Lamentations 5— 2020

¹Khumbula Simakade, okusehleleyo! Bheka, ubone ihlazo lethu!

²Ifa lethu seliphendulwe laba ngelabafokazi, izindlu zethu zaba ngezabezizwe.

³Siyizintandane, asinababa, omama bethu sebefana nabafelokazi.

⁴Amanzi ethu siwaphuza ngemali, izinkuni zethu sesizithola ngokuzithenga.

⁵Abasixoshayo basihleli entanyeni, sikhathele, asikutholi ukuphumula.

⁶Sizinikele kwabaseGibhithe nakwabase-Asiriya, ukuze sithole isinkwa, sisuthe.

⁷Okhokho bethu benza okubi, manje abasekho, kodwa sekuyithi esesithweswe ububi babo.

⁸Sesibuswa yizigqila; akekho ongasikhulula esandleni sazo.

⁹Uma sifuna ukuthola ukudla, sibeka impilo yethu engcupheni yokudliwa yinkemba ogwadule.

¹⁰Isikhumba sethu sishisisa okweziko ngenxa yokubhuqwabhuqwa yindlala.

¹¹Badlwengula abesifazane eZiyoni, nezintombi emizini yakwaJuda.

¹²Izikhulu ziphanyekwa ngezandla zazo; abahlonishwa nabadala.

¹³Izinsizwa zithwaliswa amatshe okusila. Abafana babhamazeliswa yimithwalo yezinkuni.

¹⁴Akusahlali zingwevu esangweni, nezinsizwa azisayivumi ingoma yazo.

¹⁵Iphelile intokozo yenhliziyo yethu, ukusina kwethu sekuphenduke ukulila.

¹⁶Umqhele uwile ekhanda lethu. Maye, kithi, ngokuba sonile!

¹⁷Ngalokho-ke inhliziyo yethu idangele; ngenxa yalezo zinto, amehlo ethu afiphele.

¹⁸Phezu kwentaba iZiyoni esiyincithakalo, sekuzulazula amanketshane.

¹⁹Wena Simakade, umi ingunaphakade, isihlalo sakho sobukhosi siyoba khona izizukulwane ngezizukulwane.

²⁰Usikhohlweleni isikhathi eside kangaka na? Usilahleleni izinsuku eziningi kangaka na?

²¹Sibuyisele kuwe, Simakade, siyakubuya; yenza izinsuku zethu zibe zintsha njengasemandulo;

²²ngaphandle uma ususilahle unomphelo, wasithukuthelela kakhulu.