Կ՚ուզեմ, մաքրուէ՛։ Անմիջապէս բորոտութիւնը գնաց անկէ։ 14 Ապա Յիսուս անոր պատուիրեց. – Ոեւէ մէկուն բան մի՛ ըսեր, այլ գնա եւ դուն քեզ քահանային ցոյց տուր. ապա ժողովուրդին իբրեւ վկայութիւն՝ թէ բորոտութենէդ մաքրուած ես՝ զոհդ մատուցանէ, ինչպէս որ Մովսէս հրամայած է։ 15 Եւ Յիսուսի համբաւը աւելի կը տարածուէր։ Խուռն բազմութիւններ կը հաւաքուէին, լսելու համար զինք եւ բժշկուելու իրենց հիւանդութիւններէն։ 16 Իսկ ինք դէպի ամայի վայրեր խոյս կու տար եւ կ՚աղօթէր։ 17 Օր մը, երբ Յիսուս կ՚ուսուցանէր, Գալիլեայի եւ Հրէաստանի շրջաններէն ու Երուսաղէմէն եկած Փարիսեցիներ եւ Օրէնքի ուսուցիչներ ալ նստած էին հոն։ Յիսուս Տիրոջ զօրութեամբ բժշկութիւններ կը կատարէր։ 18 Եւ ահա քանի մը հոգիներ անդամալոյծ մը բերին մահիճի վրայ. կ՚ուզէին ներս մտցնել զայն եւ Յիսուսի առջեւ բերել։ 19 Երբ խճողումին պատճառով ներս մտնելու ճամբայ չգտան, տանիք ելան եւ առաստաղէն կախելով՝ մահիճով միասին իջեցուցին բազմութեան մէջտեղը, Յիսուսի առջեւ։ 20 Յիսուս անոնց հաւատքը տեսնելով, անդամալոյծին ըսաւ. – Ո՛վ մարդ, մեղքերդ ներուած են քեզի։ 21 Օրէնքի ուսուցիչներն ու Փարիսեցիները սկսանխորհիլ եւ իրարու ըսել. – Ո՞վ է այս մարդը, որ կը համարձակի այսպիսի հայհոյութիւն ընել. Աստուծմէ զատ ո՞վ կրնայ մեղքերը ներել։ 22 Յիսուս անոնց մտածումը գիտնալով, ըսաւ. – Ի՞նչ է այդ ձեր մտածածը. 23 ո՞ր մէկը աւելի դիւրին է, «Մեղքերդ քեզի ներուած են» ըսե՞լը, թէ՝ «Ել եւ քալէ՛» ըսելը։ 24 Բայց պէտք է գիտնաք, թէ Մարդու Որդին երկրի վրայ մեղքերը ներելու իշխանութիւն ունի։ Ապա անդամալոյծին դառնալով՝ ըսաւ. – Քեզի կ՚ըսեմ, ե՛լ, ա՛ռ մահիճդ եւ տո՛ւնդգնա։ 25 Անմիջապէս բոլորին դիմաց անդամալոյծը ոտքի ելաւ, առաւ մահիճը, որուն վրայ պառկած էր եւ տուն գնաց՝ զԱստուած փառաւորելով։ 26 Բոլորն ալ ապշեցան եւ վախով լեցուեցան, եւ զԱստուած կը փառաւորէին՝ ըսելով. – Այսօր հրաշալի բաներ տեսանք։ 27 Այս հրաշքէն ետք, երբ Յիսուս ելաւ հոնկէ, տեսաւ Ղեւի անունով մաքսաւոր մը, որ մաքս գանձելու նստած էր, եւ ըսաւ անոր. – Ինծի՛ հետեւէ։ 28 Ղեւի ձգեց ամէն ինչ եւ ելաւ ու անոր հետեւեցաւ։ 29 Ապա Ղեւի Յիսուսի համար մեծ ճաշկերոյթ մը սարքեց իր տան մէջ։ Հրաւիրեալներուն մէջ շատ մը մաքսաւորներ ալ կային, որոնքմիասին նստած էին։ 30 Փարիսեցիներն ու Օրէնքի ուսուցիչները սկսան Յիսուսի մասին տրտնջալ իր աշակերտներուն, ըսելով. – Ինչո՞ւ մաքսաւորներուն եւ մեղաւորներուն հետ կ՚ուտէք ու կը խմէք։ 31 Յիսուս անոնց պատասխանեց. – Առողջները չեն որ բժիշկի պէտք ունին, այլ՝ հիւանդները։ 32 Չեկա՛յ արդարները ապաշխարութեան հրաւիրելու, այլ՝ մեղաւորները։ 33 Անոնցմէ ոմանք հարցուցին Յիսուսի. – Ինչո՞ւ Յովհաննէսի աշակերները յաճախ ծոմ կը պահեն եւ կ՚աղօթեն. նոյնը կ՚ընեն Փարիսեցիներու աշակերտներն ալ, մինչ քուկիններդ կ՚ուտեն ու կը խմեն։ 34 Յիսուս պատասխանեց անոնց. – Կրնա՞ք հարսանիքի հրաւիրեալներուն ըսել՝ որ ծոմ պահեն, երբ տակաւին փեսան իրենց հետ է։ 35 Օր պիտի գայ, երբ փեսան պիտի վերցուի իրենցմէ եւ այն ատեն անոնք ալ ծոմ պիտի պահեն։ 36 Ապա օրինակ մըն ալ տուաւ անոնց. – Ոչ ոք նոր հագուստէ մը կտոր մը առնելով՝ հինին համար կարկտան կ՚ընէ. այդպիսով թէ՛ նոր հագուստը կը փճանայ եւ թէ՛ կարկտանը հինին չի յարմարիր։ 37 Նոյնպէս, ոչ ոք նոր գինին հին տիկերու մէջ կը լեցնէ. այլապէս՝ նոր գինին կը պայթեցնէ հին տիկերը եւ պատճառ կ՚ըլլայ որ թէ՛ գինին թափի եւ թէ՛ տիկերը փճանան։ 38 Ընդհակառակը, նոր գինին նոր տիկերու մէջ դրուելու է, որպէսզի երկուքն ալ չփճանան։ 39 Ոչ ոք հին գինին խմելէ ետք անմիջապէս նորը կ՚ուզէ, քանի կ՚ըսէ. «Հին գինին աւելի քաղցրահամ է»։