Revelation 19
1 這兜事情以後，𠊎聽到有大聲音，像係天頂有一大群人，喊講：哈利路亞，讚美上主！救恩、榮耀、權能全部屬𠊎等个上帝！
2 佢个審判係真實又公義个！因為佢審判該用淫亂敗壞世界个大淫婦，刑罰姖殺害上帝僕人个罪。
3 佢等第二擺又喊講：哈利路亞，讚美上主！燒該座大城个火煙一直衝等上，永遠無停！
4 二十四個長老㧯四個生物就伏下去敬拜該坐在寶座上个上帝，講：阿愐！哈利路亞！
5 接等，有聲音對寶座發出，講：所有上帝个僕人，凡係敬畏佢个，無論尊貴抑係卑微个，攏總愛讚美𠊎等个上帝！
6 𠊎又聽到像有一大群人个聲，像係大水㧯響雷公个大聲，講：哈利路亞，讚美上主！因為𠊎等个主—全能个上帝做王了！
7 𠊎等愛歡喜快樂，將榮光歸給佢！因為羔羊結婚个時間到了；佢个新娘準備好勢了。
8 上帝已經賜新娘皓光白淨个麻紗个衫。(麻紗个衫就係代表眾聖徒所行个義。)
9 然後，天使對𠊎講：「你愛寫下來：受邀請參加羔羊婚姻筵席个人有福氣了！」佢又對𠊎講：「這兜係上帝真實个話。」
10 𠊎伏在佢腳前，愛拜佢，總係佢對𠊎講：「千萬做毋得！𠊎㧯你，並你个眾兄弟姊妹，就係所有持守耶穌所啟示个真理个，全部共樣係僕人。你應當敬拜上帝！」因為，耶穌所啟示个真理就係預言个精義。
11 後來，𠊎看到天開了。有一匹白馬，該騎馬个稱做「誠信」㧯「真實」；佢憑公義來審判㧯交戰。
12 佢个目珠像火焰，頭那戴等盡多冕旒。佢身上寫等一個名，除了佢自家，無人知係麼介意思。
13 佢所著个長袍歸領染到血。佢个名稱做「上帝个道」。
14 天頂个軍隊跈等佢；佢等騎等白馬，著等白淨个麻紗个衫。
15 有一支當利个劍對佢个嘴歕出來；佢愛用這支劍來打贏列國。佢愛用鐵杖治理佢等；佢也愛在全能个上帝大怒氣个醡酒池底背榨出酒來。
16 佢个長袍㧯腳髀頂高寫等一個名號，就係：「萬王个王，萬主个主。」
17 𠊎又看到有一個天使企在日頭中央。佢大聲對空中所有个飛鳥喊講：「來啊，相共來參加上帝个大筵席！
18 來食君王、將軍、㧯士兵个肉；來食馬㧯騎士个肉；來食奴隸、自由人、尊貴个、卑微个、各種人个肉！」
19 𠊎又看到該隻惡獸㧯地上个列王，並佢等个軍隊聚集共下，來同該白馬騎士㧯佢个軍隊相㓾。
20 該隻惡獸被天軍捉去；識在佢面前行奇事个假先知也共下被天軍捉去。(這個假先知識通過奇事迷惑該兜有該隻惡獸个印記㧯拜獸像个人。)該隻惡獸㧯假先知被該白馬騎士生生㧒落該燒等硫磺个火湖底背。
21 佢等个軍隊全部被該白馬騎士口中歕出个劍㓾死；所有个鳥仔全部飛來食佢等个肉，食到飽𩜰𩜰。