Bible

1 Ստեփանոսի քարկոծումը պահանջողներէն մէկն ալ Սօղոսն էր։ Նոյն օրը Երուսպղէմի եկեղեցւոյ դէմ մեծ հալածանք սկսաւ, որուն հետեւանքով՝ բացի առաքեալներէն բոլոր միւսները ցրուեցան Հրէաստանի եւ Սամարիայի գիւղերը։ 2 Իսկ քանի մը բարեպաշտներ Ստեփանոսի մարմինը տարին թաղեցին, մեծ կոծ ընելով անոր վրայ։ 3 Սօղոս կ՚աշխատէր ոչնչացնել եկեղեցին ։ Տունէ տուն կը մտնէր եւ հաւատացեալ այրերն ու կիները դուրս քաշկռտելով՝ բանտ դնել կու տար։ 4 Ասոր վրայ՝ հաւատացեալները ցրուեցան եւ երկրին զանազան կողմերը շրջելով Աւետարանի պատգամը կը քարոզէին։ 5 Այսպէս, Փիլիպպոս Սամարիա քաղաքը գնաց եւ խոստացուած Փրկիչը քարոզեց անոնց։ 6 Մեծ բազմութիւններ ականջ կու տային անոր քարոզութեան, որովհետեւ թէ՛ կը լսէին եւ թէ՛ կը տեսնէին անոր կատարած հրաշքները։ 7 Արդարեւ, պիղծ ոգիներ մեծ աղաղակով դուրս կու գային բազմաթիւ մարդոցմէ, եւ մեծ թիւով անդամալոյծներ ու կաղեր կը բժշկուէին։ 8 Այնպէս որ, ուրախութիւնը մեծ էր այդ քաղաքին մէջ։ 9 Նոյն քաղաքին մէջ կար Սիմոն անունով մէկը, որ երկար ատենէ ի վեր այնտեղ էր եւ կախարդութիւն ընելով կ՚ապշեցնէր Սամարացիները. 10 պզտիկէն մեծ բոլորն ալ անոր վրայ հիացած, կ՚ըսէին. –Այս մարդը ինքը՝ Աստուծոյ զօրութիւնն է, որ Մեծ Զօրութիւն կը կոչուի։ 11 Իսկապէս ալ հիացած էին անով, որովհետեւ երկար ժամանակէ ի վեր իր կախարդութեամբ կ՚ապշեցնէր զանոնք, ինքզինք իբրեւ կարեւոր մէկը ներկայացնելով։ 12 Բայց երբ հաւատացին Փիլիպպոսի, որ Աստուծոյ արքայութեան եւ Յիսուս Քրիստոսի մասին կը քարոզէր, այր թէ կին բոլորն ալ մկրտուեցան։ 13 Սիմոն ինքն ալ հաւատաց, եւ մկրտուելէ ետք՝ Փիլիպպոսի քովէն չէր հեռանար. եւ տեսնելով այն նշաններն ու մեծամեծ հրաշքները որ Փիլիպպոս կը կատարէր, կը զարմանար։ 14 Առաքեալները, որոնք Երուսաղէմ կը մնային, երբ լսեցին թէ Սամարացիներ Աստուծոյ խօսքը ընդունեցին, անոնց քով ղրկեցին Պետրոսն ու Յովհաննէսը, 15 որոնք երբ հասան՝ աղօթեցին անոնց վրայ, որպէսզի Սուրբ Հոգին ստանան, 16 որովհետեւ մինչ այդ Սուրբ Հոգին անոնցմէ ոեւէ մէկուն վրայ չէր իջած, այլ միայն Տէր Յիսուսի անունով մկրտուած էին։ 17 Այն ատեն Պետրոս եւ Յովհաննէս իրենց ձեռքերը դրին անոնց գլխուն եւ անոնք Սուրբ Հոգին ստացան։ 18 Երբ Սիմոն տեսաւ թէ առաքեալներու ձեռք դնելովը Սուրբ Հոգին կը տրուի, անոնց դրամ խոստանալով՝ ըսաւ. – 19 Ինծի՛ ալ տուէք այդ կարողութիւնը, որպէսզի որուն վրայ որ ձեռք դնեմ՝ Սուրբ Հոգին ստանայ։ 20 Ասոր վրայ Պետրոս ըսաւ անոր. –Կորսուէ՛, դո՛ւն ալ, դրամդ ալ. կարծեցիր որ Աստուծոյ պարգեւը կրնա՞ս դրամով գնել։ 21 Այս բոլորին մէջ մաս եւ բաժին պիտի չունենաս, քանի որ ուղիղ չես խորհիր Աստուծոյ մասին։ 22 Հետեւաբար դարձի՛ր այդ չար խորհուրդէդ եւ աղաչէ՝ որ Տէրը ներէ քու մտքիդ այս նենգ խորհուրդը։ 23 Որովհետեւ կը տեսնեմ թէ դառն նախանձով լեցուն ես եւ մեղքի կապանքներուն մէջ բռնուած։ 24 Սիմոն ըսաւ. –Ինծի համար աղաչեցէք Տիրոջ, որ ձեր ըսածներէն ոեւէ մէկը չպատահի ինծի։ 25 Իսկ առաքեալները իրենց վկայութիւնը տալէ եւ Տիրոջ խօսքը քարոզելէ ետք՝ վերադարձան Երուսաղէմ, ճամբու վրայ Սամարիայի բազմաթիւ գիւղերու մէջ Աւետարանը քարոզելով։ 26 Տիրոջ հրեշտակը Փիլիպպոսի խօսեցաւ, ըսելով. –Ե՛լ, հարաւ գնա, այն ճամբան՝ որ Երուսաղէմէն Կազա կ՚իջնէ եւ ամայի է։ 27 Փիլիպպոս ելաւ գնաց։ Եւ ահաւասիկ Եթովպիացի ներքինի մը, որ Եթովպիացիներու Կանդակին, այսինքն՝ թագուհիին բարձրաստիճան մէկ պաշտօնեան էր, անոր ընդհանուր գանձապետը, եւ Երուսաղէմ եկած էր Աստուծոյ երկրպագելու, 28 այնտեղէն դարձին՝ իր կառքին մէջ նստած՝ Եսայի մարգարէի գիրքը կը կարդար։ 29 Սուրբ Հոգին ըսաւ Փիլիպպոսի. –Մօտեցի՛ր եւ այդ կառքին քովէն քալէ։ 30 Երբ Փիլիպպոս վազելով հասաւ կառքին, լսեց որ անիկա Եսայի մարգարէն կը կարդար բարձրաձայն։ Հարցուց. –Կը հասկնա՞ս ինչ որ կը կարդաս։ 31 Իսկ անիկա պատասխանեց. –Ի՞նչպէս կրնամ հասկնալ, եթէ մէկը ինծի չբացատրէ։ Ապա խնդրեց որ Փիլիպպոս ելլէ իր քով նստի։ 32 Իր կարդացած հատուածը հետեւեալն էր.– «Ոչխարի պէս մորթուելու տարուեցաւ. եւ ինչպէս գառնուկ մը անմռունչ կը կենայ զինք խուզողին դիմաց, այնպէս՝ իր բերանը չբացաւ։ 33 Անիկա նուաստացաւ եւ չունեցաւ մէկը որ զինք պաշտպանէր. ո՞վ պիտի պատմէ իր սերունդին մասին, որովհետեւահաիրկեանքըկըվերցուիայսաշխարհէն»։ 34 Ներքինին հարցուց Փիլիպպոսի. –Կ՚աղաչեմ, ըսէ՛, որո՞ւ համար կ՚ըսէ մարգարէն այս բաները. իրե՞ն թէ ուրիշի մը համար։ 35 Այն ատեն Փիլիպպոս Սուրբ գիրքի այդ հատուածէն սկսելով՝ անոր աւետարանեց Յիսուսը։ 36 Մինչ անոնք կ՚երթային, ճամբուն վրայ հանդիպեցան տեղ մը, ուր ջուր կար։ Ներքինին ըսաւ. –Ահա այստեղ ջուր կայ. ոեւէ արգելք կա՞յ որ մկրտուիմ։ 37 Փիլիպպոս պատասխանեց. –Եթէ ամբողջ սրտովդ կը հաւատաս, կրնաս մկրտուիլ։ –Կը հաւատամ՝ թէ Յիսուս Քրիստոս Աստուծոյ Որդին է,– պատասխանեց ներքինին, 38 եւ կառապանին հրամայեց որ կառքը կեցնէ։ Փիլիպպոս եւ ներքինին երկուքը միասին ջուր մտան, եւ Փիլիպպոս մկրտեց զայն։ 39 Երբ ջուրէն դուրս ելան, Սուրբ Հոգին իջաւ ներքինիին վրայ, եւ Տիրոջ հրեշտակը յափշտակեց տարաւ Փիլիպպոսը. այնպէս որ ներքինին այլեւս չտեսաւ զայն, եւ իր ճամբան շարունակեց ուրախութեամբ։ 40 Իսկ Փիլիպպոս ինքզինք Ազոտոսի մէջ գտաւ։ Կը շրջէր ու կ՚աւետարանէր բոլոր քաղաքներուն մէջ, մինչեւ եկաւ Կեսարիա։