Numbers 5
1 上主對摩西講：
2 「你愛命令以色列人，將該兜無淨浰个人—發癩个、發遺漏症个、摸到屍體个人，全部逐出營地。
3 無論男女，愛將所有在禮儀上無淨浰个人逐出去，佢等就毋會打垃圾營地，就係𠊎所住个地方。」
4 以色列人遵照命令，將恁樣个人全部逐到營外去。上主樣般吩咐摩西，以色列人就恁樣做。
5 上主㧯摩西講，
6 愛以色列人遵行以下个指示：無論男女，若係有人違背上主、做壞事來得罪別人，佢就有罪；
7 佢一定愛承認自家个毋著，將所虧欠个全數還給佢所得罪个人，另外再加五分之一。
8 若係該人已經死掉，又無親戚好接受賠償，就愛將錢獻給上主，俾祭司使用。這係禮儀所規定贖罪祭个羊牯以外再加个一項賠償。
9 逐個以色列人給上主个特別奉獻全部愛歸給為佢等舉行奉獻禮个祭司。
10 帶到祭司面前个特別禮物全部愛歸給祭司。
11 上主命令摩西，
12 愛將以下个指示㧯以色列人講。有人懷疑自家个𡜵娘無守貞節，㧯別个男人有性關係，羞辱到佢。
13 總係這老公無辦法確定這件事，因為厥𡜵娘毋承認，又無證人，也無當場捉到。
14 另外可能𡜵娘根本無對毋起老公，係老公心肝嫉妒、忒會懷疑姖。
15 無論係㖠種情形，這人一定愛將𡜵娘帶到祭司面前。佢同時愛帶為𡜵娘獻个祭物，就係一公斤个大麥粉。佢做毋得在頂高攪橄欖油抑係加乳香；因為這係疑心个老公所獻个素祭，係愛俾真相顯明个素祭。
16 祭司愛𢱋該婦人家行前來，企在上主个面前。
17 祭司愛倒一些仔聖水在碗肚，將聖帳篷地上个泥粉委兜仔在水底背，
18 然後將該婦人家个頭那毛鬆開，將愛獻个素祭(就係思念个素祭、懷疑个素祭)放在姖手中。祭司个手愛㨮等咒詛个苦水。
19 接等，祭司愛喊該婦人家發誓，同意祭司所講以下个話：「若係你無㧯人通姦，無違背老公做污穢个事，你就毋會受到這苦水所帶來个咒詛。
20 若係你識㧯人通姦，違背老公做污穢个事，
21 願上主使你个同胞咒詛你；願佢使你个肚笥脹起來，子宮跔掉。
22 願這水進入你个肚笥，使你个肚笥脹起來，你个子宮跔掉。」該婦人家愛應講：「𠊎同意。願上主个旨意實現。」
23 然後，祭司愛將這咒詛寫下來，將寫下个字放在苦水碗肚洗掉。
24 在祭司還吂喊該婦人家啉這苦水以前，(這苦水可能會使姖非常痛苦，)
25 祭司愛將婦人家手中該懷疑个素祭拿過來，在上主面前搖幾下，拿到祭壇个頭前，
26 然後扡一揢麵粉做這事个紀念，在祭壇頂燒掉。最後，祭司愛將這水喊該婦人家啉落去。
27 若係姖確實㧯人通姦，違背老公做污穢个事，這帶來咒詛个水會使姖大痛苦，肚笥會脹起來，子宮跔掉。姖會被同胞咒詛。
28 若係該婦人家無罪，算係淨浰个，姖就毋會受到傷害，還係會生育。
29 這懷疑个法律係有關婦人家違背老公做污穢个事，
30 抑係老公嫉妒、懷疑𡜵娘無守貞節。該婦人家愛企在上主个面前，祭司愛執行這儀式。
31 老公就無罪。若係該婦人家有罪，姖一定愛自家擔當。