Proverbs 10— NLV

¹Die spreuke van Salomo. ’n Kind wat verstandig is, maak sy pa bly. ’n Seun wat dwaas is, maak sy ma hartseer.

²Goed wat onwettig verkry is, bring geen blywende voordeel nie. Om reg te lewe, red ’n mens van die dood.

³Die Here laat regverdiges nie honger ly nie. Hy vervul nie die begeerte van die goddelose nie.

⁴Mense wat lui is, word gou arm. Hulle wat fluks is, word ryk.

⁵Die verstandige mens samel sy oes in in die somer. Hy wat in die oestyd slaap, bring skande oor homself.

⁶Die regverdige word oorlaai met seëninge. Die slegte bedoelings van goddeloses steek hulle weg agter woorde.

⁷Dié wat reg lewe, sal lank onthou word. Hulle wat verkeerd gelewe het, sal gou vergeet word.

⁸’n Mens met verstand aanvaar bevele. Hulle wat onsin babbel, bereik niks.

⁹Die een wat opreg lewe, lewe in veiligheid. Die een wat kronkelpaaie loop, kom tot ’n val.

¹⁰Hy wat skelmstreke uitdink, veroorsaak moeilikheid. Hy wat aanhou onsin praat, kom self tot ’n val.

¹¹Die woorde van die regverdige is soos ’n fontein van lewe. Die woorde van goddeloses steek geweld weg.

¹²Haat bring rusie. Liefde bedek wat verkeerd gedoen is.

¹³Iemand wat insig het, sê dinge wat verstandig is. Die een wat onverstandig is, kry slae.

¹⁴Wyse mense versamel kennis. Dwase se gebabbel bring spoedig teëspoed.

¹⁵Die ryke se eiendom gee vir hom beskerming. Armoede is die arm mens se ondergang.

¹⁶Wat die regverdige verdien, gebruik hy om van te lewe. Wat die goddelose verdien, verkwis hy op oortredings.

¹⁷Mense wat hulle laat reghelp, is op die pad na die lewe. Hulle wat teregwysing verwerp, laat ander verdwaal.

¹⁸Wie sy haat agter woorde wegsteek, is ’n leuenaar. Hy wat skinderstories versprei, is ’n dwaas.

¹⁹Meer woorde bring nie minder sonde nie. Hy wat sy woorde tel, is verstandig.

²⁰Die woorde van die regverdige is soos gekeurde silwer. Die gedagtes van die goddelose is min werd.

²¹Die regverdiges bring lewe deur hulle woorde. Die dwase vernietig hulleself weens ’n gebrek aan gesonde verstand.

²²Dit is die Here se seën wat rykdom bring. Hy gee nie hartseer daarmee saam nie.

²³Dit is vir die dwaas lekker om verkeerd op te tree. Mense met insig geniet die wysheid.

²⁴Goddelose mense kom die dinge oor waarvoor hulle bang is. Die regverdige kry waarvoor hy gehoop het.

²⁵Wanneer teëspoed kom soos ’n stormwind, is goddeloses daarmee heen, maar die regverdiges bly stewig staan.

²⁶’n Lui mens is ’n aanstoot vir dié wat hom werk gee. Hy is soos asyn tussen die tande, of soos rook in die oë.

²⁷Hy wat ontsag het vir die Here, maak sy lewe langer; die goddelose se lewe word kortgeknip.

²⁸Die regverdiges kan vreugde verwag, maar goddeloses het geen hoop nie.

²⁹Wat die Here laat gebeur, versterk dié wat reg lewe. Dit vernietig egter hulle wat kwaad doen.

³⁰Die regverdige sal nooit wankel nie. Die goddeloses sal nie in die land bly woon nie.

³¹Uit die mond van regverdiges kom wysheid. ’n Tong wat kwaad saai, sal afgesny word.

³²Die regverdige weet wat die gepaste dinge is om te sê. Wat die goddeloses sê, bring moeilikheid.