Bible

1 上主啊，榮光毋好歸給𠊎等，毋好歸給𠊎等！榮光愛因為你个慈愛㧯信實歸在你个名下！ 2 做麼介俾列國緊問𠊎等：「你等个上帝在㖠位呢？」 3 𠊎等个上帝在天頂；佢照自家个旨意行事。 4 佢等个偶像係金銀做个，係人个雙手製造出來个。 5 它兜有嘴，也毋會講話；雖然有目珠，乜毋會看； 6 有耳公，也毋會聽；有鼻公，乜毋會鼻； 7 有手，總係毋會摸；有腳，也係毋會行；喉嗹，乜毋會出聲。 8 願一切製造㧯信靠偶像个人，攏總同佢等所做个偶像共樣。 9 以色列人啊，愛信靠上主！佢係你等个幫助㧯盾牌。 10 亞倫家个眾祭司啊，愛信靠上主！佢係你等个幫助㧯盾牌。 11 敬畏上主个啊，愛信靠佢！佢係你等个幫助㧯盾牌。 12 上主一直顧念𠊎等；佢還愛賜福給𠊎等；佢愛賜福給以色列家个人民；佢愛賜福給亞倫家个眾祭司。 13 上主愛賜福給敬畏佢个人，無論地位高低攏總有份。 14 願上主加添子女給你等，使你等个子孫越來越多。 15 願上主賜福給你等；佢係創造天地个主！ 16 天，就係上主个天；地，佢就賜給人類。 17 死人毋會讚美上主；落陰府个也係共樣。 18 總係，𠊎等生生个人愛頌讚上主，對這下直到永永遠遠！哈利路亞！