Ezekiel 27— AFR20

¹Die woord van die Here het tot my gekom:

²“Jy, mensekind, hef oor Tirus 'n klaaglied aan;

³sê vir Tirus, die stad wat lê by die poorte na die see, wat handel dryf met ander volke, met baie eilande, ‘So sê my Heer, die Here: “Tirus, jy sê, ‘Ek is volmaak in skoonheid.’

⁴In die hart van die seë lê jou gebied; jou bouers het jou skoonheid vervolmaak.

⁵Met sipreshout uit Senir het hulle albei jou sykante gebou. 'n Seder uit die Libanon het hulle geneem om vir jou 'n mas te maak.

⁶Met eikebome uit Basan het hulle jou roeispane gemaak. Jou dek het hulle ivoorkleurig gemaak met dennehout uit die eilande van die Kittiërs.

⁷Van veelkleurige fyn linne uit Egipte was jou seil, om vir jou te dien as vaandel. Pers en purperrooi materiaal uit die eilande van Elisa was jou kajuitbedekking.

⁸Inwoners van Sidon en Arwad was jou roeiers, Jou ervare manne, Tirus, was aan boord, hulle was jou seemanne.

⁹Veterane van Gebal en sy ervare manne was aan boord om jou lekplekke te kalfater. “ ‘ “Al die skepe op see en hulle matrose was in jou hawe om van jou ruilware te bekom.

¹⁰Persië, Lud en Put was in jou leër as krygsmanne. Skild en helm het hulle in jou opgehang; dit is hulle wat aan jou luister verleen het.

¹¹Manne uit Arwad en Gelek was rondom op jou mure, en manne uit Gammad – in jou torings was hulle. Hulle het hulle rondeskilde rondom teen jou mure opgehang; dit is hulle wat jou skoonheid vervolmaak het.

¹²Tarsis het met jou handel gedryf vanweë die oorvloed van al die rykdom. Met silwer, yster, tin en lood het hulle betaal vir jou handelsware.

¹³Jawan, Tubal en Meseg, hulle was jou handelaars. Met lewende mense en koperware het hulle betaal vir jou ruilware.

¹⁴Uit Bet-Togarma was daar perde, trekperde en muile; hulle het dit vir jou handelsware aangebied.

¹⁵Die mense van Dedan was jou handelaars; baie eilande was jou handelsvennote. Olifanttande en ebbehout het hulle teruggebring as skatplig aan jou.

¹⁶Edom het met jou handel gedryf vanweë die oorvloed goedere wat jy vervaardig. Met •malagiet, purperrooi en veelkleurig geweefde materiaal, fyn linne, pêrels en •chalcedoon het hulle vir jou handelsware betaal.

¹⁷Juda en die land Israel, hulle was jou handelaars. Met koring uit Minnit, vye, heuning, olyfolie en balsemgom het hulle betaal vir jou ruilware.

¹⁸Damaskus het met jou handel gedryf vanweë die oorvloed goedere wat jy vervaardig, die oorvloed van al jou rykdom. Met wyn uit Gelbon, wol uit Sagar

¹⁹en wyn uit Usal het hulle vir jou handelsware betaal. Bewerkte yster, kassia en kalmoes was onder jou ruilware.

²⁰Dedan het met jou handel gedryf in saalkleedjies vir rydiere.

²¹Arabië en al die leiers van Kedar, hulle was jou handelsvennote. Met ramlammers, skaap- en bokramme, daarmee het hulle met jou handel gedryf.

²²Die handelaars van Skeba en Rama, hulle was jou handelaars. Met die keur van allerlei speserye, allerlei edelstene en goud het hulle betaal vir jou handelsware.

²³Haran, Kanne en Eden handelaars van Skeba, Assirië en Kilmad het met jou handel gedryf.

²⁴Hulle was jou handelaars in swierige mantels, pers en veelkleurig geweefde sjaals en kleurryke matte. In gevlegte en geknoopte toue het hulle met jou handel gedryf.

²⁵Handelskepe het jou ruilware vir jou vervoer. “ ‘ “Jy het vol geword, was baie swaar belaai daar in die hart van die seë.

²⁶In onstuimige waters het jou roeiers jou gebring. Die oostewind het jou gebreek in die hart van die seë.

²⁷Jou rykdom, jou handelsware, jou ruilware, jou matrose, jou seemanne, hulle wat jou lekplekke kalfater, dié wat jou ruilware verhandel, al die krygsmanne in jou, ja, saam met die hele strydmag in jou midde, hulle sink weg in die hart van die seë op die dag van jou val.

²⁸Van die harde hulpgeroep van jou seemanne bewe die weivelde.

²⁹Hulle verlaat hulle bote – almal wat roeispane vashou; die matrose, al die seevaarders – op die land gaan staan hulle.

³⁰Hulle laat oor jou hulle stem hoor; bitterlik skreeu hulle dit uit; hulle strooi stof op hulle koppe; in die as rol hulle.

³¹Hulle skeer kaal kolle op hulle koppe oor jou, hulle bind rouklere om, hulle huil oor jou met 'n verbitterde siel – dit is 'n bitter rouplegtigheid.

³²Met hulle geweeklaag hef hulle vir jou 'n klaaglied aan; hulle sing 'n klaagsang oor jou, ‘Wie was soos Tirus, wie was soos sy, midde-in die see?’

³³Toe jou handelsware uitgegaan het op die seë, het jy baie volke versadig; met die oorvloed van jou rykdom en ruilware het jy konings van die aarde ryk gemaak.

³⁴Nou is jy gebreek deur die seë, in die dieptes van die water. Jou ruilware en jou hele strydmag wat in jou was, het weggesink.

³⁵Al die bewoners van die eilande staan verslae oor jou. Hulle konings sidder onbedaarlik; hulle gesigte is verwronge van angs.

³⁶Handelaars onder die volke fluit oor jou; jy het 'n verskrikking geword; jy sal nooit weer bestaan nie.” ’ ”