Numbers 32
1 呂便㧯迦得兩支族有當多牛羊。佢等看到雅謝㧯基列地區係畜頭牲當好个所在，
2 就去見摩西、祭司以利亞撒，㧯會眾个領袖，講：
5 你若認為𠊎等堪得，拜託將這片土地給你个僕人做產業，毋好俾𠊎等過約旦河去，住在該片。」
6 摩西應講：「敢講你等愛留在這位、由在你等个同胞以色列人去相㓾係麼？
7 你等樣般做得害以色列同胞失志，毋過約旦河，毋進入上主所賜給佢等个該片土地呢？
8 𠊎派你等个祖先對加低斯‧巴尼亞去打探該地个時，佢等乜係恁樣。
9 佢等到了以實各山壢，看到該片土地，總係轉來个時，佢等使以色列人失志，毋敢進入上主賜給佢等个土地。
10 該日，上主發譴，發誓講：
11 『佢等當中二十歲以上、對埃及出來个人，無一儕做得進入𠊎應許給亞伯拉罕、以撒、雅各該垤土地，因為佢等對𠊎無忠心。』
12 這個話係指逐儕人講个，只有基尼洗族人耶孚尼个孻仔迦勒㧯嫩个孻仔約書亞無算在內，因為佢等一直對上主當忠心。
13 上主向以色列人發譴，使佢等在曠野流浪四十年，直到該代在佢面前行邪惡个人全部死掉。
14 這下你等又想愛跈你等个祖先，成做新一代个罪人，愛再一擺使上主向以色列人發譴。
15 若係你等呂便㧯迦得支族个人毋願意跈佢，佢會再一擺將以色列人㧒在曠野，你等就愛擔佢等滅亡个責任。」
16 佢等行近摩西面前，講：「求你准𠊎等在這位先為羊群圍羊圈，為𡜵娘子女起城來保護佢等，
17 然後𠊎等正帶以色列同胞上戰場，帶頭攻打，直到佢等在屬佢等个土地安定下來。同時，𠊎等个𡜵娘子女做得安全住在這保護佢等个城內，毋受這地人民个侵犯。
18 𠊎等愛等到以色列同胞佔領該分配給佢等个土地後，正會轉來自家个屋下。
19 𠊎等毋會㧯佢等分約旦河西片佔領个產業，因為𠊎等已經有約旦河東片个產業。」
20 摩西應講：「若係你等正經愛恁樣做，就在上主面前準備好勢去作戰啊！
21 你等个戰士全部愛準備好勢，在上主面前過約旦河，去攻打敵人，直到上主打贏佢等，
22 佔領該土地。然後你等就做得轉來，因為你等已經對上主㧯以色列同胞盡義務。上主會將約旦河東片个這垤土地歸給你等做產業。
23 總係，你等若毋守約束，就係得罪上主；你等一定會因為自家个罪受責罰，絕對走毋掉。
24 這下你等去為𡜵娘子女起城，為羊群圍羊圈。總係毋好毋記得你等个約束！」
25 迦得㧯呂便支族个人對摩西講：「你个僕人一定會照大人个命令去做。
26 𠊎等个𡜵娘子女、牛群、羊群就留在基列這兜城鎮。
27 總係你个僕人、逐儕會準備好勢，在上主面前過約旦河去相㓾，照你所講个去做。」
28 所以，摩西吩咐祭司以利亞撒、嫩个孻仔約書亞，㧯以色列其他支族个族長，講：
29 「若係迦得㧯呂便支族个人全部準備好勢，在上主面前渡過約旦河去相㓾，若係你等因為佢等个幫助佔領該土地，你等就愛將基列地區給佢等做產業。
30 若係佢等毋過約旦河㧯你等共下去相㓾，佢等就愛㧯你等共樣，在迦南地分到自家个產業。」
31 迦得㧯呂便支族人應講：「你个僕人一定愛照上主个命令去做。
32 𠊎等會準備好勢，在上主面前過河，入迦南地去相㓾；恁樣，𠊎等就會得到約旦河東片个土地做產業。」
33 所以，摩西將亞摩利王西宏个國㧯巴珊王噩个國，連該土地㧯周圍个村莊分配給迦得、呂便兩支族，㧯約瑟个孻仔瑪拿西半支族。
34 迦得支族重新起底本、亞他錄、亞羅珥、
35 亞他錄‧朔反、雅謝、約比哈、
36 伯‧寧拉、伯‧哈蘭這兜堅固个城；佢等又圍羊圈。
37 呂便支族重新起希實本、以利亞利、基列亭、
38 尼波、巴力‧免(這個名係改過个)、西比瑪。佢等為重建个城鎮重新安名。
39 瑪拿西个孻仔瑪吉个宗族个人侵入基列地，逐走該位个亞摩利人，佔領佢等个土地。
40 所以摩西將基列給瑪吉族；佢等就住在該位。
41 瑪拿西支族个睚珥佔領這兜村莊，就安這兜村莊个名做「睚珥村」。
42 挪巴佔領基納㧯周圍个村莊，就用自家个名喊該兜村莊做挪巴。