Ruth 2
1 有一個人名安到波阿斯，有錢又有地位，係拿娥美老公以利米勒个親族。
2 有一日，摩押細妹仔路得對拿娥美講：「俾𠊎到田肚去；若有人肯好款待𠊎，𠊎就在厥後背拈佢跌掉个麥串。」拿娥美講：「𠊎个妹仔啊，做你去！」
3 所以路得就到田肚去，跈在收割工人後背拈跌下來个麥串。堵堵好，姖就到以利米勒親族波阿斯該垤田肚。
4 無幾久，波阿斯對伯利恆來；佢向收割工人問安講：「上主㧯你等共下！」佢等應講：「上主賜福給你！」
5 波阿斯問工頭：「該係㖠家人个細妹仔？」
6 工頭應講：「姖就係該摩押細妹仔，係跈拿娥美對摩押轉來个。
7 姖要求𠊎俾姖跈在工人後背拈跌掉个麥串。姖打早就開始拈，這下正停下來，在涼篷下歇睏。」
8 波阿斯就去對路得講：「細妹仔，聽𠊎講。你毋使到別人个田肚去拈麥串，留在這位㧯𠊎這兜使女共下就好。
9 看男工到㖠垤田收割，你就跈使女去拈。𠊎已經吩咐男工做毋得欺負你。你嘴燥，就到水罐該位啉男工打來个水。」
10 路得就伏在地上跪波阿斯，講：「你做麼介款待𠊎恁好？樣會恁關心𠊎這個外國人？」
11 波阿斯應講：「若老公死後，你對家娘恁有孝，樣般離開爺𡟓㧯自家个故鄉，來住在這生份个民族當中，這兜事情𠊎全部聽到了。
12 願上主照你所做个報答你。願以色列个上帝，你所倚靠个上主大大賞賜你。」
13 路得講：「先生，你對𠊎恁好！雖然𠊎連做你个使女也堪毋得，你還用親切个話來安慰𠊎。」
14 到食飯个時，波阿斯對路得講：「過來這位，食麥餅，搵酸醋來食。」路得就㧯該兜工人共下坐。波阿斯拿兜焙好个麥串傳給姖，姖食到飽，還有賸。
15 姖起身又去拈麥串个時，波阿斯吩咐佢个工人講：「姖就係對堆等个麥堆肚去拈，你等也做毋得侮辱姖，
16 甚至愛對捆好个麥捆中抽兜出來，留俾姖拈，也毋好責備姖。」
17 路得就恁樣在田肚拈麥串，直到臨暗仔。姖將拈來个麥串打好，差毋多有一籮。
18 姖將打好个麥仔帶轉城肚給家娘看，又將姖食賸个食物拿給姖。
19 家娘問姖：「你今晡日對㖠位拈來恁多麥串？你在麼人个田肚做事？願上帝賜福給該照顧你个人！」路得就㧯家娘講：「𠊎今晡日在一個名安到波阿斯个田肚做事。」
20 拿娥美對心舅講：「願一直好款待生人㧯死人个上主賜福給波阿斯！」拿娥美又解釋講：「該儕係𫣆等个至親，有義務照顧𫣆等。」
21 摩押細妹仔路得講：「佢還㧯𠊎講，愛𠊎跈在厥工人个後背拈麥串，直到做完工。」
22 拿娥美對心舅路得講：「𠊎个妹仔啊，你最好㧯佢个使女共下去做事；若係你到別人个田肚去，驚怕會被人欺負。」
23 所以路得跈波阿斯該兜使女去拈麥串，直到大麥、小麥全部收割結束。路得還係㧯家娘共下住。