Psalms 89— AFR20

¹'n Maskiel. Van Etan, die Esragiet.

²Oor die troue liefde van die Here wil ek altyd sing; van geslag tot geslag wil ek u trou met my mond bekend maak.

³Ja, ek sê dit: Vir ewig word u troue liefde gevestig; in die hemel hou U u trou in stand.

⁴“Ek het 'n verbond gesluit met my uitverkorene, Ek het aan my dienskneg, Dawid, met 'n eed belowe,

⁵‘Vir altyd hou Ek jou nageslag in stand; van geslag tot geslag het Ek jou troon gevestig. ’ ”

⁶Die hemel moet u wonders prys, Here; ja, u trou in die byeenkoms van heiliges.

⁷Want wie in die uitspansel kan langs die Here gestel word? Wie onder die hemelwesens is aan die Here gelyk –

⁸'n uiters gedugte God in die kring van die heiliges, en gevrees deur almal om Hom?

⁹Here, God van alle magte, wie is so magtig soos U, Here? U trou omring U;

¹⁰U heers oor die deining van die see. Wanneer die golwe styg, bring U hulle tot bedaring.

¹¹U, U het die deurboorde Rahab verpletter, met u sterk arm het U u vyande verstrooi.

¹²Aan U behoort die hemel, ook die aarde behoort aan U. Die wêreld en alles daarop – U, U het dit gegrondves.

¹³Die noorde en die suide – U, U het dit geskep. Tabor en Hermon jubel in u Naam.

¹⁴U het 'n magtige arm; u hand is sterk, u regterhand is verhewe.

¹⁵Reg en •geregtigheid is die grondslag van u troon; troue liefde en waarheid gaan U tegemoet.

¹⁶Gelukkig is die volk wat uitroepe van vreugde ken, wat in die lig van u teenwoordigheid loop, Here!

¹⁷In u Naam juig hulle die hele dag, in u geregtigheid roem hulle;

¹⁸want U is hulle kragtige sieraad. Deur u aanvaarding het U ons sterk gemaak.

¹⁹Want aan die Here behoort ons skild, aan die •Heilige van Israel behoort ons koning.

²⁰U het destyds in 'n visioen 'n belofte gemaak aan u getroue volgelinge. U het gesê: “Ek het hulp verleen aan 'n held, Ek het 'n jong man uit die volk verhoog.

²¹Ek het Dawid, my dienskneg, gevind; met my heilige olie het Ek hom gesalf,

²²hom by wie my hand bestendig sal wees; ja, my arm sal hom sterk maak.

²³Vyande sal hom nie onverhoeds betrap nie, en skurke sal hom nie verdruk nie.

²⁴Sy teenstanders sal Ek voor hom verpletter, en sy haters sal Ek platslaan.

²⁵My getrouheid en troue liefde sal met hom wees, en in my Naam sal hy sterk word.

²⁶Ek sal sy hand op die see lê, op die riviere sy regterhand.

²⁷Hy, hy sal my aanroep, ‘U is my Vader, my God, en die rots wat my verlos.’

²⁸Ek sal hom dan •eersgeborene maak, die hoogste van die konings van die aarde.

²⁹Vir altyd sal Ek vir hom my troue liefde handhaaf; en my verbond sal bestendig wees vir hom.

³⁰Ek sal sy nageslag vir altyd vestig, en sy troon, solank as die hemel bestaan.

³¹“As sy seuns van my wet afwyk, volgens my beslissings nie leef nie;

³²as hulle my vaste voorskrifte ontheilig, my bevele nie nakom nie,

³³sal Ek hulle oortreding met slae straf en hulle sondeskuld met houe.

³⁴Maar my troue liefde sal Ek nie aan hom onttrek nie, en Ek sal nie my trou verloën nie.

³⁵Ek sal my verbond nie skend nie en wat oor my lippe gegaan het, nie verander nie.

³⁶Vir eens en vir altyd het Ek by my heiligheid gesweer; Ek sal nie vir Dawid lieg nie:

³⁷Sy nageslag sal altyd daar wees en sy troon soos die son voor My,

³⁸soos die maan wat altyd standhou – 'n betroubare getuie aan die hemelruim.”

³⁹Maar U self het hom verstoot en verwerp, U was woedend vir u gesalfde.

⁴⁰U het die verbond met u dienskneg opgehef, sy kroon tot in die grond ontheilig.

⁴¹U het al sy skermmure afgebreek, van sy versterkte stede ruïnes gemaak.

⁴²Almal wat daar verbygaan, het hom geplunder; hy het 'n bespotting geword vir sy bure.

⁴³U het die regterhand van sy teenstanders hoog gelig. U het al sy vyande bly gemaak.

⁴⁴U, o Rots, het ook sy swaard teen hom gedraai; U het hom nie staande gehou in die stryd nie.

⁴⁵U het sy glans laat verdof en sy troon, dié het U teen die grond gegooi.

⁴⁶U het die dae van sy jeug kortgeknip, hom in skaamte gehul.

⁴⁷Hoe lank nog, Here? Gaan U Uself vir ewig verberg, sal u woede soos 'n vuur bly brand?

⁴⁸Dink daaraan – wat is my lewensduur? Om watter sinlose rede het U alle mensekinders geskape?

⁴⁹Watter jong man leef en sien nie die dood nie; wie kan sy lewe aan die mag van die •doderyk laat ontkom?

⁵⁰Waar is u troue liefde van vroeër, my Heer, wat U in u trou met 'n eed beloof het aan Dawid?

⁵¹My Heer, dink aan die bespotting van u diensknegte wat ek teen my bors dra; dink aan al die baie volke

⁵²wat die spot dryf – aan u vyande, Here, wat die spot dryf met u gesalfde waar hy ook al gaan.

⁵³Die Here moet vir ewig geprys word! Amen, amen.