Job 31— NLV

¹“Ek het myself belowe dat ek nooit na ’n jong meisie sal kyk om haar te begeer nie.

²Wat het God daarbo vir ons gekies? Wat is ons erfdeel van die Almagtige?

³Dit is ellende vir die kwaaddoener en rampe vir die boosdoener.

⁴Sien Hy nie hoe ek optree nie? Tel Hy nie elke tree wat ek gee nie?

⁵“Het ek ooit vir iemand gelieg, of iemand bedrieg?

⁶Laat God my dan weeg met die regte maatstaf. Hy ken my onskuld.

⁷Het ek van die regte pad afgedwaal? Of het ek iets begeer wat ek gesien het? Is ek skuldig aan enige ander sonde?

⁸Laat iemand anders dan oes wat ek geplant het en alles uitpluk wat ek gesaai het.

⁹“As ek verlei is deur ’n vrou of my buurman se vrou begeer het,

¹⁰mag my vrou aan ’n ander behoort en ander mans by haar slaap.

¹¹Want wellus is ’n skandelike sonde, ’n misdaad wat gestraf moet word.

¹²Dit is ’n vernietigende vuur. Dit sou alles verwoes het wat ek besit.

¹³“As ek onregverdig was teenoor my manlike en vroulike werkers, of geweier het om na hulle te luister,

¹⁴hoe sou ek God in die oë kon kyk wanneer Hy my tot verantwoording roep? Wat sou ek antwoord as Hy my daaroor ondervra?

¹⁵Want Hy het my en my werkers gemaak. Hy is ons almal se Skepper.

¹⁶“Het ek geweier om die armes te help? Of die hoop vernietig van die weduwees wat na my gekyk het vir hulp?

¹⁷Was ek suinig met my kos en het ek geweier om dit te deel met honger weeskinders?

¹⁸Nee! Van jongs af sorg ek vir weeskinders soos ’n pa. My hele lewe lank gee ek om vir weduwees.

¹⁹Waar ek ook al mense dakloos en ’n arm man sonder klere gesien het,

²⁰het hulle my geprys omdat ek vir hulle wolklere gegee het om hulle warm te hou.

²¹As ek gewelddadig was teenoor ’n weeskind omdat ek gedink het ek sou daarmee wegkom —

²²mag my arm dan uit sy potjie gedraai word! Mag my arm van my skouer afgeruk word!

²³Dit sou beter wees as om onder die oordeel van God te kom. Want as ek teen die Allerhoogste moet staan, watter hoop is daar vir my?

²⁴“Het ek op geld vertrou, of gedink is ek veilig omdat ek baie goud besit?

²⁵Hang my geluk af van my rykdom en alles wat ek besit?

²⁶Het ek ooit gekyk na die son wat skyn, of na die maan se silwerbaan deur die ruimte,

²⁷en my heimlik laat verlei om hulle te aanbid?

²⁸As dit so was, sou regters my gestraf het, want ek sou die God van die hemel verloën het.

²⁹“Het ek ooit gejuig by die ondergang van my vyande? Of was ek bly as hulle skade gely het?

³⁰Nee, ek het nooit gesondig deur enigiemand te vervloek of iemand te verwens nie.

³¹My werkers het nooit gesê dat ek iemand laat honger ly nie.

³²Ek het nooit ’n vreemdeling weggewys nie. My deur het altyd vir almal oopgestaan.

³³Het ek ooit probeer om my sondes weg te steek soos mense graag doen? Het ek my ongeregtighede probeer ontken?

³⁴Het ek stilgebly daaroor en nie buitentoe gegaan nie omdat ek bang was dat mense op my sou neersien en my verag?

³⁵“As daar maar net iemand was wat na my wou luister en my kant van die saak wou sien! Kyk, ek teken my naam as my verdediging. Laat die Almagtige my wys dat ek verkeerd is. Laat my Aanklaer die klag teen my uitskryf!

³⁶Dan sou ek die aanklag teenstaan. Ek sou dit dra soos ’n kroon.

³⁷Want ek sou Hom presies sê wat ek gedoen het. Ek kan voor Hom staan, soos ’n prins.

³⁸“As die grond wat ek bewerk my aankla, en al die ploegvore saam ween,

³⁹as ek dit wat daaruit opgekom het, geëet het sonder om te betaal, of die eienaars vermoor het,

⁴⁰laat daar dan dissels groei op daardie land in die plek van koring, en onkruid in die plek van gort.” Hier eindig Job se woorde.