Hebrews 7
1 Այս «Մելքիսեդեկը Սաղէմի թագաւորն էր եւ բարձրեալ Աստուծոյ քահանան, որ Աբրահամը դիմաւորելու ելաւ, երբ անիկա պատերազմէն կը վերադառնար, թագաւորները պարտութեան մատնելէ ետք. եւ Մելքիսեդեկ օրհնեց Աբրահամը։
2 Իսկ Աբրահամ իր ամբողջ աւարին մէկ տասներորդը անոր տուաւ»։ Նախ, Մելքիսեդեկ անունը կը նշանակէ՝ արդարութեան թագաւոր։ Երկրորդ, Թագաւոր Սաղէմի՝ կը նշանակէ թագաւոր խաղաղութեան։
3 Մելքիսեդեկի ո՛չ հայրը յայտնի է, ո՛չ մայրը եւ ո՛չ ալ ծագումը. իր կեանքին ո՛չ սկիզբը գիտենք եւ ո՛չ ալ վախճանը։ Նման է Աստուծոյ Որդիին. մշտնջենական քահանայ է։
4 Արդ, տեսէք թէ ինչպիսի՛ մեծ մէկն էր Մելքիսեդեկը, որուն Աբրահամ նահապետ պատերազմական աւարէն տասանորդ տուաւ։
5 Գիտենք, թէ Ղեւիի որդիներէն անոնք որ քահանայական պաշտօնը կ՚առնեն՝հրահանգ ունին Օրէնքին համաձայն տասանորդ առնելու ժողովուրդէն, այսինքն իրենց ազգակիցներէն, թէպէտեւ ասոնք ալ Աբրահամի զաւակներն են։
6 Մելքիսեդեկ Ղեւիի սերունդէն չըլլալով հանդերձ՝ տասանորդ առաւ եւ օրհնեց Աբրահամը, որ Աստուծմէ խոստումները ստացած էր։
7 Եւ կասկած չկայ որ օրհնողը շատ աւելի բարձր է քան օրհնուողը։
8 Տակաւին, Ղեւտացի քահանաները, որոնք տասանորդ կ՚առնեն, մահկանացու մարդիկ են. մինչդեռ Մելիքսեդեկի համար կը վկայուի՝ թէ միշտ կենդանի է։
9 Եւ, ինչպէս կարելի է ըսել, Աբրահամի միջոցաւ՝ Ղեւի եւս, որուն զաւակները տասանորդ կ՚առնեն, տասանորդ տուած եղաւ Մելքիսեդեկի,
10 որովհետեւ տակաւին իր նախահօրը սերմին մէջ էր, երբ Մելքիսեդեկ Աբրահամը դիմաւորելու ելաւ։
11 Գիտենք, թէ Ղեւտացիներու քահանայութիւնն էր հիմը սրբութեան այն օրէնքին, որ Իսրայէլի ժողովուրդին տրուեցաւ։ Արդ, եթէ կարելի ըլլար այդ քահանայութեան միջոցաւ կատարելութեան հասնիլ, Աստուած ի՞նչ պէտք պիտի ունենար նոր քահանայապետ մը տալու Մելքիսեդեկի օրինակով եւ ոչ՝ Ահարոնի քահանայութեան շարունակութենէն։
12 Միւս կողմէ, քահանայութեան փոխուելուն հետ սրբութեան օրէնքն ալ պէտք էր փոխուէր.
13 որովհետեւ Քրիստոս, որուն մասին կը խօսուի, կը պատկանէր ուրիշ ցեղի մը, որուն անդամներէն ո՛չ մէկը քահանայութեան պաշտօնը ստանձնեց երբեւիցէ։
14 Արդ, յայտնի է՝ թէ մեր Տէրը Յուդայի ցեղէն էր, մինչդեռ այդ ցեղէն գալիք քահանայութեան մը մասին Մովսէս ոեւէ բան չըսաւ։
15 Փոփոխութիւնը աւելի բացորոշ է անով՝ որ կը յայտնուի քահանայ մը որ Մելքիսեդեկի նման է.
16 այսինքն՝ մարմնաւոր կեանքի յատուկ օրէնքներու եւ կարգերու համաձայն չէ՛ որ քահանայ եղած է, այլ՝ յաւիտենական կեանքի մէջ ի զօրու եղող օրէնքով։
17 Անոր մասին վկայեց Սուրբ գիրքը, ըսելով. «Դուն յաւիտեան քահանայ ես, Մելքիսեդեկին պէս»։
18 Բացայայտ է, թէ նախկին պատուիրանը մէկդի կը դրուի, անզօր եւ անօգուտ ըլլալուն համար,
19 որովհետեւ Օրէնքը չկրցաւ ոեւէ բան կատարելութեան հասցնել. եւ հիմա մեզի տրուեցաւ աւելի լաւ յոյս մը, որով Աստուծոյ կը մօտենանք։
20 Աւելին, այս նոր քահանայութիւնը երդումով տրուեցաւ, մինչդեռ միւսներուն քահանայութիւնը երդումով տրուած չէ։
21 Քրիստոս քահանայ եղաւ Աստուծոյ երդումով, ինչպէս Սուրբ գիրքը կ՚ըսէ.– «Տէրը անդառնալի երդում ըրաւ, ըսելով. “Դուն յաւիտեան քահանայ ես”»։
22 Եւ այսպէս, Յիսուս գերազանց ուխտի մը երաշխաւորը եղաւ։
23 Ի վերջոյ, միւս քահանաները թիւով շատ կ՚ըլլային, որպէսզի մէկուն կամ միւսին մահով՝ քահանայութիւնը չընդհատուէր։
24 Բայց որովհետեւ Յիսուս յաւիտեան կ՚ապրի, իր քահանայութիւնն ալ անվախճան է։
25 Ուստի նաեւ կրնայ վերջնականապէս փրկել անոնք՝ որոնք իր միջոցաւ Աստուծոյ կու գան, որովհետեւ միշտ կենդանի ըլլալով՝ տեւաբար բարեխօս կ՚ըլլայ անոնց համար։
26 Արդարեւ այսպիսի Քահանայապետ մը պէտք է մեզի.– սուրբ, անմեղ, անարատ, մեղաւորներէն զատուած եւ երկինքներէն աւելի վեր բարձրացած։
27 Քահանայապետ մը, որամէն օր զոհեր մատուցանելու պէտք չունի միւս քահանայապետներուն պէս, որոնք նախ իրենց եւ ապա ժողովուրդին մեղքերուն համար զոհեր կը մատուցանեն։ Որովհետեւ Քրիստոս միայն մէկ անգամ ինքզինքը ընծայեց իբրեւ յաւերժական զոհ։
28 Արդարեւ, Օրէնքը կը կարգէ քահանայապետներ, որոնք իբրեւ մարդիկ՝ անկատար են. մինչդեռ աստուածային երդումով տրուած խոստումը, որ Օրէնքէն աւելի ետք տրուեցաւ, Քահանայապետ կը կարգէ Որդին, որ այլեւս յաւիտենապէս կատարեալ է։