Galatians 1
1 Ես՝ Պօղոս, առաքեալ եղած՝ ո՛չ թէ մարդոց կողմէ, ո՛չ ալ ոեւէ մէկուն միջոցաւ, այլ Յիսուս Քրիստոսէ եւ Հօր Աստուծմէ՝ որ զայն մեռելներէն յարուցանեց,
2 կը գրեմ ձեզի՝ Գաղատիայի եկեղեցիներուն, եւ ինծի կը միանան այն բոլոր եղբայրները, որոնք հետս են։
3 Թող ձեզի շնորհք եւ խաղաղութիւն պարգեւեն Հայրն Աստուած եւ մեր Տէրը՝ Յիսուս Քրիստոս,
4 որ իր անձը տուաւ մեր մեղքերուն համար, որպէսզի Աստուծոյ՝ մեր Հօրը կամքով մեզ ազատէ ներկայ չար աշխարհէն ։
5 Յաւիտեանս յաւիտենից փա՜ռք Աստուծոյ։ Ամէն ։
6 Շատ կը զարմանամ, որ այդպէս շուտով կը լքէք Աստուծոյ Աւետարանը, որ ձեզ Քրիստոսի շնորհքին հրաւիրեց, եւ այլափոխուած աւետարանի մը ականջ կու տաք։
7 Գիտցէք, որ չկա՛յ ուրիշ աւետարան։ Սակայն կան մարդիկ, որոնք ձեր միտքերը կը պղտորեն եւ կ՚ուզեն Քրիստոսի Աւետարանը չարափոխել։
8 Բայց ով որ մեր քարոզածէն տարբեր աւետարան մը քարոզէ ձեզի, ո՛վ ալ ըլլայ՝ նոյնիսկ մենք կամ երկինքէն հրեշտակ մը՝ անիծեալ ըլլայ։
9 Ահա ըսի եւ կը կրկնեմ. ով որ ձեզի աւանդուածէն տարբեր աւետարան մը քարոզէ՝ անիծեա՛լ ըլլայ։
10 Միթէ մարդի՞կ հաւանութիւն պիտի տան իմ քարոզած Աւետարանիս համար, թէ Աստուած։ Միթէ ես մարդիկը սիրաշահելու համա՞ր կ՚աշխատիմ։ Եթէ մարդիկը սիրաշահելու ետեւէ ըլլայի՝ Քրիստոսի ծառայ ըլլալէ կը դադրէի։
11 Կ՚ուզեմ որ լաւ գիտնաք, եղբայրնե՛ր, թէ այն Աւետարանը որ ես ձեզի աւետարանեցի՝ մարդկային միտքի ծնունդ չէ,
12 եւ ես ալ զայն ոեւէ մարդէ չառի կամ ոեւէ մէկէն չսորվեցայ։ Յիսուս Քրիստոս ի՛նք յայտնեց ինծի։
13 Անշուշտ լսած էք թէ ինչ կ՚ընէի, երբ տակաւին հրէութեան կապուած էի. ի՜նչ սաստկութեամբ կը հալածէի Աստուծոյ եկեղեցին, փորձելով զայն արմատախիլ ընել։
14 Ինծի տարեկից շատ մը ազգակիցներէ աւելի տեղեակ էի հրեայ կրօնական սովորութեանց, եւ շատ աւելի նախանձախնդիր էի մեր հայրենի աւանդութիւններուն:
15 Բայց Աստուած, որ ծնելէս իսկ առաջ զիս ընտրած եւ իր շնորհքովը զիս այս պաշտօնին կոչած էր,
16 երբ կամեցաւ իր Որդին յայտնել ինծի՝ որպէսզի բոլոր ազգերուն քարոզեմ, չաճապարեցի ոեւէ մէկուն խորհուրդը ուզելու,
17 անմիջապէս Երուսաղէմ ալ չգացի, անոնց քով՝ որոնք ինձմէ առաջ առաքեալ ըլլալու կոչուած էին. այլ՝ Արաբիա գացի եւ նորէն Դամասկոս դարձայ։
18 Ապա երեք տարիներ ետք Երուսաղէմ գացի Պետրոսը տեսնելու համար, եւ տասնըհինգ օր իր քով մնացի։
19 Առաքեալներէն ուրիշ մէկը չտեսայ, բացի Տիրոջ եղբայրը եղող Յակոբոսէն։
20 Այս գրածներուս մէջ ոեւէ սուտ բան չկայ, վկայ է Աստուած։
21 Յետոյ անմիջապէս Սուրիայի եւ Կիլիկիայի կողմերը եկայ,
22 այնպէս որ՝ Հրէաստանի քրիստոնեայ համայնքին համար անծանօթ մնացի։
23 Բայց որովհետեւ յաճախ ուրիշներէն լսած էին՝ թէ «Ան որ ժամանակին մեզ կը հալածէր՝ հիմա ի՛նք ալ կը քարոզէ այն հաւատքը որ ժամանակին արմատախիլ կ՚ընէր»,
24 ինձմով զԱստուած կը փառաւորէին։