Proverbs 25— AFR20

¹Ook hierdie spreuke is van Salomo; die manne van Hiskia, die koning van Juda, het dit oorgelewer.

²Dit is tot die eer van God om 'n saak te verberg; en dit is tot die eer van konings om 'n saak te deurvors.

³Soos die hoogte van die hemel en die diepte van die aarde, is die hart van konings ondeurgrondelik.

⁴Verwyder die metaalskuim uit silwer, dan kom daar reeds 'n kruik uit vir die silwersmid.

⁵Verwyder 'n goddelose voor die koning, dan is sy troon reeds in geregtigheid gevestig.

⁶Moenie grootpraat voor die koning, en moenie gaan staan op die plek van grotes nie.

⁷Want dit is beter dat vir jou gesê word, “Kom op hierheen!” as dat jy verneder word voor 'n vooraanstaande. Wat jou oë gesien het,

⁸moet jy nie haastig voor die gereg bring nie; wat sal jy uiteindelik doen as jou medemens jou verneder?

⁹Voer jou regstryd teen jou medemens, maar iemand anders se geheim moet jy nie openbaar nie;

¹⁰anders sal hy wat dit hoor, jou in die skande steek, en die skinderstories oor jou nie ophou nie.

¹¹Goue appels in silwermonterings, so is 'n woord uitgespreek op die gepaste tyd.

¹²'n Goue ring en 'n sieraad van fyngoud, so is 'n wyse teregwyser vir die oor wat luister.

¹³Soos die afkoeling deur sneeu op 'n oesdag is 'n betroubare boodskapper vir die een wat hom gestuur het; hy verkwik die siel van sy heer.

¹⁴Stapelwolke en wind sonder enige reën, so is 'n man wat spog oor 'n geskenk waaroor hy lieg.

¹⁵Met geduld word 'n •aanvoerder oorreed, en 'n sagte tong breek gebeentes.

¹⁶As jy heuning vind, eet net tot jy genoeg het, anders kry jy te veel daarvan in en bring dit op.

¹⁷Sit jou voet selde in jou medemens se huis, anders kry hy te veel van jou en ontwikkel 'n weersin in jou.

¹⁸'n Hamer en 'n swaard en 'n skerp pyl, so is iemand wat as 'n vals getuie teen sy medemens getuig.

¹⁹'n Tand wat breek en 'n voet wat swik, so is vertroue op 'n verraderlike mens in 'n tyd van nood.

²⁰Soos hy wat op 'n koue dag klere uittrek, of asyn op soda gooi, so is iemand wat liedere sing vir 'n treurige hart.

²¹As jou vyand honger is, gee hom brood om te eet, en as hy dors is, gee hom water om te drink;

²²want jy stapel vurige kole op sy kop, en die Here sal jou beloon.

²³Die noordewind bring reën, en 'n tong wat skinder, verontwaardigde gesigte.

²⁴Om op die hoek van 'n dak te woon, is beter as om 'n huis te deel met 'n bakleierige vrou.

²⁵Koel water in 'n dorstige keel, so is goeie nuus uit 'n ver land.

²⁶'n Modderige fontein, 'n besoedelde bron, so is 'n regverdige wat swig voor 'n goddelose.

²⁷Om te veel heuning te eet, is nie goed nie, en die soeke na eie eer is oneervol.

²⁸'n Stad wat deurbreek is, sonder 'n stadsmuur, so is iemand sonder selfbeheersing.