Bible

Zechariah 4

Chinese (T) - TNV2012

1 頭下㧯𠊎講話个天使又來喊醒𠊎，像睡當落覺被人喊醒。

2 佢問𠊎：「你看到麼介？」𠊎應講：「一座純金个燈臺，頂高有一隻裝油个碗，燈臺頂有七盞燈，逐盞燈有七支燈心管。

3 油碗兩片有橄欖樹，一頭在右片，一頭在左片。」

4 𠊎問㧯𠊎講話个天使：「主啊，這兜東西代表麼介？」

5 㧯𠊎講話个天使應𠊎講：「你毋知這兜係麼介嗎？」𠊎應講：「主啊，𠊎毋知。」

6 佢對𠊎講：「這係上主愛指示所羅巴伯个話。上主—萬軍个元帥講：『毋係靠權勢，毋係靠才能，只有靠𠊎个靈。』

7 大山啊，你算麼介？在所羅巴伯面前，你定著會變做平地。佢將聖殿最後一垤石頭疊上去个時，眾人一定會大聲歡喜喊講：『還靚噢！願上主賜福！』」

8 上主个話又臨到𠊎講：

9 「所羅巴伯个手打好這聖殿个地基，佢也定著會親手完成這項工程。該時，你等就會知係上主—萬軍个元帥差𠊎到你等這位來。

10 麼人失望因為這兜事情進行忒慢？佢等一看到所羅巴伯手拿線鉈起工，該時，佢等就會大歡喜。」天使又對𠊎講：「這七盞燈代表上主个目珠，愛鑒察全世界。」

11 𠊎又問天使：「燈臺兩片，該兩頭橄欖樹又係麼介意思呢？

12 斟橄欖油个兩支金管个旁邊，該兩枝橄欖樹枝又係麼介意思？」

13 佢問𠊎：「你毋知這係麼介？」𠊎講：「主啊，𠊎毋知。」

14 佢講：「這係兩個擇出來接受膏油个，愛來事奉普天下个主。」