Psalms 116— AFR20

¹Ek het die Here lief, want Hy luister na my stem, my smeekgebed;

²ja, Hy draai sy oor na my, en solank ek leef, sal ek Hom aanroep.

³Bande van die dood het my omsluit; angste van die •doderyk het my oorval; benoudheid en bekommernis het ek ervaar.

⁴Toe het ek die Naam van die Here bly aanroep: “Ag, Here, red tog my lewe!”

⁵Genadig is die Here en regverdig; ons God is barmhartig.

⁶Die Here beskerm onkundiges; ek is nietig, maar Hy het my verlos.

⁷Kom weer tot rus, my •siel, want die Here het goed gedoen aan jou.

⁸Ja, U het my lewe van die dood gered, my oë van trane, my voete van struikeling.

⁹Ek mag leef in die teenwoordigheid van die Here, in die land van die lewendes.

¹⁰Ek het bly glo, selfs toe ek gesê het: “Ek is swaar beproef.”

¹¹Ek is een wat in my angstigheid gesê het: “Alle mense is leuenaars.”

¹²Hoe kan ek die Here vergoed vir al sy goeie dade aan my?

¹³Die beker van verlossing sal ek oplig en die Naam van die Here aanroep.

¹⁴My geloftes aan die Here sal ek betaal, daar voor sy hele volk.

¹⁵In die oë van die Here is die dood van sy troue volgelinge 'n duur verlies.

¹⁶Ag, Here, omdat ek u dienskneg is – ja, ek is u dienskneg, die seun van u diensmeisie – het U my boeie losgemaak.

¹⁷Aan U sal ek •dankoffers bring en die Naam van die Here aanroep.

¹⁸My geloftes aan die Here sal ek betaal, daar voor sy hele volk,

¹⁹in die voorhowe van die huis van die Here, in jou midde, Jerusalem. Halleluja!