Bible

1 孻仔啊，你愛接受𠊎个話，愛將𠊎个命令記在心肚。 2 愛側耳來聽智慧，愛專心來求聰明。 3 愛大聲追求見識，愛出聲尋求聰明。 4 愛像尋金銀恁熱心，愛像尋囥等个財寶恁認真。 5 恁樣，你就會曉得敬畏上主，了解愛樣般認識上帝。 6 因為賞賜智慧个就係上主，智識㧯聰明攏係對佢來个。 7 佢為正直个人存留真智慧，佢做行為純正个人个盾牌。 8 佢保守義人个道，保護虔誠人个路。 9 然後你就會了解公義、公平㧯正直，知一切當行个路。 10 智慧會進入你个心肚，智識會使你个靈快樂。 11 見識會庇佑你，聰明會保守你， 12 愛使你脫離壞人个路，離開講話無是非个人； 13 該兜人離開正道，專門行烏暗个路， 14 歡喜做壞事，作惡來快樂； 15 佢等行彎曲个路，常常做奸詐个事。 16 智慧會救你脫離淫婦，就係盡會引誘你、嘴甜舌滑个婦女。 17 姖離開後生時所嫁个老公，毋記得姖在上帝面前所立个婚約。 18 去姖屋下就會沈淪到死；行姖个路就會跌落陰間。 19 去姖該位个人無一儕會倒轉來；佢等也無法度再尋到生命个路。 20 所以，你愛行好人个道，愛謹慎遵行義人个路。 21 正直个人會在世上安居；行為無好嫌个人會在地上長壽。 22 總係壞人會對世上剪除；奸詐个人會對地上挷掉。