Psalms 116— AFR83

¹Ek het die Here lief, want Hy verhoor my smeekgebede.

²Hy het na my geluister toe ek Hom aangeroep het.

³Bande van die dood het my omsluit, doodsangs het my aangegryp, ek het benoud en bekommerd geword.

⁴Toe het ek die Naam van die Here aangeroep: “Here, red my tog!”

⁵Die Here is genadig en regverdig, ons God ontferm Hom oor ons.

⁶Die Here beskerm die hulpeloses: ek was magteloos, maar Hy het my gered.

⁷Ek moet nou tot rus kom, die Here het goed aan my gedoen:

⁸U het my van die dood gered, U het 'n einde gemaak aan my trane, U het gesorg dat ek nie weer struikel nie.

⁹Ek kon voor die Here bly wandel in die land van die lewendes.

¹⁰Ek het in U bly glo, selfs toe ek gedink het dit is klaar met my

¹¹en toe ek in my vertwyfeling besef het: ek kan op geen mens staatmaak nie.

¹²Hoe sal ek die Here vergoed vir al sy weldade aan my?

¹³Met 'n drankoffer sal ek van sy redding getuig en die Naam van die Here aanroep.

¹⁴My geloftes aan die Here sal ek betaal in die teenwoordigheid van sy hele volk.

¹⁵Vir die Here is die dood van sy troue dienaars geen geringe saak nie.

¹⁶Ek is u dienaar, Here, van my geboorte af is ek al u dienaar: U het my vry gemaak.

¹⁷Ek wil U loof met 'n dankoffer, ek wil die Naam van die Here aanroep.

¹⁸My geloftes aan die Here sal ek betaal in die teenwoordigheid van sy hele volk,

¹⁹in die voorhowe van die huis van die Here, binne-in jou, Jerusalem! Prys die Here!