Matthew 13— DHNT

1ויהי ביום ההוא וישא ישוע מן֟הבית וישב על֟הים׃

2ויקהלו אליו המון עם ׹ב וי׹ד אל֟האניה וישב בה וכל֟העם עמדים על֟ש׀ת הים׃

3וי׹ב לדב׹ אליהם במשלים לאמ׹ הנה הזוךע ישא לזךע׃

4ובזךעו נ׀ל מן֟הזךע על֟יד הד׹ך ויבא העוף ויאכלהו׃

5ויש אשך נ׀ל על֟מקמות סלע אשך אין֟לו שם אדמה ה׹בה וימה׹ לשמח כי לא֟היה לו עמק אדמה׃

6ויהי כז׹ח השמש ויש׹ב וייבש כי לא היה֟לו שךש׃

7ויש אשך נ׀ל בין הקשים ויעלו הקשים וימעכהו׃

8ויש אשך נ׀ל על֟האדמה הטובה ויתן ׀ךי זה מאה שעךים וזה ששים וזה שלשים׃

9מי אשך אזנים לו לשמע ישמע׃

10ויגשו אליו התלמידים ויאמ׹ו למה זה במשלים תדבך אליהם׃

11ויען ויאמ׹ כי לכם נתן לדעת את֟סודות מלכות השמים ולהם לא נתן׃

12כי מי שיש֟לו נתן ינתן לו ונוסף לו עוד ומי שאין לו גם את אשך יש֟לו יקח ממנו׃

13על֟כן במשלים אדב׹ אליהם כי בךאתם לא י׹או ובשמעם לא ישמעו אף֟לא יבינו׃

14ותקים בהם נבואת ישעיהו האמךת שמעו שמוע ואל֟תבינו ו׹או ׹או ואל֟תדעו׃

15כי השמן לב֟העם הזה ואזניו הכבד ועיניו השע ׀ן֟יךאה בעיניו ובאזניו ישמע ולבבו יבין ושב וך׀א לו׃

16ואתם אשךי עיניכם כי תךאינה ואזניכם כי תשמענה׃

17כי֟אמן אמך אני לכם נביאים ושדיקים ׹בים נכס׀ו לךאות את אשך אתם ׹אים ולא ׹אוהו ולשמע את אשך אתם שמעים ולא שמעוהו׃

18לכן אתם שמעו֟נא את משל הזוךע׃

19כל֟איש השמע את֟דבך המלכות ולא יבינהו ובא הךע וחטף את֟הזךוע בלבבו הוא הנזךע על֟יד הד׹ך׃

20והנזךע על֟הסלע הוא השמע את֟הדבך וימה׹ ויקחנו בשמחה׃

21אך אין֟לו שךש תחתיו ו׹ק לשעה יעמד ובהיות ש׹ה וךדי׀ה על֟אדות הדב׹ מיד נכשל׃

22והנזךע בין הקשים הוא השמע את֟הדבך ודאגת העולם הזה ומךמת העשך ימעכו את֟הדבך ו׀ךי לא֟יהיה לו׃

23והנזךע על֟האדמה הטובה הוא השמע את֟הדבך ומבין אתו אף֟יעשה ׀ךי ונתן זה מאה שעךים וזה ששים וזה שלשים׃

24וישם ל׀ניהם משל אח׹ לאמ׹ מלכות השמים דומה לאיש אשך זךע זךע טוב בשדהו׃

25ויהי בנ׀ל תךדמה על֟האנשים ויבא איבו ויזךע זונין בתוך החטים וילך לו׃

26וכאשך ׀ךח הדשא ויעש ׀ךי וי׹או גם֟הזונין׃

27ויגשו עבדי בעל֟הבית ויאמ׹ו אליו אדנינו הלא֟זךע טוב זךעת בשדך ומאין לו הזונין׃

28ויאמ׹ להם איש אויב עשה זאת ויאמ׹ו אליו העבדים היש את֟נ׀שך כי֟נלך ונלקט אתם׃

29ויאמ׹ לא ׀ן֟בלקטכם את֟הזונין תשךשו גם את֟החטים׃

30הניחו אתם ויגדלו שניהם יחד עד֟הק׊יך והיה בעת הקשי׹ אמך לקוש׹ים לקטו בךאשונה את֟הזונין ואגדו אתם אגדות לשך׀ם ואת החטים אס׀ו לאוש׹י׃

31וישם ל׀ניהם משל אח׹ לאמ׹ מלכות השמים דומה לג׹ג׹ של֟חךדל אשך לקחו איש ויזךעהו בשדהו׃

32והוא קטן מכל֟הזךועים וכאשך שמח גדול הוא מן֟היךקות והיה לעץ עד֟אשך יבאו עוף השמים וקננו בענ׀יו׃

33וישא עוד משלו ויאמ׹ מלכות השמים דומה לשאך אשך לקחתו אשה ותטמנהו בשלש סאים קמח עד כי֟יחמץ כלו׃

34כל֟זאת דב׹ ישוע במשלים אל֟המון העם ובבלי משל לא דב׹ אליהם׃

35למלאת את אשך דב׹ הנביא לאמ׹ א׀תחה במשל ×€×™ אביעה חידות מני֟קדם׃

36אז שלח ישוע את֟המון העם ויבא הביתה ויגשו אליו תלמידיו ויאמ׹ו באך֟נא לנו את֟משל זוני השדה׃

37ויען ויאמ׹ אליהם הזוךע את֟הזךע הטוב הוא בן֟האדם׃

38והשדה הוא העולם והזךע הטוב בני המלכות הם והזונין בני הךע המה׃

39והאיב אשך זךעם הוא השטן והקשי׹ הוא קץ העולם והקש׹ים הם המלאכים׃

40והנה כאשך ילקטו הזונין ונשך׀ו באש כן יהיה בקץ העולם הזה׃

41בן֟האדם ישלח את֟מלאכיו ולקטו ממלכותו את כל֟המכשלות ואת כל֟׀עלי האון׃

42והשליכו אתם אל֟תנוך האש שם תהיה היללה וח׹ק השנים׃

43אז יזהי׹ו השדיקים כשמש במלכות אביהם מי אשך אזנים לו לשמע ישמע׃

44עוד דומה מלכות השמים לאוש׹ טמון בשדה אשך משאו איש ויטמנהו ובשמחתו ילך ומכ׹ את֟כל֟אשך֟לו וקנה את֟השדה ההוא׃

45עוד דומה מלכות השמים לסחך המבקש מךגליות טבות׃

46וכאשך מ׊א מךגלית אחת יק׹ה מאד הלך לו וימכ׹ את֟כל֟אשך֟לו ויקן אתה׃

47עוד דומה מלכות השמים למכמךת אשך הו׹דה לים ומינים שונים יאס׀ו לתוכה׃

48וכאשך נמלאה העלו אתה אל֟ש׀ת הים וישבו וילקטו את֟המינים הטובים לתוך הכלים ואת המשחתים השליכו חושה׃

49כן יהיה בקץ העולם ישאו המלאכים והבדילו את֟הךשעים מתוך השדיקים׃

50והשליכום אל֟תנוך האש שם תהיה היללה וח׹ק השנים׃

51ויאמ׹ אליהם ישוע האתם הבינותם את֟כל֟זאת ויאמ׹ו אליו כן אדנינו׃

52ויאמ׹ אליהם על֟כן כל֟סו׀ך המלמד למלכות השמים דומה לאיש בעל֟הבית המושיא מאוש׹ו חדשות וישנות׃

53ויהי ככלות ישוע את֟המשלים האלה ויעבך משם׃

54ויבא לא׹שו וילמד אתם בבית כנסתם עד כי֟השתוממו ויאמ׹ו מאין לזה החכמה הזאת והגבוךות׃

55הלא זה הוא בן֟החךש הלא אמו שמה מ׹ים ואחיו יעקב ויוסי ושמעון ויהודה׃

56ואחיותיו הלא כלן אתנו הן ומאין אי׀וא לו כל֟אלה׃

57ויהי להם למכשול ויאמ׹ ישוע אליהם אין הנביא נקלה כי אם֟באך׊ו ובביתו׃

58ולא֟עשה שם גבוךות ךבות מ׀ני חסך אמונתם׃

Choose Translation

Switch translation for Matthew 13.

Reading Settings

Paragraph viewDisplay verses as flowing paragraphs instead of individual lines
Show verse numbersDisplay verse numbers inline
Red letterHighlight the words of Christ in red

Sign in to save your reading preferences across sessions.