Colossians 4
1 Իսկ դուք, տէրե՛ր, իրաւունք եւ արդարութիւն ըրէք ձեր ծառաներուն։ Գիտցէք, որ դուք ալ Տէր մը ունիք երկինքի մէջ։
2 Շարունակ աղօթեցէք՝ արթուն հսկելով, միշտ գոհութիւն յայտնելով Աստուծոյ։
3 Միեւնոյն ատեն աղօթեցէք նաեւ մեզի համար, որպէսզի Աստուած իր խօսքը քարոզե— լու լայն պատեհութիւն տայ մեզի, եւ կարենանք պարզել Քրիստոսի ծածուկ ծրագիրը, որուն համար բանտը կը գտնուիմ։
4 Աղօթեցէք որ կարենամ ամենուն յայտնի դարձնել այդ ծրագիրը, այնպէս՝ ինչպէս որ պէտք է։
5 Իմաստութեամբ վարուեցէք չհաւատացողներուն հետ, եւ ժամանակը օգտագործեցէք։
6 Ձեր խօսքերը միշտ շնորհալի թող ըլլան, աղով համեմուած, եւ գիտցէք՝ ի՛նչպէս պէտք է պատասխանէք իւրաքանչիւր մարդու։
7 Իմ մասիս պատմելիք ինչ որ կայ՝ թող ձեզի պատմէ Տիքիկոսը, որ Տիրոջ միացած մեր սիրելի եղբայրն է, հաւատարիմ օգնականը եւ ծառայակիցը։
8 Ճիշդ ատոր համար զինք ղրկեցի ձեզի, որպէսզի մեր մասին պէտք եղածը գիտնաք եւ ձեր սիրտերը հանգստանան։
9 Ինք եւ Ոնեսիմոս, ձեր հայրենակիցը եւ մեր հաւատարիմ ու սիրելի եղբայրը, թող ձեզի պատմեն այստեղի բոլոր անցուդարձերը։
10 Ձեզի բարեւ ունի Արիստարքոսը, իմ բանտակիցս, ինչպէս նաեւ՝ Մարկոսը, Բառնաբասի եղբօրորդին, որուն մասին լուր ղրկած էի՝ որ երբ ձեր մօտ գայ՝ ընդունիք զինք։
11 Ձեզի բարեւ կ՚ընէ նաեւ Յիսուսը, որ Յուստոս ալ կը կոչուի։ Այս երեքը միակ Հրեաներն էին, որ Աստուծոյ արքայութիւնը քարոզելու մէջ այստեղ գործակից եղան ինծի, եւ ատով ալ մխիթարութիւն եղան ինծի համար։
12 Ձեզի բարեւ կ՚ընէ ձեր հայրենակիցը՝ Եպաֆրասը, Քրիստոս Յիսուսի ծառան, որ շարունակ իր աղօթքներով կը տքնի ձեզի համար, որպէսզի հոգեւորապէս կատարեալ ըլլաք, կատարելապէս տեղեակ Աստուծոյ կամքին։
13 Իր մասին կը վկայեմ, որ մեծ աշխատանք տարաւ ձեզի եւ Լաւոդիկիացիներուն համար, ինչպէս նաեւ Երապոլիսի եղբայրներուն համար։
14 Ձեզի բարեւներ ունին նաեւ սիրելի բժիշկ Ղուկասը եւ Դեմասը։
15 Դուք ալ բարեւ ըրէք Լաւոդիկիա գտնուող եղբայր— ներուն, Նիմֆային եւ իր տունը հաւաքուող եկեղեցիին ։
16 Այս նամակը ձեր մէջ կարդալէ ետք՝ այնպէս ըրէք որ Լաւոդիկիայի եկեղեցիին մէջ ալ կարդացուի։ Կ՚ուզեմ որ նոյնպէս կարդաք Լաւոդիկիացիներուն նամակը։
17 Եւ Արքիպպոսին ըսէք. «Նայէ որ իր կատարումին հասցնես պաշտօնդ, որ Տէրը տուաւ քեզի»։
18 Ես՝ Պօղոս, այս բարեւը իմ ձեռքովս կը գրեմ։ Յիշեցէ՛ք կապանքներս։ Աստուծոյ շնորհքը ձեզի հետ ըլլայ։