Job 33— NLV

¹“Luister na my woorde, Job! Hoor alles wat ek wil sê!

²Ek het nou begin, laat my praat.

³Ek praat in opregtheid, ek het die waarheid in my mond.

⁴Die Gees van God het my gemaak, die asem van die Almagtige gee my lewe.

⁵Antwoord my dan, as jy kan! Berei jou voor en stel jou standpunt.

⁶Kyk, ek en jy is dieselfde voor God. Ek is ook van stof gemaak.

⁷Daarom hoef jy nie vir my bang te wees nie. Ek gaan nie hard op jou afkom nie.

⁸“Ek het na jou geluister, ek het elke woord gehoor wat jy gesê het.

⁹Jy sê: ‘Ek is rein, sonder sonde, ek is onskuldig, ek het nie gesondig nie.

¹⁰God soek skoor met my. Hy beskou my as sy vyand.

¹¹Hy sit my voete in die blok. Elke tree van my hou Hy dop.’

¹²“Ek sê vir jou jy is verkeerd. Jy het self gesê: ‘God is groter as ’n mens.’

¹³Nou, waarom bring jy dan ’n klag teen Hom? Jy sê: ‘Hy luister nie na mense nie.’

¹⁴Maar God praat op verskillende maniere. Ons kom dit net nie agter nie.

¹⁵Hy praat deur drome en visioene, in die nag wanneer mense diep slaap en op hulle beddens lê.

¹⁶Hy fluister in hulle ore en verskrik hulle met sy waarskuwings.

¹⁷Hy laat mense van gedagte verander om hulle van verkeerde dade weg te hou, en hulle van hoogmoed te weerhou.

¹⁸Hy red hulle van die graf, van die diep rivier van die dood.

¹⁹Soms praat Hy met mense deur ernstige siekte op ’n siekbed, as pyn aan hulle liggaam knaag.

²⁰Dan verloor mense hulle eetlus. Die lekkerste kos walg hulle.

²¹Hulle is later net vel en been.

²²Hulle staan met die een voet in die graf. Die dood wag vir hulle.

²³“Maar as ’n hemelse boodskapper, ’n baie unieke een, intree vir so ’n persoon en hom regverdig verklaar,

²⁴sal God hom genadig wees en sê: ‘Laat hom vry. Moenie dat hy sterf nie, want Ek het ’n losprys gevind vir sy lewe.’

²⁵Dan word sy liggaam weer so gesond soos dié van ’n kind, ferm en jeugdig soos toe hy jonk was.

²⁶As hy bid tot God, sal Hy hom aanvaar. God sal hom met vreugde ontvang, en hom ’n mens maak wat reg lewe.

²⁷Hy sal vir sy vriende sê: ‘Ek het gesondig en verkeerd gedoen, maar God het my nie gestraf soos wat ek verdien het nie.

²⁸God het my gered van die graf, en nou is my lewe gevul met lig.’

²⁹“Ja, God doen al hierdie dinge vir mense, weer en weer.

³⁰Hy red hulle van die graf sodat hulle mag lewe in die lig van die lewendes.

³¹“Luister mooi, Job. Luister na my. Bly stil en laat my nog praat.

³²As jy my kan antwoord, praat dan. Ek sou jou graag gelyk wou gee dat jy geregverdig is.

³³As jy niks het om te sê nie, luister dan na my. Ek sal vir jou wysheid leer.”