Revelation 6
1 𠊎看到羔羊掀開該七隻印仔个頭一隻。該時，𠊎聽到四個生物中个一個發出像響雷公个聲，講：「來！」
2 𠊎一看，看到一匹白馬；該騎馬个拿等弓，領受賜給佢个冕旒，然後就出去戰爭，得勝又愛得勝。
3 羔羊掀開第二隻印仔个時，𠊎聽到第二個生物講：「來！」
4 另外一匹馬就出來，係紅色个。該騎馬个領受了交給佢个權，可以將地上个和平搶走，使人類互相殘殺；佢所領受个係一支大劍。
5 羔羊掀開第三隻印仔个時，𠊎聽到第三個生物講：「來！」𠊎一看，看到一匹烏馬；該騎馬个手中拿等天平。
6 𠊎聽到有聲，像係對四個生物中發出个，講：「一日个工錢正買一公升小麥，一日个工錢正買三公升大麥。橄欖油㧯酒毋好蹧踏！」
7 羔羊掀開第四隻印仔个時，𠊎聽到第四個生物講：「來！」
8 𠊎一看，看到一匹灰色个馬；該騎馬个名安到「死」，「陰間」跈在佢後背。佢等得到權柄，管轄世界个四分之一，用戰爭、飢荒、發瘟，㧯地上个禽獸去㓾人。
9 羔羊掀開第五隻印仔个時，𠊎看到該兜因為傳上帝个真道、忠心做見證，被人㓾死个靈魂在祭壇下。
10 佢等大聲喊講：「神聖又真實个主宰啊！你幾時正愛審判地上个人，為𠊎等所流个血伸冤啊？」
11 佢等逐儕接受一領白色个長袍，又聽到有話吩咐佢等，喊佢等歇睏加一下仔，等到同佢等相共事奉主个人㧯兄弟姊妹也像佢等共樣被人㓾死，數目滿个時。
12 𠊎又看到羔羊掀開第六隻印仔。該時，大地盡顫；日頭變烏，像一垤烏毛个布仔；月光歸隻變紅，像血一樣；
13 天頂个星仔落在地上，像還吂熟个無花果被暴風對樹頂吹下來一樣。
14 天毋見掉，像書捲起來收走一樣；山嶺㧯海島也一一對原位徙走。
15 地上个君王、統治者、將軍、有錢有勢个，並一切奴隸㧯自由人，全部囥在山孔㧯巖石縫肚。
16 佢等對山㧯巖石喊講：「橫在𠊎等身上！將𠊎等囥起來，使𠊎等閃避坐在寶座上个面㧯羔羊个大發譴！
17 因為佢等發譴个大日仔到了；麼人企得住呢？」