2 Corinthians 1— DHNT

¹פולוס שליח ישוע המשיח ברצון אלהים וטימותיוס אחינו אל־קהלת אלהים אשר בקורנתוס עם כל־הקדשים אשר באכיא׃

²חסד לכם ושלום מאת האלהים אבינו ואדנינו ישוע המשיח׃

³ברוך האלהים ואבי אדנינו ישוע המשיח אב הרחמים ואלהי כל־הנחמה׃

⁴המנחם אתנו בכל־לחצנו עד־שנוכל לנחם הנלחצים בכל־לחץ בנחמה אשר אנחנו מנחמים בה מאת האלהים׃

⁵כי כרב ענויי המשיח בנו כן תרבה נחמתנו על־ידי המשיח׃

⁶והנה אם־נלחץ הוא לנחמתכם ולישועתכם אשר יראה כחה בסבלכם הענוים אשר נסבל אתן גם־אנחנו ואם־ננחם גם־הוא לנחמתכם ולישועתכם׃

⁷ותקותנו בעדכם נכונה היא באשר ידענו כי כאשר חלק לכם בענוים כן גם־חלק לכם בנחמה׃

⁸כי לא־נכחד מכם אחי את־צרתנו אשר מצאתנו באסיא אשר כבדה עלינו עד־למאד ויותר מכחנו עד כי־נואשנו מן־החיים׃

⁹ואנחנו בלבבנו חרצנו לנו את־המות למען לא־נהיה בטחים בנפשנו כי אם־באלהים המחיה את־המתים׃

¹⁰אשר הצילנו ממות כזה ועודנו מציל ולו אנחנו מקוים כי יוסיף להצילנו׃

¹¹בעזרכם אתנו בתפלתכם למען יודו רבים בעדנו על־מתנת החסד שהיתה לנו על־ידי רבים׃

¹²כי זאת היא תהלתנו עדות לבבנו אשר בתם וישר אלהים התהלכנו בעולם וביותר אתכם ולא־בחכמת הבשר כי אם־בחסד אלהים׃

¹³כי לא־נכתב לכם כי אם־מה־שאתם קראים או גם־ידעים׃

¹⁴ואקוה כי כאשר ידעתם אתנו למקצת אף־תדעו עד־תכלית כי אנחנו תהלתכם כאשר גם־אתם תהלתנו ביום אדנינו ישוע׃

¹⁵ובבטחון הזה חפצתי לבוא אליכם מראש למען תקבלו טובה פעמים׃

¹⁶לעבר בתוככם אל־מקדוניא ולשוב ממקדוניא אליכם ואתם תשלחוני אל־ארץ יהודה׃

¹⁷ועתה הכי נמהר הייתי בעצתי אם־אשר יעצתי לפי הבשר יעצתי והיה אצלי פעם הן הן ופעם לא לא׃

¹⁸אכן נאמן האלהים כי־דברנו אליכם לא היה הן ולא׃

¹⁹כי בן־האלהים ישוע המשיח הנקרא בתוככם על־ידינו על־ידי ועל־ידי סלונוס וטימותיוס הוא לא היה הן ולא כי־היו היה בו רק־הן׃

²⁰כי כל־הבטחות האלהים כלן בו היו הן ובו היו אמן לכבוד האלהים על־ידינו׃

²¹והמכונן אותנו אתכם במשיח ואשר משחנו הוא האלהים׃

²²אשר גם־חתמנו ואשר נתן בלבנו את ערבון הרוח׃

²³ואני את־האלהים אקרא להיות עד לנפשי כי בעבור היותי חס עליכם לא־באתי עוד לקורנתוס׃

²⁴לא שנמשל באמונתכם כי אם־עזרים אנחנו לשמחתכם כי באמונה עמדתם׃