Proverbs 2— 1959

¹Ndodana yami, uma wamukela amazwi ami, uzibekelele imiyalo yami,

²ukuze ubeke indlebe yakho ekuhlakanipheni, uthobisele ekuqondeni inhliziyo yakho,

³yebo, uma ukhala ngengqondo, uzwakalisa izwi lakho ngokuqonda,

⁴uma ukufuna njengesiliva, ukuphenya njengamagugu afihliweyo,

⁵khona uyakuqonda ukumesaba uJehova, ufumane ukumazi uNkulunkulu.

⁶Ngokuba uJehova uyanika ukuhlakanipha; emlonyeni wakhe kuphuma ukwazi nokuqonda.

⁷Uyabekela abaqotho isibusiso, uyihawu kwabahamba bengenacala,

⁸egcina izindlela zokulunga, elondoloza imikhondo yabathembekileyo bakhe.

⁹Khona uyakuqonda ukulunga nokwahlulela, neqiniso, yebo, nezindlela zonke ezinhle.

¹⁰Ngokuba ukuhlakanipha kuyakungena enhliziyweni yakho, ukwazi kube mnandi emphefumulweni wakho.

¹¹Amasu ayakukulinda, ukuqonda kukugcine,

¹²ukuze wophulwe endleleni yobubi nakubantu abakhuluma okuphambeneyo,

¹³abashiya imikhondo yobuqotho, ukuze bahambe ngezindlela zobumnyama;

¹⁴abathokoza ngokwenza okubi, bajabulele ukuphambana kobubi;

¹⁵abazindlela zabo ziyisigwegwe, nemikhondo yabo iphambene,

¹⁶ukuba wophulwe kowesifazane ondindayo nakuye owezizwe onamazwi athophayo,

¹⁷oshiya umngane wobusha bakhe, akhohlwe isivumelwano sikaNkulunkulu wakhe,

¹⁸ngokuba indlu yakhe ishonela ekufeni, nasezithunzini izindlela zakhe.

¹⁹Bonke abangena kuye ababuyi, bangafinyeleli ezindleleni zokuphila.

²⁰Kanjalo uyakuhamba ezindleleni zabahle, ugcine imikhondo yabalungileyo.

²¹Ngokuba abaqotho bayakuhlala ezweni, abapheleleyo basale kulo.

²²Kepha ababi bayakunqunywa ezweni, nabambuluzayo bayakusishulwa kulo.