Psalms 69— 2020

¹Ngisindise, Nkulunkulu, ngokuba amanzi asesentanyeni.

²Ngibisha obhukwini lodaka, akukho ndawo yokubeka unyawo, ngingene otweni ngathi shi, imisinga iyangisibekela.

³Ngikhathele wukukhala, umphimbo wami ugagadekile. Amehlo ami anqundekile ngukulindela uNkulunkulu wami.

⁴Abangizondela ize baningi ukwedlula izinwele ekhanda lami, baningi abafuna ukungibhubhisa; izitha zami zingethwesa icala ngeze. Kumele ngibuyisele engingakwebanga.

⁵Nkulunkulu, Wena uyabazi ubuwula bami, nezono zami azifihlakele kuwe.

⁶Mabangahlazeki ngami abakulindelayo, Nkosi, Simakade Wamabandla. Mabangathelwa ngehlazo ngenxa yami labo abakufunayo, Nkulunkulu ka-Israyeli.

⁷Ngokuba ngichashwa ngenhlamba ngenxa yakho, ihlazo lisibekele ubuso bami.

⁸Sengaba ngumfokazi kubafowethu, nowezizwe kubantwana bakamame.

⁹Ngokuba ukushisekela indlu yakho kungidlile, izinhlamba zabakuthukayo zehlele phezu kwami.

¹⁰Ngakhala, umphefumulo wami wazila, kwaba ngukudunyazwa kwami.

¹¹Isaka ngalenza isembatho sami, ngaba yisaga kubo.

¹²Abahlezi esangweni bakhuluma ngami, izidakwa zihaya ingoma ngami.

¹³Kepha mina ngikhuleka kuwe, Simakade. Ngesikhathi esifanele, Nkulunkulu, ngobukhulu bomusa wakho, ngiphendule ngeqiniso lensindiso yakho.

¹⁴Ngitakule odakeni, ngingabishi, mangikhululwe ezitheni zami nasemanzini ajulileyo.

¹⁵Izikhukhula mazingangisibekeli, utwa lungangigwinyi, nomgodi ungangivaleli.

¹⁶Ngiphendule, Simakade, ngokuba umusa wakho muhle, ngokwesihawu sakho esikhulu, phendukela ngakimi.

¹⁷Ungayifihleli ubuso bakho inceku yakho, ngokuba ngikhathazekile, phuthuma ungiphendule.

¹⁸Sondela kuwo umphefumulo wami, uwuhlenge, ngikhulule ngenxa yezitha zami.

¹⁹Wena uyakwazi ukwethukwa kwami, nehlazo lami, nokudunyazwa kwami. Zonke izitha zami ziphambi kwakho.

²⁰Ukwethukwa kuyephulile inhliziyo yami, ngagula kakhulu, ngafisa ukuzwelwa, kodwa angitholanga baduduzi.

²¹Banginika inyongo ibe ngukudla kwami, ekomeni kwami bangiphuzisa uviniga.

²²Itafula labo malibe wugibe kubo, nesihibe sezitha zabo.

²³Amehlo abo mawanqundeke ukuze bangaboni, izinkalo zabo ziqhaqhazele njalo.

²⁴Ukunengwa kwakho kuthele phezu kwabo, intukuthelo yakho evuthayo ibafice.

²⁵Umuzi wabo ubhubhe, kungabi bikho ohlala emathendeni abo.

²⁶Bahlukumeze labo obashayile, bakhuluma ngobuhlungu babalinyaziweyo bakho.

²⁷Yengeza ukona kwabo phezu kokunye, mabangezi ekulungeni kwakho.

²⁸Mabesulwe encwadini yabaphilayo, bangalotshwa kanye nabalungileyo.

²⁹Kepha mina ngihluphekile, nginobuhlungu. Nkulunkulu, insindiso yakho mayingilondoloze.

³⁰Ngizolibonga igama likaNkulunkulu ngehubo, ngimbabaze ngokubonga.

³¹Lokho kuzomthokozisa kakhulu uSimakade, ukwedlula inkabi noma inkunzi enezimpondo nezinselo.

³²Akuthi lapho abacindezelweyo bekubona, bethabe, nina enifuna uNkulunkulu mazivuseleleke izinhliziyo zenu.

³³Ngokuba uSimakade uyabezwa abentulayo, akabadeleli abakhe ababoshiweyo.

³⁴Izulu nomhlaba makumbonge, izilwandle nakho konke okuphila kukho.

³⁵Ngokuba uNkulunkulu uzolisindisa iZiyoni, ayakhe imizi yakwaJuda, bahlale kuyo, libe yifa labo.

³⁶Abantwana bezinceku zakhe bazolidla libe yifa labo, nalabo abathanda igama lakhe bazohlala kulo.