Romans 11
1 恁樣，𠊎愛問：上帝棄絕佢个子民了，係麼？當然毋係！𠊎自家就係一個以色列人，係亞伯拉罕个後代，屬便雅憫个支族。
2 上帝無棄絕佢對古早就揀選个子民。你等知，聖經記載講，以利亞對上帝告以色列人个時，
3 佢講：「主啊，佢等㓾掉你所有个先知，拆掉你个祭壇；只有賸𠊎一個人，佢等還係愛尋𠊎，收𠊎个命。」
4 上帝樣般回答佢呢？佢講：「𠊎有為自家留下七千人，佢等攏總無拜過假神巴力。」
5 這下个情形也係共樣：上帝照自家个恩典所揀選个人只有賸少數。
6 上帝个揀選係出於佢个恩典，毋係看人个行為；若係看人个行為，所謂恩典就毋算恩典了。
7 結果樣般呢？以色列人得毋到佢等所尋求个，總係上帝所揀選个少數人尋到了；其他个就硬頸毋聽上帝个呼召。
8 就像聖經所講：「上帝使佢等个心靈麻痺掉去；直到這下，佢等个目珠還看毋到，耳公聽毋到。」
9 大衛也識講：願佢等个筵席成做羅網，變做陷阱；願佢等絆倒，受盡刑罰！
10 願佢等个目珠矇矇，看也看毋到；願佢等个背囊痀痀，一直到永遠！
11 𠊎還愛問：猶太人一失足，就一直䟘毋起了，係麼？當然毋係！因為佢等个過犯，拯救就臨到外邦人，來使猶太人嫉妒，直到佢等奮發起來。
12 既然猶太人个過犯帶給世間豐盛个福氣，佢等靈性个貧窮反轉使外邦人富足；恁樣，若係猶太人全體得救，敢毋係會帶來還較大个福氣嗎？
13 這下，𠊎愛㧯你等外邦人講：既然𠊎係外邦人个使徒，𠊎當然看𠊎个職份做榮光；
14 𠊎希望因為恁樣會激起𠊎同胞个嫉妒來奮發，使佢等當中有兜人會得到拯救。
15 若係佢等受棄絕，反轉使世間人成做上帝个朋友；恁樣，佢等受接納，敢毋係會使死人得到生命嗎？
16 麵團个第一垤若獻給上帝，歸團就係屬佢个。樹頭若獻給上帝，恁樣，連樹枝也係屬佢个了。
17 橄欖樹部份个枝仔被佢拗下來，接上野生橄欖樹个枝仔；你等外邦人就像野生个橄欖樹，這下分享猶太人豐盛个生命。
18 所以，你等毋好看輕該兜像枝仔被佢拗下來个人。你等係枝仔定定，樣般做得自誇呢？愛知，毋係你等托等樹頭，係你等被樹頭托等！
19 可能你會講：「該兜枝仔被佢拗下來，係因為愛將𠊎接上去。」
20 無毋著。佢等因為毋信，就被佢拗下來；你等因為信，就企得在。所以你等毋好驕傲，反轉愛存敬畏个心。
21 既然猶太人係原來个枝仔，上帝還毋肯饒佢等；你等恅到上帝會饒你等嗎？
22 對恁樣，𠊎等就知，上帝係慈悲又嚴厲个。對該兜失足跌倒个人，佢係嚴厲个；對你等，佢就係慈悲个，總係你等愛繼續生活在佢个慈悲之中；若無，你等也會被佢拗下來。
23 論到猶太人，佢等若毋係堅持毋信，就會得到回復原來个地位，因為上帝能將佢等接轉去。
24 你等外邦人像係對野生个橄欖樹拗下來个枝仔，還做得強強接到好个橄欖樹頂高去；猶太人像係上帝所栽種个橄欖樹，上帝愛將對這頭樹仔拗下來个枝仔接倒轉去，敢毋係還較容易嗎？
25 兄弟姊妹啊，有一個奧秘个真理，𠊎希望你等愛知，免得你等恅到自家盡聰明。這真理就係：有兜以色列人个硬頸原來毋係永久个，係愛等外邦人歸向上帝个數目滿額了。
26 恁樣，全體以色列人定著會得救。就像聖經所講：拯救者愛對錫安出來，除掉雅各子孫个罪惡。
27 上帝講：這就係𠊎所愛同佢等立个約；該時，𠊎愛赦免佢等个罪。
28 猶太人拒絕福音，成做上帝个敵人，結果使你等外邦人得到利益。總係，照上帝个揀選，因為上帝對該兜族長个應許，猶太人仍然係上帝个朋友。
29 因為上帝个恩典㧯揀選係毋會改變个。
30 頭擺，你等外邦人毋順從上帝；總係這下，因為猶太人个毋順從，你等就得到上帝个憐憫。
31 共樣，猶太人這下毋順從，好使佢等因為你等得到憐憫，這下也得到上帝个憐憫。
32 上帝使全人類困在毋順服个當中，為到愛憐憫所有个人。
33 上帝个豐盛、智慧㧯智識實在還深噢！麼人能解釋佢个決裁？麼人能探查佢个道路？
34 像聖經所講：麼人知主个心意呢？麼人做過佢个參謀呢？
35 麼人識送佢麼介，使佢做毋得無報答呢？
36 因為萬物係對佢來个，通過佢，也係為到佢來存在个。願榮光歸給上帝，直到永遠！阿愐。