Proverbs 30— NLV

¹Die woorde van Agur seun van Jake. ’n Uitspraak. Die man het vir Itiël gesê, vir Itiël en vir Ukal:

²Ek is te onkundig om ’n mens te wees. Ek het nie eens die verstand van ’n mens nie.

³Ek het nie wysheid aangeleer nie. Ek ken nie die heilige God nie.

⁴Wie kan na die hemel toe gaan en van daar af ondertoe kom? Wie kan die wind in sy twee hande vashou? Wie kan die waters in sy jas toedraai? Wie het die wye wêreld gemaak? Wat is sy naam? En die naam van sy seun? Sê tog as jy dit weet!

⁵Elke woord van God is getoets. Hy beskerm elkeen wat beskerming by Hom kom soek.

⁶Moenie iets byvoeg by wat Hy gesê het nie. Hy sal jou straf. Jy sal leuenaar genoem word.

⁷Twee dinge wil ek van U vra. Moenie dit weier solank ek leef nie.

⁸In die eerste plek, keer tog dat ek lieg. In die tweede plek, laat my nie arm of ryk wees nie. Gee asseblief vir my net dit wat nodig is.

⁹As ek te veel het, sal ek U verloën en vra: “Nou wie is die Here?” As ek te arm is, sal ek steel en my God se Naam beswadder.

¹⁰Moet nooit ’n slaaf vals beskuldig by sy eienaar nie. Hy sal jou vervloek en dan moet jy die gelag betaal.

¹¹Party mense vervloek hulle pa en weier om hulle ma te seën.

¹²Dis mense wat dink hulle is foutloos, maar die vuil kan nooit van hulle afgewas word nie.

¹³Hulle is vol hoogmoed en vol van hulleself.

¹⁴Hulle het tande soos swaarde en slagtande soos messe. Hulle teer op die hulpeloses en die armes onder mense.

¹⁵Die bloedsuier het twee dogters. Die een se naam is “Gee!” en die ander s’n ook “Gee!”. Daar is drie dinge, nee, eintlik vier, wat nooit tevrede is nie:

¹⁶die doderyk, die onvervulde begeerte om ma te word, grond wat uitgedor is, ’n vuur wat alles wil verteer.

¹⁷Die oë van ’n man wat spot met sy pa, en hy wat ongehoorsaam is aan sy ma — die kraaie in die droë lope sal sy oë uitpik; en roofvoëls sal hom opvreet.

¹⁸Daar is drie dinge wat vir my te verbasend is, nee, eintlik is daar vier wat ek glad nie kan verstaan nie:

¹⁹hoe ’n arend in die lug kan bly, hoe ’n slang teen ’n rots kan uitseil, hoe ’n skip op die see kan vaar en hoe ’n man die hart van ’n meisie wen.

²⁰Net so verbasend is dit wanneer ’n wellustige vrou haar seksuele sin kry, haar mond afvee en dan kan sê: “Ek het niks verkeerds gedoen nie.”

²¹Daar is drie, nee, eintlik vier dinge wat die lewe op aarde ondraaglik maak:

²²’n slaaf wat koning geword het, ’n dwaas wat hom vol geëet het,

²³’n vrou wat nie ’n man kon kry nie en toe tog getrou het, en ’n bediende wat by haar eienares oorgeneem het.

²⁴Daar is vier goed op aarde wat klein is, maar uitsonderlik wys:

²⁵miere wat nie sterk is nie, maar tog reeds weet om in die somer kos weg te sit;

²⁶dassies wat nie baie krag het nie, maar tog tussen die rotse bly;

²⁷sprinkane wat nie ’n koning het nie, en tog in gelid beweeg;

²⁸geitjies wat jy met die hande vang, maar tog in paleise van konings bly.

²⁹Daar is drie, nee, eintlik vier wat pronkerig kan beweeg:

³⁰’n leeu, die koning van die diere, wat vir niks uitdraai nie;

³¹’n oorlogsperd; ’n bokram; ’n koning omring deur sy leër.

³²As jy dom opgetree het deur jou aan te matig of slegte dinge beplan het, sit dan jou hand voor jou mond.

³³Melk wat gekarring word, maak botter. ’n Hou op die neus laat die bloed loop. As jy mense kwaad maak, gaan daar rusie kom.