Psalms 115— AFR53

¹Nie aan ons, o HERE, nie aan ons nie, maar aan u Naam gee eer, om u goedertierenheid, om u trou ontwil.

²Waarom sou die heidene sê: Waar is dan hulle God?

³terwyl onse God tog in die hemel is; Hy doen alles wat Hom behaag.

⁴Hulle afgode is silwer en goud, 'n werk van mensehande.

⁵Hulle het 'n mond, maar praat nie; hulle het oë, maar sien nie;

⁶ore het hulle, maar hoor nie; hulle het 'n neus, maar ruik nie;

⁷hande, maar hulle tas nie; voete, maar hulle loop nie; hulle gee geen geluid deur hul keel nie.

⁸Die wat hulle maak, sal net soos hulle word -- elkeen wat op hulle vertrou.

⁹Israel, vertrou op die HERE: Hy is hulle hulp en hulle skild!

¹⁰Huis van Aäron, vertrou op die HERE: Hy is hulle hulp en hulle skild!

¹¹Julle wat die HERE vrees, vertrou op die HERE: Hy is hulle hulp en hulle skild.

¹²Die HERE het aan ons gedink: Hy sal seën, Hy sal die huis van Israel seën, Hy sal die huis van Aäron seën.

¹³Hy sal diegene seën wat die HERE vrees, die kleintjies saam met die grotes.

¹⁴Die HERE sal julle vermenigvuldig, julle en jul kinders.

¹⁵Julle is geseënd deur die HERE wat hemel en aarde gemaak het.

¹⁶Die hemele is hemele vir die HERE, maar die aarde het Hy aan die mensekinders gegee.

¹⁷Die dode en almal wat na die stilte neerdaal, sal die HERE nie loof nie;

¹⁸maar ons sal die HERE prys, van nou af tot in ewigheid. Halleluja!