Amos 9— AFR20

¹Ek het my Heer by die altaar sien staan. Hy het gesê: “Slaan die pilaarkop sodat die drumpels skud. Maak 'n einde aan hulle, aan wie op die voorpunt is van hulle almal. Hulle agterhoede sal Ek met die swaard ombring. Geen vlugteling onder hulle sal ontvlug nie; geen oorlewende onder hulle sal ontkom nie.

²Al grawe hulle tot in die •doderyk – van daar af sal my hand hulle uithaal. Al klim hulle op in die hemel – van daar af sal Ek hulle afbring.

³Al verberg hulle hulleself op die kruin van Karmel – daar sal Ek hulle opspoor en uithaal. Al kruip hulle vir my oë weg op die bodem van die see – daar sal Ek die slang opdrag gee en hy sal hulle pik.

⁴Al gaan hulle in ballingskap voor hulle vyande uit – daar sal Ek die swaard opdrag gee en dit sal hulle ombring. Ek sal my oog op hulle hou, ten kwade, nie ten goede nie.”

⁵My Heer, die Here, Heerser oor alle magte, Hy wat die aarde aanraak en dit sidder, sodat almal wat daarop woon, treur, en dit styg in sy geheel soos die Nyl en sak terug soos die rivier van Egipte;

⁶Hy wat in die hemel sy bokamer bou en sy hemelkoepel op die aarde vestig; wat die water van die see roep en dit uitgiet oor die oppervlakte van die aarde – Here is sy Naam.

⁷“Israeliete, is julle nie maar vir My soos die Kussiete nie?” is die uitspraak van die Here. “Het Ek nie Israel uit Egipteland laat optrek en die Filistyne uit Kaftor en die Arameërs uit Kir nie?”

⁸Kyk, die oë van my Heer, die Here, is gerig op die sondige koninkryk. “Ek sal dit van die aardbodem af uitroei; nogtans sal Ek die huis van Jakob nie heeltemal uitroei nie,” is die uitspraak van die Here.

⁹“ Ja, kyk, Ek gee bevel, en Ek gaan onder al die nasies die huis van Israel skud asof hy in 'n sif geskud word, maar nie 'n klippie sal op die grond val nie.

¹⁰Deur die swaard sal al die sondaars van my volk sterf, hulle wat sê, ‘Die onheil sal ons nie bereik nie, nie tot by ons kom nie.’ ”

¹¹“ Op daardie dag sal Ek die vervalle skuiling van Dawid herstel. Ek sal die bresse toebou en die ruïnes herbou om te wees soos in die dae van weleer,

¹²sodat hulle dié wat oorgebly het van Edom en al die nasies oor wie my Naam uitgeroep is, in besit kan neem,” is die uitspraak van die Here, wat dit gaan doen.

¹³“Kyk, daar kom dae,” is die uitspraak van die Here, “wanneer die een wat ploeg die een wat graan oes, sal inhaal, en die een wat druiwe trap die een wat die saadsak dra. Die berge sal drup van druiwesap en die heuwels sal golf van graan.

¹⁴Ek sal die lot van my volk Israel verander. Hulle sal hulle verwoeste stede herbou en bewoon; hulle sal wingerde plant en die wyn daarvan drink; hulle sal tuine aanlê en die vrugte daarvan eet.

¹⁵Ek sal hulle plant in hulle grond en hulle sal nie weer verwyder word van die grond wat Ek aan hulle gegee het nie,” sê die Here, jou God.