Psalms 18
1 上主，𠊎敬愛你！你係𠊎个力量！
2 上主係𠊎个巖石，𠊎个城堡，𠊎个救主；𠊎个上帝係𠊎个磐石，𠊎避難个所在；佢係𠊎个盾牌，拯救个角，㧯要塞。
3 𠊎求喊應當受讚美个上主，𠊎就得拯救脫離𠊎个仇敵。
4 死亡个絞索圍等𠊎；毀滅个急流沖等𠊎。
5 陰間个絞索纏等𠊎；死亡个羅網揜過來。
6 在急難中𠊎求喊上主；𠊎求𠊎个上帝拯救𠊎。佢在佢个聖殿肚聽到𠊎个聲；𠊎求喊个聲音傳入佢个耳公。
7 該時，就有大地動；群山个根基搖動，因為上帝大發譴！
8 佢个鼻公有煙衝等出來，嘴歕出烈火㧯𤏸等个火炭。
9 佢打開天，親自降臨；有賁賁个烏雲在佢个腳下。
10 佢騎等基路伯來飛，藉風个翼胛飛盡遽。
11 佢用烏暗像布篷遮等自家；有盡賁个雲㧯水氣圍等佢；
12 冰雹㧯𥍉爧對佢面前个榮光出來，穿過賁賁个烏雲射出來。
13 上主對天頂打雷公；至高者發出佢个聲。
14 佢射箭逐走佢个仇敵；佢緊𥍉爧使佢等亂掉。
15 上主啊，你一下大聲咄，鼻公个氣一下歕出來，水就分開，海底現出來，大地个根基也露出來。
16 上主對頂高伸手捉等𠊎，將𠊎對大水中間拉出來。
17 佢救𠊎脫離盡兇个對敵，脫離一切怨恨𠊎个敵人；因為佢等全部比𠊎較強。
18 𠊎堵到災難个時節，當日佢等就來攻擊；好得有上主保護𠊎。
19 佢帶𠊎到當闊个所在；佢救𠊎，因為佢歡喜𠊎。
20 上主照𠊎个正直報答𠊎，佢賜福給𠊎，因為𠊎雙手淨浰。
21 𠊎遵行上主个道路，毋識悖逆𠊎个上帝。
22 𠊎遵行佢一切个法律；也毋識違背佢个命令。
23 𠊎在佢面前無污點；𠊎有遠遠離開罪惡。
24 所以上主照𠊎个正直報答𠊎，因為佢看𠊎做雙手淨浰个人。
25 上主啊，對信實个人，你顯明你个信實；對無污點个，你顯明你个完全。
26 對純潔个人，你顯明你个純潔；對詭詐个人，你顯明你个精明。
27 你拯救謙卑个人；你降低驕傲个人。
28 上主—𠊎个上帝啊，係你使𠊎个燈𤏸起來，將𠊎个烏暗變做光明！
29 同𠊎共下攻入敵人軍隊个就係你；同𠊎共下跳過圍牆个係𠊎个上帝！
30 論到上帝，佢所行个極圓滿！佢講个話最真實！一切求佢庇佑个人，佢就做佢等个盾牌。
31 除了上主，無別个上帝；唯有上帝係保護𠊎等个磐石。
32 係上帝賜給𠊎力量；佢使𠊎个道路平安。
33 佢使𠊎个腳像鹿仔个腳，使𠊎在高山頂企到在在。
34 佢訓練𠊎个手，俾𠊎知愛樣般相㓾，使𠊎个手骨拉得開銅弓。
35 上主啊，你賜給𠊎得救个盾牌；你用右手來支持𠊎；你庇佑𠊎，使𠊎興旺。
36 你使𠊎所行个路變闊，使𠊎个腳毋會打盪溜。
37 𠊎追敵人个時，一定追得到，無打贏佢等，𠊎絕對毋轉頭。
38 𠊎將佢等打到䟘毋起來；佢等全部橫在𠊎个腳下。
39 你賜𠊎相㓾个力量；使𠊎个敵人降服𠊎。
40 你使𠊎个對敵翻轉身逃走；𠊎將該兜怨恨𠊎个人消滅。
41 佢等喊救命，總係無人來救佢等；佢等求喊上主，總係佢毋應佢等。
42 𠊎打碎佢等，像塵灰被風吹散；𠊎抔走佢等，像掃街項个泥糜。
43 百姓背叛，你拯救𠊎，你立𠊎做列國个頭；連𠊎毋識个人民也服事𠊎。
44 佢等一聽到係𠊎就歸順；外族人降服在𠊎个面前。
45 佢等个勇氣毋見掉淨淨，愊愊掣走出佢等个營房。
46 上主係永生个！愛頌讚𠊎个磐石！上帝係𠊎个拯救者！愛傳揚佢个偉大！
47 佢就係為𠊎伸冤个上帝；使萬族降服𠊎个就係佢，
48 救𠊎脫離敵人个也係佢。上主啊，你使𠊎贏過對敵；你拯救𠊎脫離強暴个人。
49 所以，𠊎愛在列國中讚美你；𠊎愛吟詩唱歌頌讚你个名。
50 上主使佢所立个王得到大勝利；佢賜不變个慈愛給佢膏油所設立个，就係給大衛㧯佢个後代，一直到永遠。